Read Napu Pampetudungia 7 Bible Online

Pampetudungia 7 - Napu bible

Pampetudungia 7

¹Hangko indo, kuitahe iba malaeka au meangka i iba huno dunia. Malaeka iti molambihe kuasa hangko i Pue Ala bona mopakarugi dunia hai pepopeahi-ahi, maroa i tahi maroa i lore. Motahahe pewui himburu hangko i iba huno dunia dati ara himburu au mewui i tahi, i lore hai i pandulu. Hai kuita hadua malaeka hawe hangko ntanda i Mata alo moanti pene au hangko i Pue Ala au tuwo. Malaeka iti mololitami masisimbuku mouliangaahe malaeka au iba inona, nauli,

³“Inee hampai nipakarugi tahi, lorena hai pandulu, ane bara mani kiwoli tanda i wingkenda taunana Pue Ala Amputa, datihe narumpa rugi iti.”

⁴Hai ara au mouliangaana kabosanda au rapekatandai: hangatu iba pulona hai iba sabuna. Au rapekatandai iti, hangko i hampulo hai rontina to Isaraeli.

⁵Hangko i hantina-hantina, hampulo hai rosabu au rapekatandai: Yehuda; Nodo wori hangko i pemuleana Rube, Gadi,

⁶Aser, Natali, Manase,

⁷Simeo, Lewi, Isakar,

⁸Sebulo, Yusupu, hawe i pemuleana Benami.

⁹Roo indo, kuita mbuli manusia au bosa ntepuu; barapi peisa raimba kabosanda. Ihira iti, hangko i humalele dunia, hangko i ope-ope kadatua, ope-ope pemulea hai hinangkana basa. Meangkahe i lindo kadera kadatua hai i lindona Ana Dimba. Mehampihe au bula, hai mokingkihe tawe handutu au raweweraka liliu tanda kamatananda.

¹⁰Monganga-ngangamohe, rauli, “Toiami Amputa Pue Ala au mohuda i kadera kadatua! Toiami Ana Dimba! Lawi Ia au mohoremake hangko i huku dosanta, hai moweike katuwo maroa.”

¹¹Kadera kadatua hai totosae au rompulo hai iba, hihimbela hai pinatuwo au iba, ratoleliki ope-ope malaeka. Motumpamohe ope-ope i lindo kadera iti, hai menombahe i Pue Ala,

¹²rauli, “Amin! Tatoiami Amputa Pue Ala, Tapomahile hangaNa, Taadai kamapandeNa, Tauli ngkaia kamaroana Iria, Tabila Pue Ala, Tabambari kamarohoNa, Takatuinao kamakuasaNa, hawe i hae-haena! Amin.”

¹³Roo indo, hadua hangko i totosae iti mekune iriko, nauli, “Arahe nuisa tauna au mebadu bula ngkalanga iti? Ba nuisa kahangko iumbanda?”

¹⁴Kuhanai: “Barahe kuisa, ampu. Nuuliangaa wongkoia.” Nauliangaana: “Ihira iti, tauna au mamporaraimohe au rauli Tempo Pepopeahi-ahi au Rumihi Ntepuu. Hampinda rabahoi hai wahena Ana Dimba bona mewali bula.

¹⁵Ido hai meangkahe i lindo kadera kadatuana Pue Ala, hai menombahe alo-alona hai wengi-wengina i lalu Souna Pue Ala. Hai Pue Ala au mohuda i kadera kadatuaNa ina mokampaihe.

¹⁶Barapohe marimi, barapohe mangkadou, hai barapohe nasimbaki alo au makere,

¹⁷lawi Ana Dimba au meangka i hola kadera kadatua mokadipurahe. Naninihe lao i owai au mopaara katuwo. Hai Pue Ala moumpahi hinangka owai mata hangko i matanda.”