Read Navajo GENESIS 17 Bible Online

GENESIS 17 - Navajo bible

GENESIS 17

¹Áko Éíbram náhást'édiindóó ba'aan náhást'éí binááhaigo Bóhólníihii bich'į' yit'íní í'diilyaago ádííniid, Diyin God Aláahgo Ayóó'ábóodziilii nishłį́; shinááł naniná áádóó t'áadoo bee nik'íhót'ahígóó hiníná.

²Áádóó shí nił aha'di'deesht'ááł índa t'áá íiyisí k'ee'ąą nooht'į́įłgo ánihideeshłííł.

³Áko Éíbram ni'jį' tsé'yaa jineeshjool, áádóó Diyin God hach'į' yáłti'go ání,

⁴Shoo, shí nił aha'di'nisht'ą́, áko ał'ąą dine'é t'óó ahayóí bizhé'é nílį́į doo.

⁵Éíbram éí doo néinílyée da doo, Éíbraham yinílyée doo, háálá ał'ąą dine'é t'óó ahayóí bizhé'é ániishłaa.

⁶Áko na'áłchíní náás da'ahílchíihii t'óó ahayóigo ádeeshłííł, áádóó nits'ą́ą́dóó ał'ąą dine'é hólǫ́ǫgo ádeeshłííł, áádóó nits'ą́ą́dóó naat'áanii ch'íhidookah.

⁷Índa bohoníłdzilgo nił aha'di'deesht'ááł áádóó na'áłchíní náás da'ahílchíihii ałdó' éí hool'áágóó bee aha'deet'ą́ą doo, áko ni áádóó na'áłchíní náás da'ahílchíihii ałdó' bił nihiDiyin God nishłį́į doo.

⁸Áádóó dé'éyóní nílį́įgo kéyah biyi' kééhót'ínígíí naa dideesh'ááł; Kéínan kéyah t'áá át'éé nít'éé' áádóó na'áłchíní náás da'ahílchíihii hool'áágóó daabíí' dooleeł, áádóó biDiyin God nishłį́į doo.

⁹Áko Diyin God éí Éíbraham ánéidoo'niid, Áko ni t'éí nił aha'di'nisht'áanii bik'eh honíł'į́į doo; ni áádóó na'áłchíní da'ahílchíihii ałdó' yik'eh dahół'į́į doo.

¹⁰Shibee aha'deet'áanii ni áádóó na'áłchíní náás da'ahílchíihii díidí nihá át'é; nihitahgi ashiiké t'áá ałtso bąąh nídahinołgish doo.

¹¹Nihí bąąh náhinilgishí bílátahgi nihá nahjį' adahalgéesh doo, áko bee ééhózingo bee aha'deet'áanii bee nihił aha'di'nisht'ą́ą doo.

¹²Nihitahgi ła' ho'dizhchį́į́dóó tseebíí hwiiłkáahgo hąąh náhinilgish doo; nihighangi nidahachíhígíí áádóó náánáłahdę́ę́' yigáałii béeso bik'é nihíníláii ałdó' diné t'áá ałtso bada'áłchíní náás da'ahílchííhgóó ákót'ée doo.

¹³Nighan biyi' yizhchíinii áádóó nibéeso bik'é nihíníláii ałdó' díí ts'ídá bąąh nídahinołgish doo, áko shibee aha'deet'áanii nihits'íís t'ah hólǫ́ǫgo hool'áágóó nihił aha'di'nisht'ą́ą doo.

¹⁴Áko ashkii ła' bits'íís doo bąąh náhineeshgizhii éí hodine'é bits'ą́ąjį' hodi'yoolyééł, háálá bee aha'deet'áanii k'ízhníti'.

¹⁵Áko Diyin God éí Éíbraham áyidííniid, Jó, Sérai ne'asdzą́ą́ éí Sérai doo nááhodidíí'niił da; k'ad éí Sárah bee hwíínízhíi doo.

¹⁶Hak'ijishdlíi doo, áádóó niye' dooleełii jidoołchííł; t'áá aaníí hak'ijishdlíi doo áádóó ał'ąą dine'é bimá jidooleeł; hats'ą́ą́dóó diné binanit'a'í dahodooleeł.

¹⁷Áko Éíbraham tsé'yaa jineeshjool áádóó aníjídlohgo t'áá hajéí biyi'ídi ázhdííniid, Da' neeznádiin honááhaigoósh há adoochííł? Da' Sárah daats'í náhást'édiin binááhaigo adoołchííł?

¹⁸Áádóó Éíbraham éí Diyin God áyidííniid, Íshmeiyel éí ninááł hináa dooleełę́ę!

¹⁹Nidi Diyin God ádííniid, Sárah ne'asdzą́ą́ t'áá aaníí niye' ná yidoołchííł; Áízak bee yidíízhiił. Áko ha'áłchíní náás da'ahílchíihii t'áá hóóltą'go hool'áágóó bohoníłdzilgo shibee aha'deet'áanii há át'éego bee nihodeesh'ááł.

²⁰Áádóó Íshmeiyel bá nidiséts'ą́ą́'; jó éí hak'ijiisisdli'; náás oołchíiłgo t'áá íiyisí k'ee'ąązhnoot'į́įłgo áhodeeshłííł; naat'áanii naakits'áadahgo bizhé'é jílį́į doo, áádóó ayóó át'éii dine'é áhodeeshłííł.

²¹Nidi bohoníłdzilgo Áízak t'éiyá bił aha'di'deesht'ááł; éí kodóó ła' nááhaigo Sárah ná yidoołchííł.

²²Áko ałch'į' yájíłti'ígíí áádzísįįdgo Éíbraham bits'ą́ą́' Diyin God dah náhodiile'.

²³Áko t'áá Diyin God áhodííniidígi át'éego Éíbraham haye' Íshmeiyel áádóó t'áá ałtso haghangi nidahaazhchínígíí índa habéeso bik'é nidziizláhígíí éí haghangi diné t'áá ałtso áłah ájiilaago éí bijį́ bąąh nídahizhneeshgizh.

²⁴Áko íídą́ą́' Éíbraham náhást'édiindóó ba'aan náhást'éí binááhaigo hąąh náhineeshgizh.

²⁵Haye' Íshmeiyel éí táá'ts'áadah binááhaigo bąąh náhineeshgizh.

²⁶T'áá éí bijį́ Éíbraham hąąh náhineeshgizh; haye' Íshmeiyel ałdó',

²⁷áádóó haghangi ashiiké áádóó diné t'áá ałtso haghangi nidahaazhchínígíida, łahdę́ę́' béeso bik'é nidziizláhígíida éí t'áá ałtso hoł bąąh nídahineeshgizh.