Read Napu 3 Yohane 1 Bible Online

3 Yohane 1 - Napu bible

3 Yohane 1

¹Sura ide hangko iriko, Tosaenda to Sarani, kupakatu irio Gayu, rangangku au tou-tou mpuuko kupokaahi.

²Halalungku! Mekakaena bona hinangka au nupobago mewali maroa hai Kuharunga wori ina maroa-roako himbela hai pepoinalaimu au maroho.

³Matana mpuu lalungku, lawi arahe bahangkia halalunta hampepepoinalai au hawe inde moanti bambari kana irio, rauli: mepoinalai liliuko i paturo au tou, hai babehiamu moula wori paturo iti.

⁴Rumihi mpuu kamatanangku mohadi bambari au manguli anangku moula liliu paturo au tou.

⁵Halalungku! Matanana lawi motulungi liliuko halalunta hampepepoinalai au mehupe i boeamu. Mogalori au bara manihe nuisa, nutulungi worihe.

⁶Arahe au mai inde mopahawe kana i ahimu i ope-ope halalunta hampepepoinalai. Mewali, kuharunga bona nupopelingka maroahe halalunta iti bona peisahe mopaliliu pobagonda, lawi itimi au napokatana Pue.

⁷Lawi halalunta iti, mampopolumaohe bagona Pue Yesu. Hai barahe molambi apa-apa hangko i tauna au bara mepoinalai i Pue.

⁸Mewali, hintoto mpuuhe tatulungi, lawi ane tababehi nodo, lempona mobago sambelake i lalu pobagonda moanti bambari au tou.

⁹Ara hambua surangku au kupakatu i hambua jumaa, paidaana Diotrepes. Agaiana Diotrepes bara mampeulai lolitangku, lawi napeinao ia pea au moatoro tauna.

¹⁰Mewali, ane hawena irio, ina kutuntuako babehiana au kadake. Nasalai liliungkai agaiana pesalaina iti bara tou. Hai bara ido pea babehiana. Ane halalunta au mobambari Ngkora Marasa mehupehe i boeami, barahe nadoko, hai mokonto worihe tauna bona ineehe modoko tauna iti. Hai hema pea au modokohe topoanti Ngkora, napopelohohe hangko i jumaa iti.

¹¹Halalungku! Ineeko mampeulai babehia au kadake. Nupeulaimi babehia au maroa. Tauna au mobabehi roa, tongawa kanapoanandami Pue Ala. Tauna au mobabehi dake, tongawa kadanda mani moisa Pue Ala.

¹²Demetrius, ratoia ope-ope tauna. Ia hintoto mpuu ratoia, lawi babehiana moula paturo au tou. Kitoia wori, hai nuisa katouna lolitangki.

¹³Katouana ngkaia mani au kupeinao kupahaweakau, agaiana bara kuunde ane ope-ope kupahawe melempo i sura ide.

¹⁴Lawi kuharunga barapi mahae ina mohidupa mbulike bona ara katepakanta mololita sambela.

¹⁵Kuharunga Pue Ala moweikau roa ngkatuwo. Ope-ope himadamu inde mopakatu worihe tabeanda irio. Nupahawe wori tabeangku i hadua-hadua rangangku au arahe inditi. Hangko iriko YOHANE