Read Naro Heb 3 Bible Online

Heb 3 - Naro bible

Heb 3

¹Gaa domka méé tu, tíí qõe ga tu tcom-tcomsa tuè, ncẽe nqarikg'ai di tciikuan koe hãa tuè, Jesom ka tc'ẽe. Jesom ncẽe kò Nqarim ka tsééa tcg'òóèa hãa ba, a Kaiam Peresiti ba ii ba, ncẽe ta ko Gam ka gatá di dtcòm̀an nxàea tseegukagu ba.

²Gaam ẽe kò nxárá tcg'òó Mea hãam koem kò tcom-tcomsa Me e, ẽem kò ma Moshe ba ma Nqarim dim nquum wèém koe ma tcom-tcomsa me e khamaga ma.

³Wèém nquu ba khóèan ka tshàoèa hãa, Me Nqari ba wèés gúù sa tshàoa hãa. Me ẽem ma nquum dim tshào-kg'ao ba ma nquum ka kaisa tcomkuan hòòa hãa khamagam Jeso ba Moshe ba nqáéa hãase tcomkuan hòòa hãa.

⁵Moshe ba kò tséé-kg'ao me e, a kò Nqarim dim nquum wèém koe tcom-tcomsa me e, a ba a kò gam di zi tséé zi cgoa Nqarim ka gha hàà kg'uiè zi gúù zi ka nxàea tseegukagu.

⁶Igabagam Kreste ba Nqarim dim nquum koe Gam dim Cóám iise tcom-tcomsa Me e. Ta gatá Gam di ta nquu ta a, ncẽè Nqarim koe tcoman hẽé naka nqòòs ẽe ta ko gaas cgoa bóòses koe hẽéthẽé ta kò qgóóa qaria hãa ne.

⁷Gaa domka méé tu ẽem ko Tcom-tcomsam Tc'ẽe ba méé a ko máá: “Ncẽe cáḿ ka ẽe tu kòo dòm̀a ba kóḿ

⁸ne méé tu táá qari-qari tcáó guu, ẽe komsanan úú tama ne kò hẽé khama, ẽe ne kòo tchàa-xgóós koe kúrúa bóòè ka.

⁹Ncẽe gatu ka tsgõose ga xu kòo kúrúa bóò Te koe, a kò 40 kurian séè a Tiri tsééan bóò.

¹⁰Ra kò gaa domka ẽes qhàò sa xgóà cgaea hãa, a Ra a kò máá: ‘Gane di tcáóa ne ko wèé x'aè ka ho̱àkaguè, ne Tiri x'áè-kg'áḿan komsana tama,’ témé.

¹¹A Ra a kò gaa domka Tiri xgóàn koe gaìse a máá: ‘Cuiskaga ne Tiris sãakaguku-q'oos koe tcana hãa tite,’ témé.”

¹²Q'ana méé tu hãa, tíí qõe ga tuè, naka i cúía tu ga táá cg'ãè, a dtcòm̀ úú tamas tcáó sa úúa hãa guu, ncẽe gha kúrú tu u tu kg'õèa hãam Nqarim koe tcg'oa sa.

¹³Igaba méé tu wèé cáḿ ka korèku, ‘ncẽem cáḿ ba’ ta i kò ko mééès noose, naka i gha nxãasega táá c'ẽe-kg'áía tu ga cg'ãèan ka ho̱àkaguè naka qari-qari-tcúúè guu.

¹⁴Ncẽè Nqarim koe ta kò ko qarika tcom, ncẽe ta kò ko kg'aia hẽé khama a síí chõò-q'oos koe tcãà ne ta gha Krestem koe xg'aea hãa.

¹⁵Ncẽe i ma Nqarim dis Tcgãyas koe ma góásea hãa khama a ko máá: “Ncẽem cáḿ ka tu kòo Nqarim di dòm̀an kóḿ ne méé tu táá gatu ka tsgõose ga xu Nqari ba kò komsana tama xu khama ma qari-qari tcáó guu,” témé.

¹⁶Kháé dìí ga nea ẽe kò dòm̀a ba kóḿa hãa igaba kò táá komsana Me ne? Gane ẽe kò Egepeto koe guu a tcg'oara hãa ne tama ne gáé kò ii, wèéa ne ncẽe kò Moshem ka tc'ãà-cookg'aièa hãa ne?

¹⁷Kháé ba kò Nqari ba dìín 40 kurian xgóà cgaea hãa? Gane ẽe kò cg'ãèan kúrúa hãa ne tama nea gáé kò ii, ncẽe i kò gane di tc'áróan tchàa-xgóós koe x'óóku ne?

¹⁸Kháé ba kò dìí ga ne koe gaìse, ncẽem kò bìrí ne a máá, Gam dis sãàkagukus-q'oo koe ne cuiskaga tcana hãa tite témé ne? Gane ẽe komsana tama ne koe cúí ga a.

¹⁹Si kò ncẽes gúù sa x'áí ta a, dtcòm̀ úú tamas domka ne kò táá sãakagukus-q'oo koe tcãà sa.