Read Navajo GENESIS 18 Bible Online

GENESIS 18 - Navajo bible

GENESIS 18

¹Áko Bóhólníihii hach'į' yit'íní í'diilyaa; Mámre bichéch'il naazkaadgi honíbaal bich'é'étiingi dzizdáago hwee honiigai.

²Áádóó hajííghal, nít'éé' jó'akon, diné táa'go hanaashii naazį́įgo dziiłtsą́, áko honíbaal bich'é'étiindóó nízhdii'na'go bidááh jílwodgo ni'jį' yaa ádziidzaago

³ázhdííniid, ShiBóhólníihii, nihił nishłį́į́ ládą́ą́' nihinaal'a'í t'ááká bits'ą́ą́' dah doohkááh yíila', t'áá shǫǫdí.

⁴Haa'íshą' tó ła' nídidookáałgo nihikee' bee táádadoohgis, áádóó díí chéch'il biyaagi háádadoołyįh.

⁵Ninaal'a'í baa noohkai; ch'iyáán ła' nihá nídideeshkááł, áko éí bee nihik'éé dahodootahgo náánáohkah doo. Lą́'ąą, t'áá ádííníniidígi át'éego ánínééh, dahodííniid.

⁶Áádóó Éíbraham honíbaal biyi' góne' Sárah bił yah ajoolwodgo ábizhdííniid, Tsxį́įłgo ak'áán táadi haaką́ągo taonihgo náneeskaadí ánílééh.

⁷Áádóó Éíbraham habéégashii naakaigóó jílwod, áko béégashii yáázh yá'át'éehii neesk'ahii názhníłtį́įgo há naal'a'í baazhníłtį́, áádóó tsį́įłgo néís'ah.

⁸Áádóó abe' neesk'ęhígíí áádóó abe' índa béégashii yáázh nídzís'ahígíí nidziist'éego bich'į' nidziizką́; tsin biyaagi bíighahdóó dzizį́įgo da'ííyą́ą́'.

⁹Áko ádahodííniid, Háájíshą' ne'asdzą́ą́ Sárah? Áko ázhdííniid, Níbaal yii' sidá.

¹⁰Áko Bóhólníihii ání, T'áá kojį' anáhoolzhiizhgo t'áá aaníí naa náádeeshdááł, jó'akon, ne'asdzą́ą́ ashkii yidoołchííł. Áko éí níbaal bich'é'étiindóó hane'jí wóne'dę́ę́' Sárah adíizts'ą́ą́'.

¹¹Áko Éíbraham índa Sárah t'áá ájíłah t'áá hazhó'ó ho'niitih; Sárah éí doo ąądii níjídleeh da dzizlį́į́'.

¹²Éí bąą Sárah t'áá hayi'ídi ádaa joodlohgo ájíní, Da' shí hasistihdóó bik'ijį' índa shahastiin bóhonishníihii haastihgoósh shił nááhoneeni doo?

¹³Áko Bóhólníihii éí Éíbraham áyidííniid, Ha'át'íishą' biniyé Sárah ádeidlohgo ání, T'áá aaníí hasistihgoósh awéé' shee hodooleeł?

¹⁴T'áá ha'át'íhídaásh Bóhólníihii ch'ééh íidooł'įįł? Ákwe'é nihoolzhiizhgo naa náádeeshdááł, áko Sárah biyáázh hodooleeł.

¹⁵Ákohgo Sárah, Doo yishdloh da, jidííniid, háálá nídzíldzid, áko áháłní, Dooda, t'áá aaníí yídloh.

¹⁶Áko diné nídiijée'go Sádam kin haal'áii yich'į'go dadéé'į́į́', áko Éíbraham t'áá áyídíjį' hoł niikai.

¹⁷Áko Bóhólníihii ádííniid, Da' baa nídiisdzáhígíísh Éíbraham bits'ąą dínéesh'į́į́ł?

¹⁸Jó, Éíbraham t'áá aaníí ayóó át'éii áádóó dine'é t'áá íiyisí bidziilii dooleeł, áádóó nahasdzáán bikáa'gi ał'ąą dine'é t'áá ałtso hanahjį' bik'ihozhdoodliił.

