Read Napu Pampetudungia 17 Bible Online

Pampetudungia 17 - Napu bible

Pampetudungia 17

¹Roo indo, hadua hangko i malaeka au pitu au mokingki pambolia karumpuna Pue Ala iti, mai iriko, nauliangaana, “Maiko, ina kutudungiako karahukuna towawine au kadake adana, au mohuda i owai au ngkaia.

²Datu-datu i dunia mobabehihe babehia au merikai hai ia, hai ope-ope tauna au maida i dunia napaenuhe hai paenuna au melangui iti, lempona ia nawawahahe mampeulai babehiana au merikai.”

³Nakuasaina Inao Malelaha, hai malaeka iti moantina lao i pada wungi. Inditi kuita hadua towawine au mesawi i hambaa binata au malei ntepuu, hai i humalele watana teuki lolita pekakabosai i Pue Ala; waana binata iti pitu hai tanduna hampulo mbuana.

⁴Towawine iti mebadu malei hai malentoro, meparewa bulawa hai mutiara hai paramata au masuli holona. Ia mokingki haogu mangko bulawa au buke hai paenu au meringkui. Paenu iti lempona, babehiana au mepakaea hai au merikai.

⁵I wingkena, teuki hanga au tewuniangi lempona, node: “Wanua Babeli au Mahile, inanda ope-ope tauna au kadake babehianda hai pentumbuana mampopengaa babehia au bara hintoto i dunia.”

⁶Kuita towawine iti, malangumi moenu wahenda taunana Pue Ala. Lempona, ia mopapatehe tauna au mopangaku kaYesuna Ampunda. Tingkara mpuuna moita towawine iti.

⁷Hangko inditi, malaeka au moantina mololita, nauli, “Moapari hai tingkarako? Bara pae nuisa lempona towawine iti hai binata au napesawii? Ide-ide, ina kupakanotoako lempona. Binata iti, mowaa pitu hai motandu hampulo mbuana.

⁸Hangkoia tuwo, hai ide-ide barapi ara, agaiana ina mesuwu hule hangko i kabe ngkapate au bara tehoka kakaladuna. Hai roo indo, ina rahuku mate. Tauna au maida i dunia au bara teuki hanganda i lalu Sura Ngkatuwo hangko damani dunia rapopewali, ina tingkarahe moita binata iti. Lawi hangkoia tuwo, ide-ide barapi ara, agaiana hambela tempo ina hawe hule.

⁹Hangangaa tapepekiri maroa bona taisa lempona lolita ide. Pitu waa binata iti, lempona pitu oguna bulu[30], pohudaana towawine iti. Hai waa au pitu iti, lempona wori datu au pitu[31].

¹⁰Lima hangko i datu iti, manawomohe. Hadua tangana mani moparenta. Hai hadua bara mani mepongka moparenta. Ane hawe deade, ia ina moparenta agaiana sangka pea.

¹¹Hai binata au tuwo hangkoia hai au barapi ara ide-ide, iami hadua hangko i datu au pitu inona ina mai hule bona moparenta; ia ina hawe mewali datu kaualu. Agaiana kahopoana datu iti batena rahuku hawe i hae-haena.

¹²Tandu au hampulo au nuita inona, lempona hampulo datu au bara mani mepongka moparenta. Datu au hampulo iti ina raweihe tempo moparenta hihimbela hai binata iti, agaiana poparentanda hampalai pea.

¹³Datu au hampulo iti, hampepekirihe motulungi binata au kadake. Ope-ope kamarohonda hai kamakuasanda rawei binata au kadake.

¹⁴Ina mampombealaa Ana Dimba. Agaiana ina nanangihe Ana Dimba iti, lawi iami Pue hangko i ope-ope pue hai Datu hangko i ope-ope datu. Ana Dimba iti ina raporangai taunaNa au Nakakio hai au Napilei, hai au meula liliuhe Iria.”

¹⁵Nauli mbuli malaeka iti iriko, “Owai au nuita inona, pohudaa towawine au merikai babehiana iti, lempona tauna au hangko i humalele dunia, tauna hangko i ope-ope kadatua hai hinangkana basa.

¹⁶Ane hawemi tempona, binata hai datu au hampulo iti ina mokahihi towawine au kadake babehiana. Towawine iti ina rahaka hai rapopengkabela. Ontona ina raande, hai au bara raande ina rahuwe.

¹⁷Hai apa au rababehi iti, batenami tunggaiana Pue Ala. Lawi Pue Ala mampopokale lalunda datu iti bona mampopolumaohe tunggaiaNa. Ido hai datu iti, hampepekirihe mowei kuasa poparentanda i binata bona tepabukei mpuu apa au napahawe Pue Ala.

¹⁸Mewali, towawine au nuita iti, lempona wanua au mahile au naparenta hadua datu au mokuasai ope-ope datu i dunia.”