Read Napu Pampetudungia 18 Bible Online

Pampetudungia 18 - Napu bible

Pampetudungia 18

¹Karoona malaeka iti mololita nodo, kuita mbulimi malaeka au haduana mendaulu hangko i suruga. Kuasana mahile, hai anti pewangkana, humalele dunia mabaa.

²Ia monganga masisimbuku, nauli, “Magero! Mageromi Babeli, wanua au mahile! Mepongka ide-ide, wanua ide rapaidaimi seta, tokadake, hai hinangka tadasi au rapalia hai rakahihi.

³Mageromi wanua Babeli, lawi to Babeli mowawaha tauna i humalele dunia bona maenu paenu au melangui. Lempona: mowawahahe tauna mampeulai babehianda au kadake. Ope-ope datu i dunia mampeulaihe babehianda au merikai iti. Hai topobalu-balu i dunia mewalihe tauna au pebuku hangko i mampopengaa peundeanda to Babeli.”

⁴Roo indo, kuhadi mbulimi hambua wotu hangko i suruga au manguli, “Padumokau taunaNgku! Melohomokau hangko i wanua ide. Ineekau mampeulai dosanda ampu boea ide, datikau nalelehi pepopeahi-ahi au morumpahe.

⁵Lawi dosanda mombetitiwongkomi hawe i langi. Hai ina nahurungimi Pue Ala ope-ope dosanda.

⁶Wanua ide, rumihi kakadakena i tauna ntanina. Mewali, hangangaa rahurungi babehianda nodo au rababehi i tauna ntanina hangangaa rahurungi rombela hangko i ope-ope babehianda au kadake. Hangangaa rapaara i wanua ide pepopeahi-ahi au rombela karumihina hangko i pepopeahi-ahi au rababehi i tauna ntanina.

⁷Hangangaa rapopeahi-ahihe hai rapamaparihe, lawi mampemahilehe, rauli: ‘Iko datu towawine. Barana tobemba. Barana ina molambi kapari.’

⁸Anti kamampemahilenda iti, i lalu hangaloa pea wanua Babeli ina opehe narumpa, kapate, pandawi hai rimi. Hai wanua ide ina tehuwe, lawi au mohuku wanua ide, iami Pue Ala au makuasa.”

⁹Datu i dunia mampeulaihe babehianda to Babeli au merikai, hai nodohe to Babeli, ihira mampeulai peahe peundeana lalunda au kadake. Mewali, ane datu iti moitahe rambu au mengkaore hangko i wanua Babeli au rahuwe, ina rateriahi kamagerona.

¹⁰Ina ratotoki ngkarao pearai lawi langahe nalelehi pepopeahi-ahi au morumpa wanua iti. Hai mololitahe, rauli, “Hurewu-hurewumi wanua Babeli au mahile hai maroho! Hampalai pea, tunami anti pehukuna Pue Ala.”

¹¹Topobalu-balu i dunia, masusa lalunda hai moteriahihe kamagerona Babeli, lawi barapi ara au ina moholo balu-balunda

¹²au ngkaia pakana iti, nodo: bulawa, salaka, paramata, hai mutiara. Nodo wori hampi maluha au rababehi hangko i bana au masuli hai bana au malei hai malentoro. Ara anu-anu au rababehi hangko i kau mawongi, hangko i ngihi gaja, hai anu-anu ntanina au rababehi hangko i kau masuli, ba hangko i tambaga, besi ba watu pualam.

¹³Nodo wori kanino hai rampa-rampa ntanina, anu-anu au mawongi nodo dupa, mire hai kemenyan. Tepesua wori anggoro, lana, tapu hai pare[32] Nodo wori japi, dimba, dara, roda, hawi hai tauna au ratawani. Ope-ope balu-balunda iti barapi ara au moholo, anti kamageronami wanua iti.

¹⁴Ido hai topobalu-balu iti moteriahihe ampu boea Babeli, rauli, “Ope-ope au niunde tunami. Ope-ope au masuku hai merae, barapi ara irikamu, hai barapi ina ralambi.”

¹⁵Topobalu-balu au mewalimohe tauna pebuku lawi mobalu-baluhe i to Babeli, i tempo iti ina metotoki ngkarao pearaihe, lawi langahe ina nalelehi pepopeahi-ahi au morumpa wanua iti. Moteteriahe hai masusa lalunda,

¹⁶rauli, “Hurewu, hurewumi wanua Babeli au mahile hai maroho! Hangkoia to Babeli mopake hampi au maluha, bana malei hai malei malelentoro. Hai meparewa bulawahe, watu paramata hai mutiara.

¹⁷Agaiana peawanda au ngkaia iti, hampalai pea tunami!” Ope-ope tauna au mohaokihe katuwonda i tahi, maroa au moanti kapala tahi, maroa topobago i kapala hai ope-ope tauna au mesawi i kapala, metotoki ngkarao pearaihe

¹⁸mampeita rambu au mengkaore hangko i api au moande wanua iti. Mololitahe, rauli, “Marugi mpuu wanua au mahile! Bara ara pahuruna!”

¹⁹Ina moawuihei waanda tanda kamasusana lalunda. Ina moteriahe hai mongangahe, rauli: “Hurewu, hurewumi wanua Babeli au mahile hai maroho! Anti peawanda to Babeli, ido hai ikita ope-ope au mobago i kapala tahi mewalike tauna au pebuku. Agaiana peita: hampalai pea, wanua iti tunami!”

²⁰Hangangaa matanakau, ikamu au maida i suruga. Nipokatanami kamagerona wanua Babeli! Hangangaa matanakau, ikamu taunana Pue Ala, ikamu ope-ope suroNa hai nabiNa! Lawi Pue Ala mohukumohe to Babeli, mohurungi babehianda au kadake irikamu.

²¹Roo indo, hadua malaeka au maroho moangkami haogu watu au kamahilena meliu hangko i riso, hai naweduka i lalu tahi, nauli, “Nodo watu ide raweduka i lalu tahi hai barapi ina ralambi hule, nodo wori wanua Babeli au mahile ina rapatuna, hai barapi ina raaro hule.

²²Topokecapi, toponani, topotulali hai topotawue tatamburu, barapohe rahadi i wanua iti. Topoaro sou hai topokarahi barapohe ara; pomoni pombaua barapi rahadi.

²³Barapi ina ara au mopatuwo hulo. Barapi ina ara wotu toratauna. Barapi ina ara wotu posusa petauna. Ope-ope iti ina mewali lawi hangkoia topobalu-balu i Babeli mahile hanganda i dunia, hai anti kapangisanda au kadake, mopakanawomohe ope-ope tauna i dunia.

²⁴Hai mopapate worimohe bosa tauna i dunia tepesuahe nabina hai taunana Pue Ala.”