Read Napu Pampetudungia 11 Bible Online

Pampetudungia 11 - Napu bible

Pampetudungia 11

¹Hangko indo, raweina hambua lai au nodo popehoka, hai rauliangaana, “Laomoko mohoka Souna Pue Ala hai meja pointua dupa. Nuimba wori hangkia kabosanda tauna au menomba inditi.

²Agaiana inee Nuhoka tabangaa Souna Pue Ala. Lawi tabangaa iti, rapasilolongaamohe tauna au bara to Yahudi, au ina moihe-iheki wanua au malelaha iti i lalu iba pulona hai rombula.

³I tempo iti, ina Kutudu rodua sabiNgku lao mopahawe NgkoraKu. SabiNgku au rodua iti mehampihe waru ngkasusa, hai mobambarihe NgkoraKu i lalu hasabu rongatu hai ini pulona alona.”[21]

⁴Sabi au rodua iti, rapandiri nodo rompoa kau saitun hai rombua biti hulo[22] au meangka i lindona Pue Ala, Ampu humalele dunia.

⁵Makuasahe mampopesupa api hangko i lalu nganganda bona mopapate hema pea au mampeinao mobabehi dake irihira. Ido hai liliu mate ope-ope iwalinda au meewa.

⁶Ara kuasanda motuko langi bona dati toa uda tanganda mopahawe Ngkorana Pue. Makuasa worihe i ope-ope owai. Owai peisa rapopewali wahe. Ara wori kuasanda mopamasusa dunia hai mampopengaa pepopeahi-ahi, moula peundeanda.

⁷Ane hopomi bagonda mopahawe Ngkorana Pue, ina hawe hambaa binata au kadake au moewahe. Ia ina monangihe hai mopapatehe. (Binata au kadake iti iami binata au ina mesuwu hangko i kabe ngkapate au bara tehoka kakaladuna.)

⁸Karoonda sabi au rodua iti rapapate, watanda rapogiangaa i tanga rara wanua au mahile. (Wanua au mahile iti, iami wanua karapakuana Ampunda au rapandiri nodo wanua Sodomo hai tampo Masiri hangkoia, lawi kadake mpuuhe ampu boea iti.)

⁹Tauna hangko i humalele dunia, hangko i ope-ope kadatua, ope-ope pemulea hai hinangkana basa ina moitahe tomate au rodua iti i tanga rara. I lalu talu alona hantanga rapalikangaahe nodo, lawi bara rakira ratawu.

¹⁰Tauna kadake au maida i dunia ina mampokatana kapatenda nabi au rodua iti. Ina mosusahe hai mombeparaseengihe, lawi nabi au rodua iti, au mampopeahi-ahihe hangkoia, matemohe.

¹¹Agaiana kaliuna talu alona hantanga, hawemi inao hangko i Pue Ala au mepatuwo. Inao iti mesua i watanda, alana tuwo hulehe; ido hai mearohe hai meangkahe. Hangko indo, rumihimi kalanganda ope-ope tauna au moita apa au mewali.

¹²Roo indo, rodua sabi iti mohadi hambua wotu hangko i suruga au mokakiohe node: “Mengkaoremokau mai!” Teore mpuumohe lao i suruga nabalungkuhi gawu, hai pengkaorenda iti raita-ita mata ope-ope iwalinda.

¹³Tempo iti, unga pea kelinu mahile. Hangkira hampulo hangko i wanua iti magero, hai pitu sabuna tauna mate. Langa mpuumohe tauna ntanina, ido hai motoiahe Pue Ala, rauli, “Mahile mpuu kuasana Pue Ala au i suruga!”

¹⁴Mewali, liumi kahurewu au karompakana. Agaiana ara mani hampaka kahurewu au ina meusu.

¹⁵Malaeka au kapitu motawuemi tatamburuna. Hai arahe au monganga-nganga i lalu suruga, rauli, “Ide-ide poparenta i dunia i taienami Pue Ala himbela hai Datu Topehompo au Napileimi bona Pue Ala moparenta i hae-haena.”

¹⁶Totosae au rompulo hai iba au mohudahe i pohudaanda i lindona Pue Ala, molingkuduhe motumpa menomba Iria,

¹⁷rauli, “Pue Ala, kamahilena kuasaMu melumbu hangko i ope-opena. AraKo mpolinguruna hai araKo ide-ide. O Pue, kiuli ngkaia kamaroana Irio, lawi Nupatongawami kamakuasaMu au mahile, hai mepongkamoKo moparenta.

¹⁸Ope-ope tauna au barahe meula Irio, mohihomohe moewaKo. Agaiana hawemi tempona Nupopaitaahe karumpuMu. Hawemi tempona Nubotusi kara-karanda tauna au mate. Hawemi tempona nabi au mobambari NgkoraMu, tauna au meula Irio hai ope-ope tauna au mobilaKo, maroa au mahile ba au koi tuwonda, Nuhurungi babehianda au maroa. Hawemi tempona Nuhuku tauna au mopakarugi dunia ide.”

¹⁹Hangko indo, tebungkahimi baba Souna Pue Ala i suruga, hai i lalu SouNa raita Peti Podandi.[23] Liliu mombehangkemi kila, kegumpatami, kelinu, hai toami uda mowua au rumihi.