Read Naro Heb 8 Bible Online

Heb 8 - Naro bible

Heb 8

¹Cgáés gúùs ncẽe koe xae ko nxàe sa ncẽe si i: kaiam peresiti ba ta úúa hãa, Qarim wèém dim kg'áòm x'õàm xòè dis ntcõó-q'oos x'aian dis koe nqarikg'ai koe ntcõóa-ntcõe ba,

²ncẽe kaisase tcom-tcomsam còrè-nquum koe Tséé-kg'ao ii ba, tseegu dim nquum Nqarim ka kúrúèa ba, khóèan ka tamase.

³Wèém peresitim kaia ba nxárá tcg'òóèa hãa, nxãasegam gha aba zi hẽé naka dàòa-máákuan ko kúrúè zi kg'oo-coa zi hẽéthẽé Nqarim koe úú ka. Gatà iim dàòm ka i ko qaase, gataga méém thẽé gatá dim Peresiti ba Nqarim cookg'ai koem gha úús gúù sa úúa hãa sa.

⁴Ncẽè nqõómkg'ai koem kò xg'ao hàna hãa, nem ga xg'ao peresiti tama, aba zi ko tcg'òó xu peresiti xu c'ẽe xua hàna hãa khama, Juta ne di x'áè-kg'áḿan ko gatà méé domka.

⁵Eẽ xu ko kúrú tsééan peresiti dia nqarikg'ai koe ko kúrúèan khamaga ii, a gaan di sóm̀-c'ana a. A ncẽe i kò Moshem ka ii khamaga ii. Eẽm kò xgàuèkom còrè-nquu bam gha Moshe ba kúrú dim x'aè ba hàà kam kò Nqari ba q'ãakagu me a máá: “Kúrú méé tsi nakas wèés gúù sa ẽe tsi kò xàbìm tc'amkg'ai koe x'áíèa hãas khama ii,” témé.

⁶Igabagam ncẽeska Jeso ba Nqari ba hẽé naka khóè ne hẽéthẽé xg'aeku koe téé-tẽe, a ncẽem dàòm ka ncìís qáé-xg'aes ka cgáé sa kúrúa hãa. A ba a gataga thẽé gaxu dis tséés ka cgáé sa máàèa hãa. Eẽm ko Nqari ba ka̱bas qáé-xg'ae sa kúrú, kam kò ncìís qáé-xg'aes di zi gúù zi ka cgáé zi khóè ne nqòòkagu khama.

⁷Ncẽè tc'ãà dis qáé-xg'aes kò xg'ao káà chìbi sa ii, nes ga kò xg'ao cám̀ di sa táá qaaèa hãa khama.

⁸Igabagam kò Nqari ba Gam di ne khóè ne koe chìbian hòò, a ba a kò kg'ui cgoa ne a máá: “Bóò, x'aè ba gha hàà, Iseraele di ne khóè ne hẽé naka Juta di ne khóè ne hẽéthẽé cgoar gha ka̱bas qáé-xg'ae sa kúrú ba.

⁹Si ncẽes qáé-xg'aes ka̱ba sa cuiskaga ncìís qáé-xg'aes khama iia hãa tite. Gane ka tsgõose ga xu cgoar kò kúrúa hãa sa, ẽer kò qgóó x'õà xu a tc'ãà-cookg'ai xu, a Egepeto koe tcg'òó xu ka. Qáé-xg'aes ẽer kò máà nea hãas koe ne ko tcom-tcomsa tama khama ra kò Tíí X'aiga ra táá nqábé ne.

¹⁰Igaba hààkom x'aèm kar gha Tíí X'aiga Ra Iseraele di ne khóè ne cgoa kúrús qáé-xg'aes ga si i ncẽe sa: Tc'ẽea ne q'oo koer gha Tiri x'áè-kg'áḿan tcãà, a Ra a gha tcáóa ne q'oo koe góá tòó o. Gane dim Nqari bar gha ii, ne gha Tiri ne khóè ne ii.

¹¹Me cuiskaga dìím ga ba gane xg'aeku koe tẽe naka gam ka c'ẽe ba xgaa-xgaa hãa kana bìrí mea hãa naka máá, ‘X'aiga ba méé tsi q'ana hãa’ téméa hãa tite. Wèéa ne ga gha q'ãa Tea hãa khama, cg'árém koe guu a tshoa-tshoa a síí kaiam koe chõò koe.

¹²Gane di chìbian koer gha thõò-xama máá ne, a cuiskaga gaicara gane di chìbian ka tc'ẽe-tc'ẽesea hãa tite khama,” tam méé.

¹³Eẽm ko máá, ncẽes qáé-xg'ae sa ka̱ba si i, témé kam ko Nqari ba máá, tc'ãà di sa ncìí si i, témé. Si gha gúùs ẽe ncìí a cg'ãa-cg'anasea hãa sa kháóa cgáéga kaà.