¹⁹Hwééhasin; ha'áłchíní áádóó haghangi kéédahat'íinii Bóhólníihii yik'ehgo dayíkáah doo biniyé t'áá ákogi ádaaníiłgo yá'át'éehgo ádaat'į́į dooleełgi bee jinootį́įł doo, áko Bóhólníihii éí Éíbraham yá haadzíi'ii yá íidoolííł.

²⁰Ákohgo Bóhólníihii ánáádoo'niid, Sádam kin haal'áii índa Gomárah kin haal'áii ayóó át'éego cha hahoyiinííh áádóó ádił da'ílzíihgo ts'ídá bąąh yínínígi ádaat'į́;

²¹éí bąą k'ad ákóyaa deesháałgo dínéesh'įįł; t'áá daats'í aaníí bik'ee jóchaaígi áhooníiłgo diséts'ą́ą́'; doodaii' éí shił bééhodoozįįł.

²²Áko diné hats'ą́ąjį' t'áá áłah názyizgo Sádam kin haal'áajigo dah dii'áázh, áko Éíbraham t'éiyá Bóhólníihii t'ahdii yich'į' sizį́.

²³Ákohgo Éíbraham áháníjį' hach'į' niníyáago ádííniid, Da' diné t'áá ákogi át'éiísh diné doo yá'áshóonii t'áá bił ádííłdįįł?

²⁴Díí kin haal'áhígi ashdladiin diné t'áá ákogi ádaat'éii hólǫ́ǫgoósh t'áá bił ádííłdįįł; ashdladiin diné t'áá ákogi ádaat'éii daats'í biniinaa doo ádííłdįįł da?

²⁵Diné t'áá ákogi ádaat'éii diné doo yá' áshóonii t'áá bił ádííłdįįłígíí éí doo ákóone' ánít'ée da! Ákwíindzaago diné t'áá ákogi ádaat'éii diné doo yá'áshóonii bił aheełt'éego ákóníléehgo doo ákóone' ánít'ée da! Nahasdzáán bikáa'gi t'áá át'éé nít'éé' Ánihwii'aahii nilíinii, da' éísh doo t'áá ákwii ádooníił da?

²⁶Áko Bóhólníihii ádííniid, Sádam kin haal'áhígi ashdladiingo diné t'áá ákogi ádaat'éii bik'íníyáago hó hanahjį' kin haal'áii doo ádeeshdįįł da.

²⁷Áko Éíbraham haadzíi'go ání, Jó, k'ad t'áá shí shíniik'ehgo azhą́ łeezh índa łeeshch'iih t'éiyá nishłį́į nidi shiBóhólníihii bich'į' haasdziih.

²⁸Diné t'áá ákogi ádaat'éii ashdladiin dooleełjį' ashdla' bee bi'ohgoshą', da' ashdla' bee bi'oh nidiísh kin haal'áii t'áá át'é ałdó' ádííłdįįł? Áko ádííniid, Dízdiindóó ba'aan ashdla' bik'íníyáago lá kin haal'áii doo ádeeshdįįł da ni.

²⁹Hach'į' haadzíi'go ánááhodoo'niid, Dízdiin yik'íníyáagoshą'? Áko áhodííniid, Dízdiin ázhnéelą́ą'go biniinaa doo áhodeeshdįįł da.

³⁰Áko ánááhodoo'niid, T'áá shǫǫdí, Bóhólníihii, t'áadoo shá díílnihí, áko hanáádeesdzih. Tádiin yik'íníyáagoshą'? Áko ánááhodoo'niid, Tádiin bik'íníyáago doo áhodeeshdįįł da.

³¹Áko ázhdííniid, Jó, k'ad t'áá shí shíniik'ehgo Bóhólníihii bich'į' hanáánásdziih. Naadiin yik'íníyáagoshą'? Áko ánáádoo'niid, Naadiin jilt'éego biniinaa doo áhodeeshdįįł da.

³²Áádóó ánáázhdoo'niid, T'áá shǫǫdí, Bóhólníihii, t'áadoo shá díílnihí, áko t'ááłáhídi hanáádeesdzih. Ákwe'é neeznáá jilt'éego yik'íníyáagoshą'? Áko ánáádoo'niid, Neeznáá jilt'éego biniinaa doo áhodeeshdįįł da.

³³Áádóó Bóhólníihii dah náhodiile'; jó, Éíbraham ałtso bił ahił nahodzisne', áádóó Éíbraham bighangóó anáádzá.