Read Navajo GENESIS 12 Bible Online

GENESIS 12 - Navajo bible

GENESIS 12

¹Áko Bóhólníihii éí Éíbram áyidííniid, Nikéyahdóó nik'éí bits'ą́ąjį' índa nizhé'é bik'éí t'áá ałtso bits'ą́ą́' dah diinééh, áádóó kéyah nił ííshją́ą́ ádeeshłíłíjį' díínééł.

²Áko dine'é ayóó át'éii ándeeshłííł, áádóó nik'ijishdlíi doo, índa nízhi' ayóó át'éego ádeeshłíi łgo ninahjį' ak'ihojidlíii nílį́į doo.

³Nik'idajidlíii éí bik'ijiinishdlíi doo; hóyée'go ná hadahadziihígíí hóyée'go bá hahasdziih doo, áádóó nahasdzáán bikáa'gi ał'ąą dine'é t'áá ałtso ninahjį' bik'ihojidlíi doo.

⁴Áko Bóhólníihii hach'į' haadzíi'ii bik'ehgo Éíbram dashdiináago Lat bił dashdiiná. Éíbram éí tsosts'idiindóó ba'aan ashdla' honááhaigo Héíran kin haal'áádóó dashdiiná.

⁵Éíbram áádóó hwe'asdzą́ą́ Sérai áádóó hatsilí biye' Lat áádóó dajist'įįdígíí índa Héíran kin haal'áagi hanaa'nil daazlį́'ígíí éí Kéínan kéyahgóó t'áá ałtso bił dashdiiná, áko Kéínan kéyahdi jinínáago

⁶Éíbram éí kéyah bii'góó Shííkem hoolyéego chéch'il sikaadgo Móreh hoolyéegi nizh'níná. Íídą́ą́' éí kéyahgi Kéínan dine'é kéédahat'į́.

⁷Áko Bóhólníihii éí Éíbram yich'į' yit'íní í'diilyaago ádííniid, Na'áłchíní náás noot'į́į́łgóó díí kéyah baa dideesh'ááł. Ákwii Bóhólníihii bich'į' náázhdi'yoołnih biniyé bikáá' náá'iiniihí ájiilaa; éí hach'į' yit'íní í'diilyaa.

⁸Áádóó dashdiináago Béthel hoolyéhídóó ha'a'aah bich'į'go dził ní'áhígi nizh'níná; ákwii haníbaal nizh'nínil; e'e'aahjígo kin sinilígíí éí Béthel hoolyé; ha'a'aahjígo kin sinilígíí éí Éí'ai hoolyé; ákwii Bóhólníihii bich'į' náázhdi'yoołnih biniyé bikáá' náá'iiniihí ánáájiidlaago Bóhólníihii bízhi' józhíigo bich'į' sozdoolzin.

⁹Áádóó Éíbram joonééł; shádi'ááh bich'į'go t'áá náás joonééł.

¹⁰Nít'éé' kéyahgi dahodííchįįd, áko Éíbram haa nízahjį'da kééhojit'į́į dooleełgo biniyé Ííjip kéyahgóó jiníná, háálá hakéyahgi t'áá íiyisí hodííchįįd.

¹¹Ííjip kéyahgi k'adę́ę jínéehgo hwe'asdzą́ą́ Sérai ábizhdííniid, Shoo, nidi'níl'į́įgo asdzání baa dzólníinii nílį́įgo shił bééhózin;

¹²éí bąą Ííjip dine'é daniiłtsą́ągo, Díí hwe'asdzą́ą́ lá, dadidooniiłgo shí dashidiyoołhééł sha'shin; ni t'éí áádandoosįįł.

¹³Áko nánooshkąąh, Hadeezhí nishłį́, shidiníigo niniiłt'aa shaa dajooba'go deesdzih.

¹⁴Áko Éíbram éí Ííjip kéyahgi jinínáago Ííjip dine'é hwe'asdzą́ą́ dayiiłtsą́ągo t'áá íiyisí bił danizhóní.

¹⁵Áko Féro yił naat'áanii danilíinii dahoołtsą́ągo, Dooládó' asdzání da léi', daaníigo Féro yił dahoolne', áko asdzání éí Féro bikin góne' yił yah adaaskai.

¹⁶Áko Sérai honiiłt'aa Féro éí dibé áádóó béégashii áádóó diné há nidaalte' índa asdzání há nidaalte' áádóó télii biką'ii índa bi'áadii índa ghą́ą́'ask'idii yee Éíbram yik'ijisdli'.

¹⁷Áko Sérai éí Éíbram be'asdzą́ągo biniinaa Bóhólníihii éí Féro áádóó bighandóó danilíinii naałniih bidziilii yee atíyiilaa.

¹⁸Áko Féro éí Éíbram hágo yidííniidgo ání, Díishą' haa shiinilaa lá? Ha'át'éegoshą' díí ne'asdzą́ą́ nilį́įgo t'áadoo bee shił hwíínílne' da?

¹⁹Ha'át'éegoshą', Shideezhí át'é, diníigo she'asdzą́ą́ dooleeł biniyé nídiiłtį́į́ nít'éé'? K'ad kǫ́ǫ́ ne'asdzą́ą́; akǫ́ǫ́ nílááh bił náát'ash.

²⁰Áko Féro hodine'é bich'į' hadzoodzíi'go Éíbram áádóó hwe'asdzą́ą́ índa jit'ínígíí yił hwééda'asnii'.