Read Napu 2 Yohane 1 Bible Online

2 Yohane 1 - Napu bible

2 Yohane 1

¹Sura ide hangko iriko Tosaenda to Sarani, kupakatu irio Ina, au napileiko Pue Ala, hai i ope-opehe anamu au tou-tou mpuuhe kupokaahi. Bara pea iko au mampokaahikau, agaiana ope-ope worihe tauna au moisa paturo au tou mampokaahikau.

²Kipokaahikau lawi mampoinalaike paturo au tou, hai paturo au tou iti takingki hawe i hae-haena.

³Kuharunga Pue Ala Umanta hai Yesu Kerisitu AnaNa mowatike hangko i kabulana laluNa, motudungiake kamaahiNa, hai Naweike roa ngkatuwo. Ope-ope iti Naweike, ikita au mepoinalai i paturo au tou hai au maahi lalunta.

⁴Matana mpuu lalungku mohadi bahangkiahe anamu inde moulamohe paturo au tou, nodo au nahawaake Pue Ala Umanta.

⁵Mewali, kuperapi irio Ina, bona mombepokaahike hadua hai hadua. Ide, bara hawa au wou, agaiana hawa au tahadimi hangko i mpolinguruna.

⁶Hai au rauli ahi iami: mampeulaike hawana Pue Ala. Hai ide hawaNa au nihadi hangko i nguru-nguruna, iami: mombepokaahikau.

⁷I humalele dunia ara bosa topeakalangi au moanti paturo au mepakanawo. Ihira iti tauna au barahe mampoinalai katouna Yesu Datu Topehompo au maimi mewali manusia. Tauna au nodo, topodongkohe hai mampoiwalihe Kerisitu.

⁸Ido hai hangangaa mainga-ingakau, lawi ane nikabaha pepoinalaimi i Pue Yesu, bara ara bunduna pobagongki mobambari Ngkora Marasa irikamu. Hangangaa mepoinalai liliukau i Pue bona i alo pebotusi ina nihumba hinangka hurungina pepoinalaimi.

⁹Ope-ope tauna au megaaki hangko i paturo au tou hai barahe moula paturona Kerisitu, tauna iti barahe mohintuwu hai Pue Ala. Agaiana au moula liliu paturona Kerisitu, ihirami au mohintuwu hai Pue Ala Umanta hai Yesu AnaNa.

¹⁰Mewali, ane ara guru agama au hawe i boeami au moanti paturo au mosisala hai paturo ide, ineehe nidoko i lalu soumi hai ineehe nidoko nodo halalu hampepepoinalaimi.

¹¹Lawi hema pea au modokohe nodo halalu hampepepoinalainda, himbela pea hai motulungi worihe i lalu pobagonda au kadake iti.

¹²Katouana ngkaia mani au kupeinao kupahaweakau, agaiana bara kuunde ane ope-ope kupahawe melempo i sura ide. Lawi tunggaiaku ina laokau kusondaki, hai ope-ope iti ina kupahaweakau bona matana ntepuuke.

¹³Ngkaia tabea hangko i ananahe halalumu au inde au napilei Pue Ala.[1] Hangko iriko, YOHANE