Read Naro Lk 1 Bible Online

Lk 1 - Naro bible

Lk 1

¹Káí ne khóè nea xg'ao xg'aekua ta koe xg'ao ko kúrúse zi gúù zi bóò a góá.

²Khóè ne ncẽe tshoa-tshoas ka kò gane tcgáí ka ncẽe zi gúù zi bóòa ne, a ne a kò hàà Nqarim dim kg'uim di ne xgaa-xgaa-kg'ao ne ii nea ncẽe zi gúù zi máà taa hãa.

³Tíí igabar kò wèé zi gúù zi tshoa-tshoas koe qãèse tẽèa xám̀, i ncẽeska qãèa máá tea, ẽe zi ma kúrúsea xùrikua hãas kar ga góá máá tsi sa, tsáá Teofila tsi tcom-tcomsa tsi,

⁴nxãasega tsi gha wèé tseeguan ncẽe tsi xgaa-xgaaèa ka q'ãa ka.

⁵I kúrúse Herotem xg'ao x'aigam Jutea di ba ii x'aè ka, me kò Sakaria ta ko ma tciièm peresiti ba hàna, Abiam dis xg'aes di xu peresiti xu di ba. Gam dis khóès Elisabete sa kò kaiam peresitim Aronem dis qhàò si i.

⁶Sakaria khara Elisabetea khara kò Nqarim cookg'ai koe tchàno khara khóè khara a, a wèé x'áè-kg'áḿan X'aigam Nqarim di ko kúrú, a chìbi úú tama.

⁷Elisabete sa kò ábà tamas khóè si i khama khara kò káà cóá khara a. A kò gataga wèéa khara ga gàeasea hãa.

⁸I kúrúse me x'aè ba hàà Sakariam dis xg'aes di xu gha tempelem koe síí tséé di ba, me kò Sakaria ba síí peresitim di tsééan Nqarim cookg'ai koe kúrú.

⁹Peresiti xu di cauan ka xu xg'ao ko cúím khóè ba nxárá tcg'òó, tempelem q'oo koe gha tcãà a qãè hm̀m̀ xg'ãò gúùan Nqari ba dàòa máá ba. Gaam cáḿ kam kò Sakaria ba nxárá tcg'òóè.

¹⁰Eẽm tempelem q'oo koe hãa a ko qãè hm̀m̀ xg'ãò gúùan Nqari ba dàòa máá ka ne kò wèé ne khóè ne tempelem ka tchàa koe hãa a ko còrè.

¹¹Me moengelem Nqarim di ba qhúí-kg'ai me, a ba a kg'áòm x'õàm xòè za téé, ẽem gabá hãa a ko ẽes qãè hm̀m̀ xg'ãòs gúù sa altaram koe Nqari ba dàòa máá koe.

¹²Eẽm ko Sakaria ba moengele ba bóò kam kò q'ae a q'áòs ka tcãàè.

¹³Me moengele ba bìrí me a máá: “Táá q'áò guu, Sakariaè. Còrèa tsi komsanaèa, si gha tsaris khóès Elisabete sa cóá ba ábà, tsi gha Johane ta ma tcii me ke.

¹⁴A tsi a gha kaisase qãè-tcao, i gha gataga káí khóèan gaam di ábà x'aèan ka qãè-tcao.

¹⁵X'aigam Nqarim cookg'ai koem gha tcom-tcomsam khóè ba ii, ke méém táá qgarì kana dùútsa tshàam xgóàm ga ba kg'áà guu. Eẽ ábà x'aèa ba koe gam gha guu a Tcom-tcomsam Tc'ẽem ka cg'oèa,

¹⁶a ba a gha káí ne khóè ne Iseraele di ne X'aigam gane dim Nqarim koe ka̱bi.

¹⁷Elijam di tc'ẽean hẽé naka qarian hẽéthẽé cgoam gha Nqarim cookg'ai koe kg'õè, a xõò ga xu di tcáóan cóán koe ka̱bi, a ẽe komsana tama ne di tcáóan ka̱bi tchàno ne khóè ne di tc'ẽean koe, a khóè ne X'aigam Nqari ba kg'ónòa máá,” tam méé.

¹⁸Me Sakaria ba moengele ba tẽè a máá: “Nta ra gha ma q'ãa ncẽe zi gúù zi gha kúrúse sa? Gàeasea raa, si tiris khóès igaba gàeasea hãa ka,” témé.

