Read Napu Pampetudungia 19 Bible Online

Pampetudungia 19 - Napu bible

Pampetudungia 19

¹Roo indo, kuhadi nodo wotu tauna bosa i suruga. Monganga-ngangamohe, rauli, “Haleluya! Toiami Pue Ala! Ia au moweike katehorema. Ia au mahile tuwoNa hai au makuasa.

²Toiami Pue Ala, lawi pobotusiNa manoto hai tou. Ia mohukumi towawine au bara maroa adana, au mopakadake dunia ide hai babehiana au merikai. Nahukumi lawi masala anti popapatena hawinahe Pue Ala.”

³Monganga mbulimohe tauna bosa iti, rauli, “Haleluya! Rambu hangko i api au moande wanua iti mengkaore liliu hawe i hae-haena.”

⁴Hangko inditi, rompulo hai iba totosae hai pinatuwo au iba iti, molingkudumohe ope-ope motumpa i lindo kadera kadatuana Pue Ala, hai menomba Iria, rauli, “Amin! Haleluya!”

⁵Roo ido, kuhadi hambua wotu au mololita hungku i kadera kadatua iti, manguli, “Toiami Pue Ala Amputa, ikamu ope-ope au mewali hawiNa! Nitoiami Pue Ala, ikamu au mengkoru Iria, maroa au koi tuwomi ba au mahile tuwomi!”

⁶Roo indo, kuhadi wori ponganganda tauna au bosa ntepuu. Ponganganda iti nodo powoo owai au mahile, hai nodo pomoni gumpata. Kuhadihe manguli, “Haleluya! Toiami Pue Ala. Lawi Amputa Pue Ala moparentami! Melumbu kuasaNa hangko i hinangkana.

⁷Maimoke monani matana-tana, motoiake peawana tuwoNa. Lawi hawemi alo karabuana Ana Dimba. Toratauna towawine masilolongami.

⁸Ia rawei hampi au maluha, au bula meningki hai au mengkila-ngkila.” Hampi bula iti lempona babehianda taunana Pue Ala au maroa.

⁹Hangko indo, malaeka iti mouliangaana, “Nuuki node: morasihe tauna au rakakio lao i posusa petauna Ana Dimba.” Hai nauli mbuli, “Idemi lolitana Pue Ala, hai batena tou.”

¹⁰Molingkudumona motumpa i lindona malaeka iti menombana iria, agaiana nauliangaana, “Inee! Ineeko menomba iriko. Batena pea Pue Ala au hintoto nupenombai. Lawi ide iko, hawina pea worina Pue Ala himbela hai oio hai ope-ope halalumu au mopangaku kaYesuna au rapenombai. Lawi tunggaiana ope-ope lolitangku ide bona mosabiki kaYesuna Datu Topehompo.”

¹¹Roo indo, kuita suruga tebungkahi, hai kuita hambaa dara au bula. Hai au mesawi i dara iti, rahanga: “Au Tetida hai Au Manoto.” Manoto pebotusiNa, hai ane mombeala, mombeala i kanoto-notoana.

¹²MataNa mewangka nodo api au lolaa, hai i waaNa ngkaia songko datu. I wataNa teuki hangaNa, agaiana batena pea Ia au moisa lempona hanga iti.

¹³HampiNa raememi i wahe. HangaNa iami: “Ngkorana Pue Ala.”

¹⁴Ope-ope surodado hangko i suruga au meula i bokoNa, modara worihe dara bula. Hampinda, bana lena maalusu au bula hai bara kedai.

¹⁵Hangko i lalu ngangaNa, mesuwumi hamata piho au mataru. Hai piho iti, Ia monangi ope-ope tauna i dunia. Roo indo, Naparentahe hai kamarohoNa au nodo kamaroho lai besi. Ia au moupi wua anggoro i lalu popiengaa anggoro. Popiengaa anggoro iti iami karumpuna Pue Ala au makuasa.

¹⁶I baduNa hai i paaNa teuki hanga ide, “Datu hangko i ope-ope datu, Pue hangko i ope-ope pue.”

¹⁷Roo indo, kuitami hadua malaeka au meangka i wongko alo. Malaeka iti mokakio ope-ope tadasi au membaro-mbaro i laerawa masisimbuku, nauli, “Maimokau i posusa mahile au napaara Pue Ala.

¹⁸Maikau moande ontonda datu hai tadulako, ontonda surodado au keate, ontonda dara hai ontonda topodara. Maimokau moande ontonda tauna, maroa au mahile ba au koi tuwonda, maroa au hawi tuwonda ba au bara hawi.”

¹⁹Roo iti, kuitami binata au kadake, hai datu-datu i dunia hai ope-ope surodadonda, mogulumohe bona mampombealaahe Topesawi i dara au bula hihimbela hai surodadoNa.

²⁰Kahopoana binata au kadake iti rahaka hihimbela hai nabi au mepawuli iti. Ihira, ratendehe i lalu tahi api au lolaa hai au mawaa. Nabi au mepawuli iti, iami au mobabehi tanda kuasa hai kuasana binata au kadake. Anti tanda kuasa iti, ia mopakanawohe tauna au modoko tanda binata hai au menomba i lengge binata iti.

²¹Mewali, Topesawi i dara au bula mopapate ope-ope surodadona binata, Nabatahe hai pihoNa au mesuwu hangko i ngangaNa. Hai roo indo, hawe mpuumohe tadasi. Tadasi iti, moandehe onto tauna au rapapate hawehe mabuhu.