Read Navajo GENESIS 13 Bible Online

GENESIS 13 - Navajo bible

GENESIS 13

¹Áko Éíbram áádóó hwe'asdzą́ą́ áádóó hwee hólóonii t'áá ałtso índa Lat ałdó' Ííjip kéyahdóó kéyah Shádi'ááh hoolyéejį' ch'ízhníná.

²Áko Éíbram éí béégashii áádóó béésh łigaii índa óola t'áá íiyisí bee ajit'į́.

³Áádóó kéyah Shádi'ááh hoolyéédóó Béthel áádóó Éí'ai bita'gi átsé honíbaal nizhnínilíjį' níjoo'nééł.

⁴Átsé bikáá' náá'iiniihí ájiilaa yę́ęjį' níjí'náago ákwii Éíbram éí Bóhólníihii bízhi' józhíigo bich'į' sozdoolzin.

⁵Lat ałdó' Éíbram bił tázhdínéehgo hadibé áádóó halį́į́' índa haníbaal hólǫ́.

⁶Áko t'áá ła' kééhojit'į́įgo éí kéyah doo hohóóghah da; t'áá íiyisí bidziilgo dah ajooléełgo biniinaa doo t'áá ła' kééhojit'į́į le' át'ée da.

⁷Áko Éíbram bá nida'niłkaadii áádóó Lat bá nida'niłkaadii ahináádiijah. Íídą́ą́' Kéínan dine'é índa Píírez dine'é éí kéyahgi kéédahat'į́į́ nít'éé'.

⁸Áko Éíbram éí Lat áyidííniid, Haa'íshą' t'áadoo ahináádiiltłi' í doo, áádóó nihá nida'niłkaadii ałdó' t'áadoo ahináádiijahí doo, háálá ałk'isóó daniidlį́.

⁹Níléígóó díní'į́į́', jó, kéyah adahwiis'á. T'áá shǫǫdí shits'ánínééh; nish'náajigo dah dinináago shí nishtł'ajigo dah dideesh'nééł; éí doodaléi' ni nishtł'ajigo dah dinináago shí nish'náajigo dah dideesh'nééł.

¹⁰Áko Lat nidzizghalgo Jórdan tooh binaagóó honíteelgi t'áá át'é tó bee áda'azįįdgo dziiłtsą́; Bóhólníihii t'ah doo Sádam índa Gomárah ííłdįįhdą́ą́' Bóhólníihii bidá'ák'eh honoolnin áádóó ałdó' Zó'er hoolyéii bich'ijígo kéyahígíí Ííjip kéyah honoolnin.

¹¹Áko Lat éí Jórdan tooh bich'ijígo honíteelígíí ádeideet'ą́, áádóó Lat éí ha'a'aahjigo dashdiiná; kót'éego ałts'ázhníná.

¹²Éíbram éí kéyah Kéínan hoolyéhígi kééhojit'į́; Lat éí honíteelgi kin hadaas'áágóó tázhdínééh, áádóó Sádam kin haal'áagi haníbaal nizhní'ą́.

¹³Nidi Sádam dine'é t'áá íiyisí doo yá'ádaashxǫ́ǫ da; Bóhólníihii yich'į' t'áá íiyisí ádił da'ílzííh.

¹⁴Áko Éíbram éí Lat hats'ánínáádóó bik'ijį' Bóhólníihii áhodííniid, Náhookǫsjigo áádóó shádi'áahjigo áádóó ha'a'aahjigo índa e'e'aahjigo díní'į́į́'.

¹⁵Kéyah t'áá át'é yíní'ínígíí éí naa dideesh'ááł; na'áłchíní náás da'ahílchíihii ałdó' hool'áágóó daabíí' dooleeł.

¹⁶Áko na'áłchíní náás da'ahílchíihii łeezhígi ánéelą́ą'go ádeeshłííł, áko diné ła'da łeezh yiyííłta'go na'áłchíní náás da'ahílchíihii ałdó' yízhdóołtah.

¹⁷Dah diinááh; kéyah náásee índa naaniigo hadiinááh, háálá díí kéyah naa dideesh'ááł.

¹⁸Áko Éíbram honíbaal nizh'diinilgo dashdiiná; Hííbran honíteel Mámre wolyéhígíí bichéch'il naazkaadígi nizhnínáago ákwii Bóhólníihii bich'į' náázhdi'yołnih biniyé bikáá' náá'iiniihí ánáájiidlaa.