¹⁹Me moengele ba xo̱a me a máá: “Tíí ra Gabariele ra a, a ra a Nqarim cookg'ai koe tẽe. Gaam ga ba tséé tea, hààr gha kg'ui cgoa tsi, a qãè zi tchõà zi ncẽe zi óágara máá tsi ka.

²⁰Bóò, dtcòm̀ tama tsia domka tsi gha ncẽe koe guus ka nqooa hãa, a kg'ui tite, me gha nxãakg'aiga síí x'aè ba hàà ncẽe zi gúù zi gha hàà kúrúse ba,” tam méé.

²¹Nxãaska i ko káí khóèan tchàa koe téé-tẽe a ko Sakaria ba qãà, a area hãa, dùús domkam tempelem q'oo koe ncẽeta noose ãoa hãa sa.

²²Eẽm ko tcg'oa kam kò gane cgoa kg'uian ka tààè, ne kò bóòa q'ãa tempelem q'oo koem kò x'áí sa bóòa hãa sa. Me kò nqoo-nqoosase nxàem ko sa tshàua ba cgoa x'áí ne.

²³A ba a kò ẽe xu cáḿ xu kam ko tempelem koe tsééa xg'ara ka x'áéa ba koe ka̱bise.

²⁴Ncẽe zi gúù zi qãá q'oo koes kò gam dis khóès Elisabete sa ncãàn úú, a sa a 5 nxoean séè a nquum q'oo koe cúía hãa, khóè ne gha táá bóò si ka. Si bìríse a máá:

²⁵“X'aigam Nqari ba ncẽes gúù sa kúrúa máá tea hãa, a ba a ncẽem x'aèm ka Gam di thõò-xama-máákuan tíí koe x'áía, a ba a khóè ne koe tiri sau-cgaean cóá ner úú tama di koe tcg'òó tea hãa,” témé.

²⁶Me kò moengelem Gabariele ba 6 dim nxoem ka Galilea dim x'áé-dxoom Nasareta dim koe Nqarim ka tsééa úúè,

²⁷dxàe-coas koe, ncẽe kò Josefa ta ko ma tciièm qárí-kg'aom ka séèkuan tòóa mááèa hãa sa. Josefa ba kò Dafitem dis qhàòs dim khóè me e, i gaas dxàe-coas di cg'õèan kò Maria a.

²⁸Moengelem ko Marias koe hàà kam kò hàà tsgám̀kagu si a máá: “X'aigam Nqari ba cgóm̀ sia a sáá cgoa hàna,” témé.

²⁹Si Maria sa ẽem ko gatà méé ka kaisas q'áòs ka tcãàè, a sa a kò tẽèse dùús domkam ko gatà ma tsgám̀kagu si sa.

³⁰Me moengele ba bìrí si a máá: “Táá q'áò guu, Mariaè, Nqarim koe si cgóm̀kuan hòòa hãa ke.

³¹Bóò, ncãà si gha úú, a kg'áòm cóá ba ábà, a si a gha Jeso ta ma tcii Me.

³²Tcom-tcomsam khóè Me e gha ii, a ba a gha tc'amaka hãam Nqarim dim Cóá ba iise tciiè, Me gha X'aigam Nqari ba x'aian dis ntcõó-q'oo sa máà Me, Gam ka xõò-dxoom Dafitem khamaga ma.

³³Jakobem dis qhàòs koem gha chõò tamase x'aiga ii, si Gam dis x'ai sa cuiskaga chõò tite,” tam moengele ba méé.

³⁴Si Maria sa moengele ba bìrí a máá: “Nta i gha ii, qane cgoar kg'áò-khoe cgoa xóé tama ka?” témé.

³⁵Me moengele ba xo̱a si a máá: “Tcom-tcomsam Tc'ẽe ba gha sáá koe hàà, kaisase Tc'amaka hànam di qaria nea gha qàbi si, Me gha gaa domka Gaam ẽe gha ko ábàè ba tcom-tcomsa ii, a ba a gha Nqarim dim Cóá ba ta ma tciiè.

³⁶Bóò kg'ama, ncẽe Elisabetes koe kúrúsea sa. Wèé khóèa ne kò q'ana hãa cóás úú tite sa, a sa a ábà tamas khóè si i sa, igaba ncẽes gàeasea hãa kas kg'áòm cóá ba qóḿa hãa, i nxoea sa ncẽeska 6 i.

