Read Navajo GENESIS 16 Bible Online

GENESIS 16 - Navajo bible

GENESIS 16

¹Áko Éíbram hwe'asdzą́ą́ Sérai doo ałchíi da; éí Ííjip kéyahdę́ę́' asdzání ła' Héígar wolyéego há naal'a'í nilį́.

²Áko Sérai éí Éíbram áyidííniid, Shoo, Bóhólníihii doo ashchį́į́góó áshósin; t'áá shǫǫdí asdzání shá naal'a'ígíí bił ałt'ani'aash, áko daats'í sha'áłchíní hodooleeł. Áko Éíbram éí Sérai bizaad k'eh ádziidzaa.

³Áádóó Éíbram éí Kéínan kéyah biyi' kééhojit'į́įgo neeznáá nááhaidóó bik'ijį' Éíbram be'asdzą́ą́ Sérai éí Ííjip kéyahdę́ę́' asdzání há naal'a'í Héígar éí hahastiin baazhníłtį́, be'asdzą́ą́ nilį́į doo biniyé.

⁴Áko Héígar baazhníyá, áádóó Héígar i'niiltsąąd, áko izh'niiltsąądgo hazhdeel'į́į'go bá nijil'a'í doo hoł yílįįd da.

⁵Áko Sérai éí Éíbram áyidííniid, Shich'į' nahwii'nánígíí bá ninádíítłish. Shinaal'a'í naa níłtį́, áko i'niiltsąądgo ha'ádeel'į́į'go doo bił nishłį́į da sélį́į́'. Bóhólníihii nihaa nídóot'įįł.

⁶Nidi Éíbram éí Sérai áyidííniid, Ninaal'a'í bee nóhólnííh, jó'akon; t'áá ni nínízinígi áhodíílííł. Áko Sérai atíháł'į́įgo bits'ą́ą́' yóó'ajoolwod.

⁷Áko Bóhólníihii bidiyingo naal'a'í halgaidi tó háálínídi nijigháahgo hak'íníyá; Shur hoolyéégóó atiin bíighahgi áhoolyé.

⁸Áko áhodííniid, Héígar nílíinii, Sérai bá naal'a'í, háádę́ę'shą' naniná? Háágóoshą' díníyá? Áko ázhdííniid, Sérai shinanit'a'í bits'ą́ą́' yóó'eeshwod.

⁹Áko Bóhólníihii bidiyingo naal'a'í áhodííniid, Ninanit'a'í bich'į' nídídááh; bá ninááníl'a' doo.

¹⁰Áádóó Bóhólníihii bidiyingo naal'a'í ánááhodoo'niid, Na'áłchíní náás da'ahílchíihii t'óó ahayóí ádeeshłíiłgo doo jóołta' ánéelą́ą́' dooleeł.

¹¹Náá'áłdó' Bóhólníihii bidiyingo naal'a'í ánááhodoo'niid, Yíníltsą́, jó'akon, áko ashkii dííłchííł, Íshmeiyel bee yídíízhiił, háálá nich'į' nahwii'nánígíí Bóhólníihii ná yidiizts'ą́ą́'.

¹²Áádóó diné bitahgóó télii ałchinii nahojílin doo; diné t'áá ałtso hwe'ana'í doo, áádóó diné t'áá ałtso bi'ana'í jílį́į doo, áko hak'isóó kéédahat'į́į́dóó binaashiijí kééhojit'į́į doo.

¹³Áko Bóhólníihii hach'į' haadzí'ígíí, Diyin God shiníł'íinii nílį́, bizhdííniid, háálá ázhdííniid, Da' shiníł'ínígíísh yiiłtsą́?

¹⁴Éí bąą tó háálínígíí éí Bíyer-laháí-roi hoosye'; éí Kéídesh áádóó Bííred bita'gi áhoolyé.

¹⁵Áádóó Éíbram éí Héígar há haye' yishchį́, áko Éíbram haye' Héígar há yishchínígíí Íshmeiyel bee jíízhi'.

¹⁶Áko Éíbram éí tseebídiindóó ba'aan hastą́ą́h honááhaigo Héígar éí Íshmeiyel yishchį́.