Read Naro Heb 1 Bible Online

Heb 1 - Naro bible

Heb 1

¹Ncìí kuri kam kò Nqari ba káí xu dàò xu tãáka xu cgoa porofiti xu tséékagu a gatá ka tsgõose ga xu cgoa kg'ui,

²igabagam ncẽeska còo di x'aèan ka ko Gam dim Cóám koe guu a kg'ui cgoa ta a. Gaam ncẽem kò Gam koe guu a nqõó ba kúrú, a wèé zi gúù zi dim q'õò-kg'ao ba kúrú Me ba.

³Nqarim di x'áà-q'ooa nem ko x'áí, a wèé za ga Nqarim khama ii, a ba a ko wèé zi gúù zi Gam dim kg'uim di qarian ka qgóó. Eẽm ko gatá di chìbian koe q'ano-q'anokuan kúrúa xg'ara kam kò tc'amaka hãam Qarim wèém dim x'õàm kg'áòm xòè koe síí ntcõó.

⁴Ncẽes ma Gam dis cg'õè sa ma moengele xu di cg'õèan ka tc'amaka hãa khamagam gaxu dis téé-q'oos ka tc'amaka hãas téé-q'oo sa máàèa.

⁵Gatagam Nqari ba qanega c'ẽem moengele ba bìrí naka máá: “Tsáá tsia Tiri tsi cóá tsi i, Ra ncẽem cáḿ koe guu a tsarir Xõò Ra a,” témé ta ga hãa, kanam Nqari ba qanega c'ẽem moengele ba bìrí na máá: “gam ka Xõò bar gha ii, me gha Tirim cóá ba ii,” témé ta ga hãa khama.

⁶Igabagam kò Nqari ba ẽem ko Gam dim Cóám tc'ãà di ba nqõóm koe tsééa óá ka máá: “Wèé moengelean Nqarim di méé i dqo̱m̀ Me,” témé.

⁷Moengele xu kam kòo kg'ui nem ko máá: “Nqari ba ko Gam di xu moengele xu kúrú xu tc'ãán khama ii, a Gam di xu tséé-kg'ao xu kúrú xu c'eean di ka̱ru ta̱man khama ii,” témé,

⁸igabam kòo Cóám ka kg'ui nem ko máá: “Nqari Tseè, Tsaris ntcõó-q'oos x'aian di sa gha chõò tamase hãa. Tsari ne khóè ne Tsi ko tchànom dxòm cgoa tc'ãà-cookg'ai.

⁹Eẽ tchàno ii sa Tsi ncàm̀a hãa, a ẽe cg'ãè ii sa hòrea. Gaa domkam Tsarim Nqari ba, Nqari Tseè, Tsáá ka c'ẽe xu nqáéa hãase nxárá tcg'òó Tsia, a qãè-tcaoan di nxúìan cgoa ntcã̱á tcúú Tsia hãa,” témé.

¹⁰A ba a ko máá: “X'aigaè, Tsáá Tsia tshoa-tshoases koe nqõó ba kúrúa hãa, i nqarikg'aian Tsari tshàuan di tséé e;

¹¹kaàku i gha, igabaga Tsi gha Tsáá chõò tamase hãa. Wèéan ga gha qgáían khama ma cg'ãa-cg'anase,

¹²hã̱aèkom qgáím khama Tsi gha ma kabèa xg'ae e, i gha qgáían ko ma hã̱aè a tcg'òóè i c'ẽean hã̱aè khamaga ma ka̱bi-ka̱biè, igabaga Tsi gha Tsáá ẽe Tsi ii khama cúíga ii, i kuria Tsi chõò tite,” tam méé.

¹³Qanegam Nqari ba c'ẽem moengelem kaga máá: “Ncẽe koe ntcõó Tirim x'õàm kg'áòm xòè koe, nakar gha nxãakg'aiga síí tsari cg'õo-kg'aoan kúrú naka i nqàrè-kg'ama tsi dis ntcõó-q'oos koe ntcõó,” témé ta ga hãa.

¹⁴Kháé i nxãaska moengelean dùúa? Kg'amaga xu Nqari ba ko tsééa máá xu tc'ẽe xu u, ncẽe Gam ka tsééa óáèa hãa xu, hàà xu gha khóèan hùi i kgoarasean hòò ka.