³⁷Cúí gúù ga káà a, Nqarim ka kúrúè tite e khama,” tam méé.

³⁸Si Maria sa xo̱a me a máá: “Ncãa ga ra a, X'aigam Nqarim dir qãà ra. Eẽ tsi ko méé khamaga méé i tíí koe ii,” tas méé. Me moengele ba guu si a qõò.

³⁹Gaa x'aè kas kò Maria xgoaba a sa a qháése c'ẽem x'áé-dxoom xàbìan dim koe síí, Juta ne di ba.

⁴⁰A sa a Sakariam x'áé koe tcãà a Elisabete sa tsgám̀kagu.

⁴¹Eẽs ko Elisabete sa kóḿs ko Maria tsgám̀ sia ts'oo kam ko cóá ba ncãàa sa q'oo koe ko̱ri, si Tcom-tcomsam Tc'ẽem ka cg'oè cgaeè,

⁴²a sa a tc'amaka kg'ui a máá: “Wèé zi khóè zi cookg'ai koe si sáá ts'ee-ts'eekg'aièa. Me gataga sarim cóá ba thẽé ts'ee-ts'eekg'aièa.

⁴³Dùútsa gúùs kaia sa ko ncẽe cáḿ ka tíí koe kúrúse, ncẽe tirim X'aigam Nqarim ka xõòs ko tíí koe hàà ka?

⁴⁴Eẽr ko kóḿ si ko ma tsgám̀ tea ts'oo sa kam ko gaa x'aè kaga cóá ba ncãàa te q'oo koe qãè-tcaoan ka ko̱ri khama.

⁴⁵Ncẽem X'aigam Nqari ba sáá cgoa kg'uia hãa zi gúù zi wèé zi gha kúrúse sa si dtcòm̀a hãa, khama si ts'ee-ts'eekg'aièa,” tas méé.

⁴⁶Si Maria sa máá: “X'aigam Nqari bar ko wèé tcáóa te cgoa kaikagu,

⁴⁷i tc'ẽea te Nqarim Kgoara-kg'aom Tirim koe qãè-tcaoan ka cg'oèa hãa,

⁴⁸Gam dis qãàs di nqãaka hãa nem bóòa hãa khama. Bóò, ncẽe koe guus ka zi gha wèé zi qhàò zi nxàe ts'ee-ts'eekg'aièar hãa sa.

⁴⁹Qarian úúa hãa ba kaisa zi gúù zi kúrúa máá tea hãa khama, i cg'õèa ba tcom-tcomsa a.

⁵⁰Gam di thõò-xama-máákua nem ko ẽe ko q'áò Me ne koe x'áí ẽe zi ko ma qhàò zi hàà khama.

⁵¹Nqari ba tshàua ba cgoa cgáé zi gúù zi kúrúa, a ba a ẽe tc'ẽega ne e, ta tcáóa ne q'oo koe tc'ẽea hãa ne khóè ne tsa̱i-tsa̱ia q'ara hãa.

⁵²Kaia x'aiga nem gaan di ntcõó-q'ooan x'aian di koe guu a xòoa hãa, a ẽe nqãaka hàna khóèan ghùia hãa.

⁵³Xàbàa khóèa nem xg'ãàkagua hãa qãè zi gúù zi cgoa, a ba a ẽe qguùa hãa khóèan káà gúù tshàu-q'oose tcg'òóa hãa.

⁵⁴Gam dim qãàm Iseraele bam hùia, thõò-xama-máákuan Gam dim ko tc'ẽe-tc'ẽese khama.

⁵⁵Ncẽem ma gatá ka xõò ga ne nqòòkagua hãa khama, Abrahamam ka hẽé naka qhàòa ba ka hẽéthẽé e, chõò tamase,” tas Maria méé.

⁵⁶Si kò Maria sa nqoana khama noo nxoean Elisabetes cgoa síí hãa, a sa a nxãwa ka̱bise a x'áéa sa koe dìbi.

⁵⁷Me kò Elisabetes gha ábàm x'aè ba hàà, si kò kg'áòm cóá ba ábà.

⁵⁸Ne kò cúùse x'ãèa ne khóè ne hẽé naka gas di qhàòan hẽéthẽé kóḿ X'aigam Nqarim ma kaisase thõò-xama máá sia hãa sa, a ne a kò gas cgoa qãè-tcao.

