Read Napu Pampetudungia 10 Bible Online

Pampetudungia 10 - Napu bible

Pampetudungia 10

¹Roo indo, moitana hadua malaeka au maroho mendaulu hangko i suruga. Malaeka iti nabalungkuhi gawu, hai waana natoleliki mporagia. Lindona mewangka nodo alo, bitina nodo arii au keapi.

²Biti koanana mepangka i tahi, hai biti kabeona mepangka i lore. I taiena ara hambua sura koi au tebungkahi.

³Mongangami malaeka iti nodo poau singa. Roo malaeka iti monganga, nahanai gumpata au mowotu masisimbuku pitu belana.

⁴Karoona gumpata iti mololita, ina kuuki lolitana, agaiana unga pea kuhadi hambua wotu hangko i suruga au mouliangaana: “Iti inee nuuki! Hangangaa nuwuniangi apa au nauli gumpata inona.”

⁵Roo iti, malaeka au kuita inona, au mepangka i tahi hai i lore, moangkami taie koanana i langi, hai

⁶mosumpa i lalu hangana Pue Ala au tuwo hawe i hae-haena, au mampopewali langi, tampo, tahi hai hinangka ihina. I posumpana, nauli node, “Ane malaeka au kapitu motawue tatamburuna, i tempo iti Pue Ala ina mampopewali tunggaiaNa au mahaemi tewuniangi moula apa au Napololita hangkoia i nabi au moantihe NgkoraNa. Ope-ope iti ina rapaholigami pewalina.”

⁸Roo indo, wotu au kuhadi hangko i suruga inona mouliangaa mbulina, node: “Laomoko mangala sura au tebungkahi au ara i taiena malaeka au mepangka i tahi hai i lore!”

⁹Lao mpuumona i malaeka iti, hai kuuliangaa, “Nuweina sura au koi iti.” Nauliangaana, “Nuala hai nuandemi. I lalu taimu, nuhadi nodo paande au mapai, agaiana i ngangamu, momi nodo tinaha.”

¹⁰Kuala mpuumi sura iti hangko i taiena malaeka iti hai kuande. I ngangangku, minana momi mpuu nodo tinaha, agaiana i lalu taingku kuhadi nodo paande au mapai.

¹¹Roo indo, nauliangaana, “Hangangaa nupahawe mbuli lolitana Pue Ala. Hangangaa mopahaweko kana i ngkaia datu hai tauna hangko i ngkaia kadatua, ngkaia pemulea hai ngkaia pakana basa.”