Read Navajo GENESIS 11 Bible Online

GENESIS 11 - Navajo bible

GENESIS 11

¹Áko nahasdzáán t'áá si'ą́ą́ nít'éé' bikáa'gi saad bee yádajiłti'ígíí t'ááłá'í nít'éé'.

²Áko áádóó ha'a'aahdę́ę́' joonéełgo Sháínar kéyahgi honíteel léi' bik'ízhnínáago ákwii kéédahojit'į́į́ nít'éé'.

³Áádóó áda'ahizhdoo'niid, Haa'íshą' hashtł'ish ádadiilníiłgo t'áá íiyisí dadiilt'is. Áko hashtł'ish sit'éego tsé silį́'ígíí áádóó łeejin dijé'ígíí bił adazh'niitł'in.

⁴Áko ánáádazhdoo'niid, Haa'íshą' kin haal'áago áádóó kin wót'ááh yí'áago yá bich'į' niní'áago ádadiilnííł, kót'éego yízhí ayóó át'éii bee nihi'dójíigo ádadiilnííł, áko nahasdzáán bikáa'gi doo da'níłts'ą́ą́'góó nihiidiildah da.

⁵Áko Bóhólníihii éí diné ba'áłchíní éí kin haal'áii índa kin wót'ááh yí'áii yindaash'nishígíí jidínóoł'įįł biniyé hadahojííle'.

⁶Áko Bóhólníihii ádííniid, Shoo, diné t'ááłá'í danilį́, áádóó saad t'ááłá'íígíí yee yádaałti', áko díí yaa nídiikai lá, áádóó ha'át'íhígíida deinízingo doo ch'ééh ádeidooł'įįł da lá.

⁷Haa'íshą' hatahjį' bidadiikah, áko hats'ą́ą́' hazaad ał'ąą át'éego bee yádajiłti'go doo ałk'idazh'diitįįh da dooleeł.

⁸Áko Bóhólníihii éí nahasdzáán bikáá' da'níłts'ą́ą́'góó tadzooskaigo áhoolaa, áko kin haal'áago ádajilééh yę́ę t'óó bik'izdeeskai.

⁹Áko Béíbel hoosye', háálá Bóhólníihii ákwii hazaad ał'ąą át'éego bee yádajiłti'go áhoolaa, áádóó Bóhólníihii éí nahasdzáán bikáá' da'níłts'ą́ą́'góó tadzooskaigo áhoolaa.

¹⁰Díí Shem ba'áłchíní náás da'ahílchíihii danilį́: Shem neeznádiin honááhaigo tó nahwéskaidóó naaki nááhaigo Arfáksad há yizhchį́.

¹¹Shem éí Arfáksad há yizhchį́į́dóó bik'ijį' jiináago ashdladi neeznádiin honínáánááhaígíí biyi' haye'ké índa hatsi'ké há niheezhchį́.

¹²Arfáksad jiináago tádiindóó ba'aan ashdla' honááhaigo Shíílah há yizhchį́.

¹³Arfáksad éí Shíílah há yizhchį́į́dóó bik'ijį' jiináago dį́įdi neeznádiindóó ba'aan táá' honínáánááhaígíí biyi' haye'ké índa hatsi'ké há niheezhchį́.

¹⁴Shíílah jiináago tádiin honááhaigo Ííber há yizhchį́.

¹⁵Shíílah éí Ííber há yizhchį́į́dóó bik'ijį' jiináago dį́įdi neeznádiindóó ba'aan táá' honínáánááhaígíí biyi' haye'ké índa hatsi'ké há niheezhchį́.

¹⁶Ííber jiináago tádiindóó ba'aan dį́į́' honááhaigo Pííleg há yizhchį́.

¹⁷Áko Ííber éí Pííleg há yizhchį́į́dóó bik'ijį' jiináago dį́įdi neeznádiindóó ba'aan tádiin honínáánááhaígíí biyi' haye'ké índa hatsi'ké há niheezhchį́.

¹⁸Pííleg jiináago tádiin honááhaigo Ríyu há yizhchį́.

¹⁹Áko Pííleg éí Ríyu há yizhchį́į́dóó bik'ijį' jiináago naakidi neeznádiindóó ba'aan náhást'éí honínáánááhaígíí biyi' haye'ké índa hatsi'ké há niheezhchį́.

²⁰Ríyu jiináago tádiindóó ba'aan naaki honááhaigo Síírag há yizhchį́.

²¹Ríyu éí Síírag há yizhchį́į́dóó bik'ijį' jiináago naakidi neeznádiindóó ba'aan tsosts'id honínáánááhaígíí biyi' haye'ké índa hatsi'ké há niheezhchį́.

²²Síírag jiináago tádiin honááhaigo Néíhor há yizhchį́.

²³Áko Síírag éí Néíhor há yizhchį́į́dóó bik'ijį' jiináago naakidi neeznádiin honínáánááhaígíí biyi' haye'ké índa hatsi'ké há niheezhchį́.

²⁴Néíhor jiináago naadiin náhást'éí honááhaigo Tíírah há yizhchį́.

²⁵Áádóó Néíhor éí Tíírah há yizhchį́į́dóó bik'ijį' jiináago neeznádiindóó ba'aan náhást'éíts'áadah honínáánááhaígíí biyi' haye'ké índa hatsi'ké há niheezhchį́.

²⁶Áádóó Tíírah jiináago tsosts'ídiin honááhaigo Éíbram áádóó Néíhor índa Héíran há niheezhchį́.

²⁷Díí Tíírah ba'áłchíní náás da'ahílchíihii danilį́: Tíírah éí Éíbram áádóó Néíhor índa Héíran há niheezhchį́, áko Héíran éí Lat há yizhchį́.

²⁸Kaldíya dine'é bikéyah biyi' ho'dizhchį́ yę́ęgi Er kin haal'áadi Héíran éí hazhé'é Tíírah t'áá bítséedi dadziztsą́.

²⁹Éíbram áádóó Néíhor t'áá ájíłah hwe'asdzą́ą́ hazlį́į́': Éíbram hwe'asdzą́ą́ éí Sérai wolyé, áádóó Néíhor hwe'asdzą́ą́ éí Mílkah wolyé, éí Héíran yitsi' nilį́; Héíran éí Mílkah áádóó Ískah bizhé'é jílį́į́ nít'éé'.

³⁰Nidi Sérai doo ałchíígóó ba'áłchíní doo hólǫ́ǫ da.

³¹Áko Tíírah éí haye' Éíbram índa Héíran yę́ę biye', hanálí Lat, áádóó hazháá'áád Sérai éí haye' Éíbram be'asdzą́ą́ nilį́įgo t'áá ła' bizhi'ee dashdiikai; Kaldíya dine'é bikéyahgi Er kin haal'áádóó Kéínan kéyahgóó joonéełgo t'áá Héíran kin haal'áagi jinínáago ákwii kéédahojit'į́į́ nít'éé'.

³²Áko Tíírah bíídíiską́ą́dóó naakidi neeznádiindóó ba'aan ashdla' binááhaigo Héírangi daaztsą́.