⁵⁹A ne a 8 cáḿa nem cóá ba úúa ka hàà, hàà ne gha q'ãe nqãa-qgai khòo me ka, a ne a Sakaria ta ma tcii me kg'oana, xõòm cg'õè cgoa.

⁶⁰Si gam ka xõò sa xo̱a a máá: “Eẽ ẽe, Johane tam gha ma tciiè,” témé.

⁶¹Ne khóè ne bìrí si a máá: “Eẽta xam̀s cg'õès kò qhàòa si di ne koe káà si i ná,” témé.

⁶²Ne tshàua ne cgoa sere-sere a xõò ba tẽè, ntam ko cóám di cg'õèan ka méé sa.

⁶³Me góám gha gúùan tca̱ba dtcàrà, a góá a máá: “Cg'õèa ba Johane e,” témé. Ne wèéa ne are.

⁶⁴Me kò gaa x'aè kaga Sakaria gaicara tshoa-tshoa a kg'ui, a Nqari ba dqo̱m̀.

⁶⁵Ne kò ẽem qgáìm di ne khóè ne wèé ne q'áòs ka tcãàè, ne kò Jutea di xu xàbì xu wèé xu di ne khóè ne ncẽe ko kúrúse zi gúù zi wèé zi ka kg'ui.

⁶⁶Ne kò wèé ne ẽe kò kóḿ ne are a tẽèse a máá: “Dùútsa cóá ba gáé ncẽe ba?” témé. X'aigam Nqarim dim tshàu ba kò hãa cgoa mea khama.

⁶⁷Me kò cóám ka xõòm Sakaria ba Tcom-tcomsam Tc'ẽem ka cg'oè cgaeè, a ba a porofita a máá:

⁶⁸“Dqo̱m̀mè méém X'aigam Nqarim Iseraele di ba, Gam di ne khóè ne koem hààraa a ba a ko hàà kgoara ne ke.

⁶⁹Kgoarakuan dim nxãà bam tc'amaka ghùia máá ta a hãa. Gam dim qãàm Dafitem di ne qhàò ne koe.

⁷⁰Ncẽem ko ma ncìísega Gam di xu porofiti xu tcom-tcomsa xu koe ma kg'uia hãa khama,

⁷¹a ba a ko máá, hààm gha gatá di ne cg'õo-kg'ao ne koe hẽé naka wèé ne ẽe hòre taa ne di tshàu-q'ooan koe hẽéthẽé kgoara ta a.

⁷²Ncẽem dàòm kam ko Nqari ba gatá di xõòan koe thõò-xama-máákuan x'áí, ncẽem kò nqòòkagu nea hãa a, naka Gam dis qáé-xg'aes tcom-tcomsa sa tc'ẽe-tc'ẽesean hẽéthẽé e,

⁷³gaìses ncẽem gatá ka xõòm Abrahamam koe gaìsea sa,

⁷⁴gatá di ne cg'õo-kg'ao ne koem gha tcg'òó ta a ka, ta gha nxãasega q'áò tamase hẽé, tcom-tcomsase hẽé naka tchànose hẽéthẽé cookg'aia ba koe tsééa máá Me, wèé kg'õèa ta q'oo koe.

⁷⁵

⁷⁶Tsáá tiri tsi cóá tsi, X'aigam Nqarim ncẽem tc'amaka hànam di tsi porofiti tsi iise tsi gha tciiè, Nqarim cookg'ai koe tsi gha qõò, a tsi a gha hààm gha xu dàò xu kg'ónòa máá Me.

⁷⁷Gam di ne khóè ne tsi gha bìrí nta ne gha ma q'ãan di tc'ẽean di kgoarasean hòò sa, gane di chìbian di qgóóa-máákuan koe guu a.

⁷⁸Gatá dim Nqari ba ko tcáóa ba q'oo koe thõòan xám̀, gaa domkam gha cáḿs ko tcg'oa xòè koe guuam x'áàm ncẽe tc'amaka guuam cgoa x'áà-x'aa ta a.

⁷⁹Wèém khóèm ẽe ntcùús q'oo koe hẽé naka x'ooan di sóm̀an koe hẽéthẽé hànam koem gha x'áà ba óága, a ba a gha dàòa ta tchàno-tchano tòókuan dim dàòm koe,” tam méé.

⁸⁰Me kò cóá ba kai a tc'ẽean koe qari, a ba a kò tchàa-xgóós koe hàna, me síí hààm gha Iseraele di ne khóè ne cookg'ai koe x'áísem x'aè ba hàà.