Read Navajo GENESIS 21 Bible Online

GENESIS 21 - Navajo bible

GENESIS 21

¹Áko Bóhólníihii t'áá ádííniidígi át'éego Sárah yaa naneeztą́ą́', áko t'áá haadzí'ígi át'éego Sárah yá yi'iilaa.

²Áko Sárah i'niiltsąąd, áádóó Éíbraham haastihdi índa biye' bá jishchį́; t'áá Diyin God hach'į' haadzí'íjį' ahoolzhiizhgo bohoolyaa.

³Áádóó Éíbraham haye' Sárah há yishchínígíí Áízak bee jíízhi'.

⁴Áko Diyin God t'áá áhodííniidígi át'éego Éíbraham haye' Áízak tseebíí biiską́ągo bąąh náhizhneeshgizh.

⁵Éíbraham neeznádiin binááhaigo haye' Áízak há yizhchį́.

⁶Áko Sárah ádííniid, Diyin God yishdlohgo áshiilaa, áádóó t'áá ałtso deidiizts'ą́'ígíí shił daadloh dooleeł.

⁷Áádóó ánáázhdoo'niid, Háíyee', Sárah be'awéé' yi'iiłt'o' dooleeł, Éíbraham yididooniił? Jó'akon, haastihdi índa biye' bá shéłchį́.

⁸Áádóó awéé' dínéesą́ągo i'díít'óód, áko Éíbraham éí Áízak i'díít'óód bijį́ ayóó át'éego áda'íísįįd.

⁹Áko Sárah éí Ííjip dine'é asdzání Héígar wolyéii biyáázh éí Éíbraham yá yishchínígíí t'óó há nahałt'i'go baa ákoniizį́į́'.

¹⁰Éí bąą Éíbraham ábizhdííniid, Díí naalte' asdzání biyáázh t'áá bił ch'íninołchééh, háálá díí naalte' asdzání biyáázh éí shí shiyáázh Áízak bíí' dooleełii doo bił ałts'ą́ą́' adzíłk'iiz da doo.

¹¹Díí biniinaa Éíbraham biye' t'áá íiyisí yąąh bíni'.

¹²Nidi Diyin God éí Éíbraham áyidííniid, Ashkii índa naalte' asdzání biniinaa t'áadoo yínííł nílíní; Sárah áníłnínígíí t'áá ałtso yísíníłts'ą́ą́', háálá Áízak bits'ą́ą́dóó na'áłchíní náás ahoolchíiłii bíká ádahodoo'niid.

¹³Asdzání naalte' nilínígíí ałdó' biyáázh ła' dine'é ádeeshłííł, háálá éí niye' át'é.

¹⁴Áko Éíbraham t'áá íiyisí abínígo nízhdii'na'go bááh áádóó tó abid bił nízhdiinilgo Héígar baazhnínilgo nihiiníłjid, áádóó ashkii bił dashdiił'a'go dah dii'áázh, áádóó Bíyer-shííba hoolyéedi kéyah bii' doo naagháhídi niji'aash.

¹⁵Áko tó abid bii' tó ásdįįdgo ashkii ch'il nitsaa léi' biyaagi nizhníłtį́.

¹⁶Áádóó dashdiiyáago adilt'oh bíighah ánízahgi dzineezdá; ashkii doo shinááł dadootsaał da jiníigo bits'áhwiiní'ą́ądi dzizdáago yéego jííchah.

¹⁷Áko Diyin God nilíinii ashkii yichago yidiizts'ą́ą́', áko Diyin God bidiyingo naal'a'í yá'ąąsh biyi'dę́ę́' Héígar yiyíízhi'go áyidííniid, Héígar, haashą' yinidzaa? T'áadoo nił yé'í; Diyin God éí ashkii sitínígíí yichago yidiizts'ą́ą́'.

¹⁸Nídiidááh, ashkii nídiiłteehgo dah yíłtééł, háálá ła' dine'é ayóó át'éii áhodeeshłííł.

¹⁹Ákohgo Diyin God hahoyííłhalgo tó hahaasnilgo dziiłtsą́; ákǫ́ǫ́ jiníyáago tó abid bii' tó hazhdééłbįįdgo ashkii baazhníłtsoozgo yoodlą́ą́'.

²⁰Áko Diyin God éí ashkii yaa áhályą́ągo dínéesą́; kéyah bii' doo naagháhídi kééhat'į́, áádóó t'áá íiyisí doo na'asi'góó k'aa' yee adiłt'oh silį́į́'.

²¹Péran hoolyéedi kéyah bii' doo naagháhídi kééhat'į́; Ííjip kéyahdę́ę́' asdzání hwe'asdzą́ą́ dooleełígíí hamá há yił nát'áázh.

²²Íídą́ą́' Abímelek áádóó bisiláo binanit'a'í Fáíkal wolyéii Éíbraham yich'į' haadzíi'go ání, T'áá ha'át'íhída t'áá ałtso baa nanináago Diyin God nił hólǫ́.

²³Éí bąą k'ad Diyin God binááł shich'į' ádee hadídziihgo t'áadoo shina'ílo'í doo; shiye' ałdó' dooda, shinálí ałdó' dooda; naa jooshba'ígi át'éego ni ałdó' shich'į' t'áá ákónít'ée doo, áádóó kéyah bikáá' níínínánígi ałdó' bich'į' ákónít'ée dooleeł.

²⁴Éíbraham ádííniid, Ádee hadideesdzih.

²⁵Áádóó Éíbraham tó hahaas'nilígíí biniinaa Abímelek yideezteh, háálá Abímelek bá nidaal' a'í t'áá na'níle'dii haghadeideest'ą́,

²⁶áko Abímelek ádííniid, Doo shił bééhózin da; háí shį́į́ át'ínígíí t'áadoo bee shił hwíínílne' da; doo diists'a' da nít'éé'; díí jį́ índa yínii'.

²⁷Áko Éíbraham éí dibé índa béégashii ałdó' Abímelek yeinínil, áádóó ahazhdeet'ą́.

²⁸Áko Éíbraham éí hadibé yázhí dabi'ádígíí tsosts'idgo t'áá sahdii ats'ázhnínil.

²⁹Áádóó Abímelek éí Éíbraham áyidííniid, Ha'át'íishą' biniyé díí dibé yázhí dabi'ádígíí ats'éinínil?

³⁰Áko ázhdííniid, Díí dibé yázhí dabi'ádígíí tsostsidgo shits'ą́ą́dóó nídidíínił; éí díí tó hahánilígíí shí ásht'į́įgo shá bee bééhózin doo.

³¹Díí biniinaa ákwe'é Bíyer-shííba hoosye', háálá ákwe'é ałch'į' ádee hazdoodzíí'.

³²Kót'éego Bíyer-shííba hoolyéegi ahazhdeet'ą́, ákohgo Abímelek índa hasiláo binanit'a'í Fáíkal wolyéii Filístiya dine'é bikéyahgóó dah nízhdiit'áázh.

³³Áádóó Éíbraham éí Bíyer-shííba hoolyéegi k'ai' łichíí' k'izhdíílá; ákwe'é Bóhólníihii éí hool'áágóó Diyin God nilíinii bízhi' józhíigo sozdoolzin.

³⁴Éíbraham éí Filístiya dine'é bikéyahgi t'óó átsééd kééhojit'į́įgo lą'í yiską́.