Read Napu Pampetudungia 22 Bible Online

Pampetudungia 22 - Napu bible

Pampetudungia 22

¹Natudungia worina malaeka iti hambua owai au malino nodo watu au meninto; owai iti mopaara katuwo. Uluna mesuwu hangko i kadera kadatuana Pue Ala hai Ana Dimba,

²hai moili i olo rara i tanga wanua iti. I pontimali wiwi owai iti, ara kau au rahanga Kau Ngkatuwo.[37] Kau iti mowua hampulo hai rombela i lalu hampare, wula-wulana mowua. Tawena rapopakuli bona mopakaoha tauna i humalele dunia.[38]

³I lalu wanua iti barapi ara au Napaharara Pue lawi kadera kadatuana Pue Ala hai Ana Dimba ara i lalu wanua iti. Hai hawiNa menombahe Iria

⁴hai raita lindoNa. Hangana Pue Ala teuki i wingkenda.

⁵Barapi ara kaindi, hai ampu boea iti barapohe moparaluu hulo ba pesimbaki alo, lawi pewangkana Pue Ala au ina mosimbakihe. Hai ina moparentahe nodo datu hawe i hae-haena.

⁶Roo indo, nauliangaana malaeka iti, “Ope-ope lolita ide tou hai ina tepabukei. Pue Ala au mowei InaoNa i ope-ope nabiNa, Ia au motudu malaekaNa mai mampopaisa i hawiNahe apa au hangangaa holiga mewali.”

⁷Nauli Pue Yesu, “Barapi mahae ina hawemoNa! Morasihe tauna au mampeulai ope-ope paturo au teuki i lalu sura ide.”

⁸Iko, Yohane, ikomi au mohadi hai moita mata ope-ope au napetudungia malaeka iti. Kakuhadina hai kakuitana iti, molingkudumona motumpa i lindona, menomba iria.

⁹Agaiana nakontona, nauli, “Inee! Ineeko menomba iriko. Batena pea Pue Ala au hintoto nupenombai. Lawi ide iko, hawina pea worina Pue Ala himbela hai oio hai hangka nabimu hai ope-ope tauna au mampeulai apa au teuki i lalu sura ide.”

¹⁰Hai nauliangaa mbulina, “Inee nuwuniangi apa au teuki i lalu sura ide, barapi mahae ope-ope ina mewali haha.

¹¹Lawi ane hawemi tempo iti: Tauna au kadake, pogiangaamide mobabehi au kadake. Tauna au madosa, pogiangaamide madosa. Tauna au manoto, pogiangaamide mobabehi au manoto. Tauna au malelaha, pogiangaamide mobabehi au malelaha.”

¹²Nauli Pue Yesu, “Barapi mahae ina hawemoNa, hai ina Kuhurungi babehianda ope-ope tauna hintoto hai apa au rababehi.

¹³Ikomi Alpa hai Omega, Au Nguru-nguruna hai Au Kahopoana. Pepongkana hai Kaopeana.

¹⁴Morasihe tauna au mobahoi hampinda hawe maitu[39], lawi ihira au ina rapaliu maande wua Kau Ngkatuwo. Ihira au peisa moliu i babaka mesua i lalu wanua iti.

¹⁵Agaiana tauna au kadake, topedoti, topobabehi au merikai, topepapate, topenomba i anitu, topodongko, hai tauna au mampokatana podongkonda, barahe rapaliu mesua i lalu wanua iti.

¹⁶Iko, Yesu, motudumoNa malaekaNgku mopahawe paturoNgku ide irikamu ope-ope jumaa. Iko pemuleanana Datu Daudi. Ikomi Betue ntanda i Mata alo au mewangka ntepuu.”

¹⁷Inao Malelaha hai towawine au rataunaa Ana Dimba manguli, “MaimoKo!” Hai ope-ope tauna au mohadi lolita ide, hangangaa manguli worihe, “MaimoKo!” Hema au mangkadou, maimokau! Ane niunde, maimokau maenu owai au mopaara katuwo. Hai bara niholo!

¹⁸I ope-ope tauna au mampehadingi apa au teuki i lalu sura ide, kupopaingaa: hema au motambai hampaka lolita i sura ide, Pue Ala ina motambai wori pehukuNa i tauna iti: ina molambihe pepopeahi-ahi au teuki i lalu sura ide.

¹⁹Hai hema au mopamakura hampaka lolita hangko i sura ide, Pue Ala ina mopamakura wori kirana: barapohe peisa maande wua Kau Ngkatuwo, hai barahe peisa mesua i lalu wanua au malelaha, nodo au teuki i lalu sura ide.

²⁰Yesu mosabi kana i ope-ope lolita ide, manguli, “Tou mpuu. Barapi mahae ina hawemoNa.” Amin! MaimoKo, O Pue Yesu!

²¹Kuharunga bona Pue Yesu mowati ope-ope taunana Pue Ala!