Read Napu Pampetudungia 5 Bible Online

Pampetudungia 5 - Napu bible

Pampetudungia 5

¹Hangko indo, kuita mbuli, i taie koanana Hadua au mohuda i kadera kadatua ara sura au tewilolo. Sura iti pontimali buke hai uki, rawilolo, hai rapekatandai pitu mbuana pene dati rabungkahi.

²Kuita ara hadua malaeka au maroho au mololita masisimbuku, nauli, “Hema au hintoto hai peisa mobungkahi pene sura ide bona peisa rabasa?”

³Bara huba hadua au peisa mobungkahi sura iti hai mobasa ihina. Mogalo i suruga ba i dunia ba i lapi tampo, bara ara hadua au nabuku.

⁴Moteriana anti kawiorangku, lawi bara ara hadua au hintoto mobungkahi sura iti hai mampeita ihina.

⁵Roo indo, ara hadua hangko i totosae au rompulo hai iba au mouliangaana, “Ineeko moteria. Lawi ara mpuu au menangi! Ia rauli: Singa hangko i Yehuda[15]; Ia pemuleana Datu Daudi![16] Ia au peisa mobungkahi penena hai mobungkahi sura iti.”

⁶Roo indo, kuita i olo kadera kadatua hai pinatuwo au iba hai totosae iti, meangkami hambaa Ana Dimba.[17] Hai kuita arami lari pesambalea. TanduNa pitu mbuana, hai mataNa wori pitu. MataNa au pitu iti, lempona Inaona Pue Ala au mampopolumao pitu pakana bago hai au Natudu lao i humalele dunia.

⁷Ana Dimba iti molumao lao moala sura iti hangko i taie koanana Hadua au mohuda i kadera kadatua.

⁸KaNaalana sura iti, pinatuwo hai totosae au rompulo hai iba molingkudumohe motumpa i lindona Ana Dimba. Ope-opehe mokingki kecapi hai mangko bulawa au buke hai anu-anu mawongi au rauli dupa. Dupa iti, lempona pekakaenda taunana Pue Ala.

⁹Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.

¹⁰Nupopewalihe datu hai tadulako mpenomba au mampopolumao bago mpenomba i Amputa Pue Ala. Ina moparentahe nodo datu i wongko dunia.”

¹¹Roo indo, kuitahe malaeka au bosa, isabuna ba i jutana kabosanda, hai kuhadimi wotunda. Meangkahe motoleliki kadera kadatua hai pinatuwo hai totosae iti.

¹²Monanimohe malaeka iti masisimbuku, rauli, “Ana Dimba au rasambale, hintoto mpuu tabila hai tatoia, tapomahile hangaNa, tabambari kamarohoNa, tapolinga peawaNa, takatuinao kamapandeNa, hai tapatolele kamakuasaNa!”

¹³Hangko indo, kuhadi worimi ope-ope au ara i suruga, i dunia, i lapi tampo hai i lalu tahi; ope-ope au tuwo monanimohe node: “Hadua au mohuda i pohudaa datu hai Ana Dimba, tatoia, tabila, tapakahile peawaNda hai tabambari kuasaNda hawe i hae-haena!”

¹⁴Rahanai pinatuwo au iba iti: “Amin!” hai totosae au ara inditi motumpamohe menomba.