Read Napu Pampetudungia 6 Bible Online

Pampetudungia 6 - Napu bible

Pampetudungia 6

¹Roo indo, kuitami Ana Dimba mobungkahi pene au kaisa hangko i pitu pene iti. Kuhadi hambaa hangko i pinatuwo au iba iti mekakio masisimbuku nodo pomoni gumpata, nauli, “Maimoko!”

²Unga pea, kuita hambaa dara bula. Hai au mesawi i dara iti mokingki pana, hai rawei hambua songko, tanda penangina. Nodo hadua topenangi au lao mbuli monangi iwalina.

³Roo indo, Ana Dimba iti mobungkahi pene au karombuana, hai kuhadi pinatuwo au karombaana manguli, “Maimoko!”

⁴Hawe mbulimi dara au hambaana. Dara iti malei ntepuu. Hai au mesawi i dara iti, rawei kuasa mogero pohintuwunda tauna i dunia alana tauna i humalele dunia mombepapatehe. Rawei wori hamata piho au mahile.

⁵Ana Dimba mobungkahi mbuli pene au katalu, hai kuhadimi pinatuwo au kataluna manguli, “Maimoko!” Kuita mbulimi hambaa dara. Dara iti maeta. Au mesawi i dara iti mokingki hambua timbanga.[18]

⁶Hai liliu kuhadi nodo tauna au mololita i olonda pinatuwo au iba iti manguli, “Saro hangalo peisa pea rapopeholo pare bae hakilo, ba talu pea kilo gogoa. Agaiana lana saitun hai anggoro inee nupakarugi.”

⁷Roo iti, Ana Dimba mobungkahi pene au kaiba, hai kuhadi pinatuwo au kaiba manguli, “Maimoko!”

⁸Kuita hambaa dara au mabada-bada. Tauna au mesawi i dara iti rahanga “Kapate,” hai au meusu i bokona rahanga “Paidaa Tomate.” Ihira iti raweihe kuasa mopapate hangkira iba hangko i ope-ope tauna. Arahe au rapapate i lalu pombeala, arahe au mate laloara, arahe au mate narumpa haki, hai arahe au rapapate binata au maseke.

⁹Roo indo, kuita wori Ana Dimba iti mobungkahi pene au kalima. Kuita i woi meja pohuwea popenomba,[19] ara tanoananda tauna au rapapate anti popahawenda Ngkorana Pue Ala hai mopangaku liliuhe kaYesuna Ampunda.

¹⁰Mongangahe masisimbuku, rauli, “O Pue au makuasa, Pue au malelaha hai manoto! Hangkia mani kamahaena, hangko Nuhukurihe tauna au kadake au maida i dunia? Kiperapi bona Nuhurungi babehianda au mopapatengkai.”

¹¹Ope-ope raweihe hantau badu ngkalanga au bula. Hai nauliangaahe Pue Ala, “Nipegia hampai, lawi ara manihe rangami au hampopobago hai halalumi hampepepoinalai au ina rapapate nodo ikamu. Ane handami kabosami au rapapate, hangko Kuhurungirihe iwalimi.”

¹²Roo indo, kuita Ana Dimba iti mobungkahi pene au kaini. Unga pea kelinu rumihi, alo mewali maeta nodo buri, hai wula mewali malei nodo wahe.

¹³Betue iumba-umba pea manawo hangko i langi toa i dunia, nodo kamanawonda wuangkau ane nawui himburu kebuu.

¹⁴Langi, unga pea tewilolo nodo ale, hai ope-ope bulu hai ope-ope lewuto, telimbanga hangko i paidaanda.

¹⁵I tempo iti, datu-datu i dunia, tuana, tadulako pombeala, topebuku, tauna au makuasa, tauna biasa hawe i hawi, mentabungimohe ope-ope i lalu lia watu ba i kala watu.

¹⁶Hai mongangamohe mouliangaa bulu hai watu, “Nuuhungimongkai hai nulolingimongkai bona tetabungingkai hangko i peitana Hadua au mohuda i kadera kadatua hai tewuningkai hangko i karumpuna Ana Dimba au ina mai!”

¹⁷Lawi hawemi alo au mewulungai. Mewali i tempo iti, Pue Ala hai Ana Dimba ina mobumbuha karumpuNda, hai bara ara hadua tauna au nabuku meangka i lindoNda.