Read Naro Xgore 12 Bible Online

Xgore 12 - Naro bible

Xgore 12

¹Kaia, a are-aresas x'áí sa kò nqarikg'ai koe bóòse, ncẽe khóès kò cáḿs khama ii qgáían ha̱na sa, me kò nxoe ba nqàrèa sa ka nqãaka hàna, si kò x'aian dis cábás 12 tco̱nòan úúa sa tcúúa sa koe hàna.

²Ncãà nes kò úúa, a ábà qàe koe hãa, a ábàn di thõòan úúa, khamas kòo kg'ae.

³Si kò c'ẽes x'áí sa gaicara nqarikg'ai koe bóòse, ka bóò, nco̱àm cg'ao-dxoom kaiam 7 tcúúan hẽé naka 10 nxãàn hẽéthẽé úúa ba hàna, a kò 7 cábán x'aian di tcúúa ba koe úúa.

⁴Tsáóa ba kò nqoana zi xg'ae zi nqarikg'ai di tco̱nòan di zi koe guu a cúí sa xgàia tcg'òó, a nqõómkg'ai koe tcheèagu. Kam kò nxãaska cg'ao-dxoo ba khóès ẽe ábà kg'oanas cookg'ai koe téé, nxãasegam gha gas dim cóá ba ẽem ko ábàè kaga tóm̀ ka.

⁵Si kò kg'áòm cóá ba ábà, ncẽe ko hàà nqõóm di zi qhàò zi wèé zi qano dxòm cgoa tc'ãà-cookg'ai ba. Igabam kò gas dim cóá ba ntcàuè, a ba a Nqarim koe úúè, Gam dis ntcõó-q'oos x'aian dis koe.

⁶Si kò khóè sa bèe a qãáka qgóéa síí, Nqarim x'ãè-q'ooan kg'ónòa máá sia hãa koe, ncẽe gaa koes gha hãa, a 1,260 cáḿan xáròè koe.

⁷Si ncõo sa nqarikg'ai koe tẽe. Mikaele ba hẽé naka gam di xu moengele xu hẽéthẽéa kò cg'ao-dxoom cgoa x'ãàku. Me kò cg'ao-dxoo ba hẽé naka gam di xu moengele xu hẽéthẽé gaxu cgoa x'ãàku.

⁸Igabam kò cg'ao-dxoo ba tààè, i nxãaska x'ãè-q'ooa ba nqarikg'ai koe kaà.

⁹Me kò cg'ao-dxoo ba, cg'aom ncẽe ncìí, a dxãwa me e ta ko ma tciiè, a satana ii, a wèém nqõóm dim qàe-qaeku-kg'ao ba, nqõómkg'ai koe xaoa guuè, xu kò gam di xu moengele xu gam cgoa ga xaoa guuè.

¹⁰Ra kò nxãaska kaiam dòm̀ ba nqarikg'ai koe kóḿ, me ko máá: “Ncẽeska i Nqarim di kgoarakuan hààraa, i Gam di qarian hààraa, naka Gam di x'aian hẽé, naka qarian Gam dim nqòòkaguèa hãam Krestem di hẽéthẽé e. Gatá ka qõese ga ne dim chìbi-chibi-kg'ao ba xaoa guuèa khama, ncẽe ko gatá dim Nqarim cookg'ai koe koaba ba hẽé naka ntcùú ba hẽéthẽé chìbi-chibi ne ba.

¹¹Ghùu-coam di c'áòan cgoa hẽé naka Nqarim di kg'uian tseegukaguan ka hẽéthẽé ne tàà mea hãa; a kò gane dis kg'õè sa táá tòóa mááse, igabaga ne kò x'óóan kg'ónòsea máána hãa.

¹²Gaa domka méé tu qãè-tcao, oo nqarikg'aiè, naka gatu ẽe gaa koe x'ãèa hãa tu hẽéthẽé e! Igaba i gha cg'ãè ii gatu ka, oo nqõókg'aiè, naka tshàa-dxooan hẽéthẽé e, dxãwa ba gatu koe xoana hãa, kaisa xgóàn cgoa khama. Q'anam hãa gam di x'aèa ne xòm̀ m sa khama!” tam méé.

¹³Eẽm kò cg'ao-dxoo ba bóò, nqõómkg'ai koem xaoa xòóèa sa, kam kò kg'áòm cóá ba ábà hãas khóè sa qa̱e.

¹⁴Igabas kò khóè sa tcgàmà tsara kaias xães di tsara máàè, nxãasegas gha cg'ao ba tsã̱éa guu, a qãáka síí hãa ka, qgáìm kg'ónòas kò mááèam koe, qgáìm ncẽes kò síí hãa a x'aè ba xáròè ba, kuri tsara hẽé, naka kurim nqáè-q'oo hẽéthẽé e.

¹⁵Me kò cg'ao ba khóè sa ko xùrise tshàam di khama noo tshàan kg'áḿa ba koe guu a tcg'òó, nxãasega i gha xgàia tcg'òó si ka.

¹⁶Igabam kò nqõó ba khóè sa hùi, a ba a kg'áḿa ba xgobekg'am, a ẽem tshàam ncẽem ko cg'ao-dxoo ba kg'áḿa ba koe guu a tcg'òó ba tóm̀.

¹⁷Me cg'ao-dxoo ba khóès koe kaisase xgóà, a ba a kò tcg'oa a síí wèé cóáa sa cgoa ga ncõoan kúrú, gane ẽe ko Nqarim di x'áèan qgóóa qaria ne, a ko wèé x'aè ka Jeso ba tseegukagu ne.

¹⁸Me kò cg'ao-dxoo ba tshàa-dxooan di góḿan koe téé.