Read Napu Pampetudungia 21 Bible Online

Pampetudungia 21 - Napu bible

Pampetudungia 21

¹Roo indo, kuitami langi hai tampo au wou. Lawi langi hai tampo au nguru-nguruna, hai tahi barapi ara.

²Hai kuita wanua au malelaha, au rahanga Yerusale wou, mendaulu mai hangko i suruga, hangko i Pue Ala. Meawa mpuu wanua iti, nodo hadua toratauna towawine au rahampii makara-kara mampegia toratauna tobalilo.

³Hai kuhadi hambua wotu hangko i kadera kadatuana Pue Ala i suruga au mowotu masisimbuku, nauli, “Ide-ide paidaana Pue Ala ara hihimbela hai manusia. Pue Ala ina maida hihimbela hai ihira, hai ihira mewali taunaNa. Ia haduduaNa ina mamporangaihe hai mewali Ampunda.

⁴Ia ina moumpahi ope-ope owai mata au molelea. Barapi ina ara kapate, barapi ara au masusa laluna ba au moteria hai barapi ara au mahai. Ope-ope au hangkoia iti, liumi.”

⁵Roo indo, nauli Hadua au mohuda i kadera kadatua, “Ide-ide hinangkana ina Kuwouki. Nuukimi lolitaNgku ide, lawi batena tou hai ina tepabukei mpuu.”

⁶Hangko indo, Nauliangaa mbulina, “Hopomi! Ikomi, Alpa hai Omega, Au pepongkana hai Au Kahopoana. Tauna au mangkadou, Kuweihe owai hangko i ulu owai au mopaara katuwo maroa au bara mokahopoa. Owai iti Kuwei mberohe, bara raholo.

⁷Hema au monangi Datu Tokadake, molambihe ope-ope iti. Ina mewaliNa Pue au rapenombai, hai ihira ina mewali anaNgku.

⁸Agaiana tauna au langahe i hangka ranganda pane barahe meula Iriko, tauna au barahe mepoinalai Iriko, tauna au kadake babehianda, topepapate, topobabehi au merikai, topedoti, topenomba i anitu, hai topodongko, batenda rahuku i lalu tahi api au lolaa hai mawaa. Itimi au rahanga kapate karombelana.”

⁹Roo indo, maimi hadua hangko i malaeka au pitu au mokingki pambolia au buke hai pitu pakana pepopeahi-ahi au kahopoana. Nauli malaeka iti iriko, “Maiko, kutudungiako towawine au ina rabua hai Ana Dimba.”

¹⁰Nakuasaina Inao Malelaha, hai naantina malaeka iti lao i wowo bulu au mapangka. Hangko inditi, natudungiana hambua wanua au malelaha, iami Yerusale. Wanua iti mendaulu mai hangko i suruga, hangko i Pue Ala.

¹¹Wanua iti mewangka anti peawana Pue Ala. Mengkila-ngkila nodo paramata au masuli hai nodo watu yaspis. Malino nodo watu au meninto.

¹²Wanua iti natoleliki bente au mapangka hai maroho. I bente iti, ara hampulo hai rombua babaka. Hambua-hambua babaka nakampai hadua malaeka. Hai i hambua-hambua babaka iti, teuki hambua hanga hangko i hampulo hai rontinana Isaraeli,

¹³Bente iti, iba sulapana, hai hahasulapa talu mbuana babaka: talu ntanda i Mata alo, talu ntanda i Raa, talu ntanda i Lau, hai talu ntanda i Katampua alo.

¹⁴Bente wanua iti raaro i wongko watu au hampulo hai roogu, hai i haogu-haogu watu iti, teuki hanganda hadua surona Ana Dimba au hampulo hai rodua.

¹⁵Malaeka au mololita iriko iti, mokingki hambua lai popehoka au rababehi hangko i bulawa. Wanua iti nahoka, nodo wori bentena hai babakana.

¹⁶Boea iti iba sulapana. Kangkalangana hai kapekana himbela. Malaeka iti mohoka wanua iti hai lai popehokana: kangkalangana ba arato pae rosabu hai iba atuna kilo.[34] Kapekana hai kapangkana himbela hai kangkalangana.

¹⁷Bente wanua iti nahoka wori: kapangkana[35] ba arato pae ini pulona mete[36]. Popehoka au napake malaeka iti himbela hai popehoka au napake manusia.

¹⁸Bente iti rababehi hangko i watu au masuli, hangana watu yaspis. Boea iti rababehi hangko i bulawa ntepuu au mengkila nodo kaca.

¹⁹Pohudaa bente wanua iti, rawoli hampulo hai rompaka watu au makara hai au montani-ntani. Au kaisa iami watu au meninto hai maalusu, hangana watu yaspis. Au kadua iami watu au meninto hai malewau ntepuu nodo tahi au lene, hangana watu nilam. Au katalu iami watu au bula hai mengkila, hangana watu mirah. Au kaiba iami watu au malewau nodo tawe, hangana watu samrud.

²⁰Au kalima iami watu au bula mogalo hai malei malelentoro, hangana watu unam. Au kaini iami watu au malei maeta-eta, hangana watu sardis. Au kapitu iami watu au meningki hai mabada nodo bulawa, hangana watu ratna cempaka. Au kaualu iami watu au malewau nodo tulu tadasi timboko, hangana watu pirus. Au kahahio iami watu au mabada ntepuu, hangana watu krisolit. Au kahampulo iami watu au malewau nodo loka au bara mani mangka, hangana watu krisopras. Au kahampulo hai isa iami watu au malewau nodo langi, hangana watu lasuardi. Hai au kahampulo hai dua iami watu au meninto hai malentoro, hangana watu kecubung.

²¹Babaka au hampulo hai rombua iti, ope-ope rababehi hangko i watu au maluha, hangana mutiara. Ogu-oguna babaka rababehi hangko i haogu mutiara au mahile. Rara i wanua iti rababehi hangko i bulawa ntepuu au mengkila-ngkila nodo kaca.

²²I lalu wanua iti bara huba hambua sou penombaa au kuita, lawi au raimba sou penombaa i wanua iti iami Pue, Pue Ala Au Makuasa, hai Ana Dimba iti.

²³Wanua iti bara paraluu nasimbaki alo ba wula, lawi peawana Pue Ala mopamabaa wanua iti, hai Ana Dimba mewali nodo hulo wanua.

²⁴Hai humalele tauna i dunia molumao i lalu kamabaana, hai datu-datu i dunia moantihe peawanda mesua i lalu wanua iti.

²⁵Baba bente wanua iti tebungkahi liliu, barapi ina tetuko, lawi kaindi barapi ara.

²⁶Ope-ope tauna ina moantihe peawanda mesua i lalu wanua iti.

²⁷Agaiana apa au merikai bara mpuu peisa mesua i lalu. Mewali, tauna au mobabehi dake ba au modongko, barahe peisa mesua. Au peisa mesua, batena pea tauna au teuki hanganda i lalu Surana Ana Dimba, sura poukia hanganda tauna au molambi katuwo maroa au bara mokahopoa.