Read Navajo GENESIS 20 Bible Online

GENESIS 20 - Navajo bible

GENESIS 20

¹Áádóó kéyah shádi'ááh bich'į'go Éíbraham jiníná, áko Kéídesh índa Shur bita'gi kééhojit'į́, áádóó Gíírargi t' óó kónígháníjį' náájí'ná.

²Áko Éíbraham hwe'asdzą́ą́ Sárah, Shideezhí át'é, jiníigo biniinaa Gíírar kin haal'áádóó aláahgo naat'áanii Abímelek wolyéii aníł'a'go Sárah yił anídaaskai.

³Nidi Diyin God éí tł'ée'go biłee Abímelek yaa honíle'go áyidííniid, Jó, k'adę́ę yee' dantsaah; díí asdzání bił néínít'ázhígíí bąą, háálá eii diné ła' be'asdzą́ą́ át'é.

⁴Nidi Abímelek t'ah doo hodeelchíid da, áko ání, Bóhólníihii, da' dine'é t'áá ákogi ádaat'éiísh ałdó' nidííłtsił?

⁵Da' doósh, Shideezhí át'é, shizhdííniid da? T'áá hó ałdó', Shínaaí át'é, jidííniid. Doo shina'adlo'góó áádóó sha'át'e' ádingo íít'įįd.

⁶Áko Diyin God biłee áhodííniid, T'áá aaníí doo nina'adlo'góó íínít'įįdígíí shił bééhózin; shí ałdó' shich'į' bąąhági ádííníłígíí bits'ąą nííníshtą'go bąą bididíílchiłígíí t'áadoo bee na'di'ní'ą́ą da.

⁷Éí bąą k'ad diné be'asdzą́ą́ baa náníłteeh, háálá Diyin God yá halne'ii nilį́, áko ná sodidoolzįįłgo hinínáa doo. Doo baa néíníłtį́į́góó éí k'ad nił bééhodoozįįł, t'áá aaníí dadíítsaał, ni áádóó nik'éí t'áá ałtso dadínóohnééł.

⁸Díí biniinaa Abímelek t'áá íiyisí abínídą́ą́' nízhdii'na'go há nidaal'a'í t'áá ałtso hágo bizhdííniidgo díí t'áá ałtso bee bił hojoolne', áko diné t'áá íiyisí nídaasdzííd.

⁹Áádóó Abímelek éí Éíbraham hágo yidííniidgo áyidííniid, Haashą' nihííníł'įįd? Haashą' niishłaago shí áádóó shidine'é ałdó' ts'ídá doo yá'át'éehii biih nihíínínil? Áshííníł'įįdígíí ts'ídá doo ádííníił da nít'éé'.

¹⁰Áádóó Abímelek éí Éíbraham ánéidoo'niid, Ha'át'íísh nínízingo díí baa nisíníyá?

¹¹Áádóó Éíbraham ázhdííniid, Diyin God k'ehgo dayíkáhígíí kwe'é ádin, sha'shin, áádóó she'asdzą́ą́ yiniinaa dashidiyoołhééł sha'shin niizį́į'go lá ásht'į́ ni.

¹²Ákondi t'áá shideezhí át'é ni, shizhé'é bitsi' jílį́, nidi shimá éí doo bich'é'é jílį́į da, áko she'asdzą́ą́ dzizlį́į́'.

¹³Áko shizhé'é bighandóó hááyáago Diyin God éí tádíshnéehgo áshiilaago Sárah ábidííniid, Nibee ajooba' bee shaa jiiníba'go t'áá hidiit'aashgóó, Shínaa'í át'é, shidiníi doo.

¹⁴Ákohgo Abímelek éí dibé áádóó béégashii índa diné nidaalte' áádóó asdzání nidaalte' díí t'áá ałtso Éíbraham yeinínil, áádóó Sárah hwe'asdzą́ą́ ałdó' haa néiníłtį́.

¹⁵Áádóó Abímelek ádííniid, Jó, kǫ́ǫ́ shikéyah, t'áá nił yá'áhoot'éhígi kééhót'į́į doo.

¹⁶Sárah éí áyidííniid, Jó'akon, nínaaí t'ááłáhídi miil béeso baa nínil; éí diné bił naahkaígíí índa diné náádaała' dabinááł t'áá ákogi ánít'é ni'doo'niidígíí bééhoozingo bee k'ééházdǫǫd.

¹⁷Áko Éíbraham éí Diyin God yich'į' sodoolzin, áko Diyin God éí Abímelek néidiisá, hwe'asdzą́ą́ ałdó', asdzání há nidaalte' ałdó', áádóó ha'áłchíní nidahwiizlį́į́'.

¹⁸Háálá Bóhólníihii éí Abímelek bighangi asdzání kéédahat'ínígíí t'áá ałtso Éíbraham be'asdzą́ą́ Sárah biniinaa doo da'ałchíígóó áyiilaa nít'éé'.