Read Naro Xgore 7 Bible Online

Xgore 7 - Naro bible

Xgore 7

¹Ncẽes gúùs qãá q'oo koer kò 4 moengele xu bóò, xu nqõóm di zi huku zi 4 zi koe tééa-tẽe, a xu a kò 4 tc'ãán nqõómkg'ai di qgóóa hãa, nxãasega i gha táá cúí tc'ãá ga nqõómkg'ai koe tc'ãá ka, kana tshàa-dxooan koe, kana wèé hìian koe ga igaba.

²A ra a kò moengelem c'ẽe ba bóò, me ko cáḿs ko tcg'oa xòè koe guu a ko hàà, a ba a tcãà-tshàus koe x'áí sa úúa, Nqarim kg'õèa hãam di sa, khóè ne koem gha x'áís khama ma tòó sa, me kò kaia hãam dòm̀ cgoa moengele xu 4 xu tcii, ncẽe ko qarian máàèa hãa xu, nqõó ba xu gha cg'õo ka, naka tshàa-dxooan hẽéthẽé e,

³a ba a ko máá: “Táá nqõó ba cg'õo guu, kana tshàa-dxooan ga, kana hìian ga igaba, naka ta gha nxãakg'aiga síí x'áí sa tòó, gatá dim Nqarim di tséé-kg'aoan còo koe,” témé.

⁴Ra kò nxãaska ẽe kò x'áí sa tòó cgaeèa ne di nxáráse-q'ooan kóḿ: 144,000 ne khóè ne e, 12 zi qhàò zi Iseraele di ne khóè ne di zi wèé zi koe guu a.

⁵12,000 ne kò Jutam dis qhàòs koe guu a x'áí sa tòó cgaeèa, ne kò 12,000 ne Rubenem dis qhàòs koe guu a x'áí sa tòó cgaeèa, naka 12,000 ne hẽé Gatem dis qhàòs koe, naka 12,000 ne hẽé Aserem dis qhàòs koe, naka 12,000 ne hẽé Nafetalim dis qhàòs koe, naka 12,000 ne hẽé Manasem dis qhàòs koe, naka 12,000 ne hẽé Simonem dis qhàòs koe, naka 12,000 ne hẽé Lefim dis qhàòs koe, naka 12,000 ne hẽé Isakarem dis qhàòs koe, naka 12,000 ne hẽé Sebulonem dis qhàòs koe, naka 12,000 ne hẽé Josefam dis qhàòs koe, naka 12,000 ne hẽéthẽé Benjamenem dis qhàòs koe, nxãa nea kò x'áí sa tòó cgaeèa.

⁹Ncẽe zi gúù zi qãá q'oo koer ko bóò, kar kò kaias xg'aes khóè ne di sa bóò, ncẽe cúí khóè kaga nxáráè tite sa, wèé zi qhàò zi koe guu a, naka wèé zi xg'ae zi koe hẽé, naka khóè ne koe hẽé, naka ta̱m xu koe hẽéthẽé e. Ne x'aian dis ntcõó-q'oos cookg'ai koe hẽé naka Ghùu-coam cookg'ai koe hẽéthẽé tééa-tẽe, a ne a q'úú qgáí-dxooan ha̱na, a hìian di nxã̱an tshàu q'ooa ne koe qgóóa.

¹⁰A ne a kò kaiam dòm̀ cgoa q'aua tcg'òó a máá: “Kgoarakua ne gatá dim Nqarim koe guua, ncẽe x'aian dis ntcõó-q'oos koe ntcõóa-ntcõe ba, naka Ghùu-coam koe hẽéthẽé e,” témé.

¹¹Xu kò wèé xu moengele xu x'aian dis ntcõó-q'oo sa hẽé naka kaia xu hẽé naka 4 kg'oo-coan kg'õèa kò hãa koe hẽéthẽé tééa nxa̱ma-nxa̱ma. Ne kò x'aian dis ntcõó-q'oos cookg'ai koe tcúúa ne cgoa qám̀se, a Nqari ba dqo̱m̀,

¹²a máá: “Amen! Dqo̱m̀kuan hẽé x'áàn hẽé q'ãan di tc'ẽean hẽé qãè-tcaoa-máákuan hẽé tcomkuan hẽé qarian hẽé naka kaian hẽéthẽé méé i chõò tamase gatá dim Nqarim di ii. Amen!” témé.

¹³Me kò kaia xu ka c'ẽe ba kg'ui cgoa te a máá: “Dìí ga nea ncẽe ne, q'úú qgáí-dxooan ha̱na ne, a ne a nda koe guua?” témé.

¹⁴Ra kò bìrí me a máá: “Kaia hãa tseè, tsáá tsi q'anaa!” témé. Me kò bìrí te a máá: “Ncẽe nea gane ẽe kaias xgàrakus koe guua hãa ne ne e. Gane di qgáí-dxooa ne ne xg'aàra hãa, a kúrú u i q'úú u Ghùu-coam di c'áòan cgoa.

¹⁵Gaa domkaga ne x'aian dis ntcõó-q'oos Nqarim dis cookg'ai koe hãa, a ko dqo̱m̀ Me, koaba ba hẽé naka ntcùú ba hẽéthẽé e, Gam dim tempelem koe hãa a, Me gha Gaam ẽe x'aian dis ntcõó-q'oos koe ntcõe ba hãa cgoa ne a gha kòre ne[4].

¹⁶Cuiskaga ne gaicara xàbà hãa tite, a cáḿa hãa tite. Cáḿ sa cuiskaga dàò ne tite, kana c'ẽe kùruan ncẽe kaisa ga igaba.

¹⁷Ghùu-coa ba gha gane dim Kòre-kg'ao ba ii khama, x'aian dis ntcõó-q'oos nqáè koe hãa ba, a ba a gha chùia úú ne kg'õèan di tshàan di tsgórèan koe, Me gha Nqari ba wèém tcgáí-tshàram gane di tcgáían di ba tchùua tcg'òó,” tam méé.