Read Navajo GENESIS 22 Bible Online

GENESIS 22 - Navajo bible

GENESIS 22

¹Áádóó ákódzaadóó bik'ijį' Diyin God éí Éíbraham yíneeztą́ą'go áyidííniid, Éíbraham! Áko ázhdííniid, Kǫ́ǫ́ sédá.

²Áko áhodííniid, T'ááłá'í niye'ígíí, ayóó'ííní'níinii Áízak wolyéii, kéyah Moráíyahgóó bił dí'aashgo áadi hodíłidgo nááhodiyííłnih; ííshją́ą́ díí dził ghą́ą'gi kwe'é nidideesh'niił.

³Áádóó Éíbraham t'áá íiyisí abínígo nízhdii'na'go hatélii bik'i dah adziznil áádóó hatsíłkéí naaki ádíjii'nil; haye' Áízak ałdó' bił bee adidlidgo náá'iiniih biniyé chizh ahizhdííłkaal. Diyin God doohkah hałnínę́ęgóó dashdiikai.

⁴Áádóó dashdiikaidóó tágí jį́ aleeh góne' Éíbraham náás ajííghalgo dzideeskaijį' éí nízaadgo dziiłtsą́.

⁵Áko Éíbraham hatsíłkéí ábizhdííniid, T'áá kwe'é télii bísoołké; shí índa shiye' bił níláahjį' diit'ash; áadi sodidiilzįįłgo índa nihaa nídiit'ash.

⁶Áádóó Éíbraham chizh bee adidlidgo bee náázhdi'yoołnihígíí haye' Áízak bina'ízhdéénilgo nihiiníłjid, áádóó kǫ' índa béésh bił dashdiijaa', áko t'áá ájíłah ákǫ́ǫ́ joo'ashgo

⁷Áízak hazhé'é Éíbraham ábizhdííniid, Shizhé'é! Áko ázhdííniid, Kǫ́ǫ́ yishááł, shiye'. Nít'éé' ánááhodoo'niid, Shoo, kǫ' áádóó chizh nihee hólǫ́, ákoshą' dibé yázhí didlidgo nááhidoonihígíí éí háadi?

⁸Áádóó Éíbraham ádííniid, Shiye', Diyin God lá dibé yázhí didlidgo nááhidoonihígíí t'áá bí néididoołtéeł ni. Áádóó t'áá ájíłah t'áá ła' joo'ash.

⁹Diyin God, Kwe'é nidideeshniił, hodííniidígi jiní'áazhgo ákwe'é Éíbraham éí bikáá' náá'iiniihí ájiilaago bikáa'jį' chizh dah jizhjaa', áko haye' Áízak be'dziztł'ǫ́ǫgo bikáá' náá'iiniihí bikáa'gi chizh bik'i nizhníłtį́.

¹⁰Áko Éíbraham béésh néidii'ą́ągo biye' yi'niił hį́įgo yich'į' béésh yił k'ídeeshchid.

¹¹Nít'éé' Bóhólníihii bidiyingo naal'a'í yá'ąąsh biyi'dę́ę́' hózhíigo áháłní, Éíbraham, Éíbraham! Áko ázhdííniid, Kǫ́ǫ́ sézį́.

¹²Áko ání, Ashkii atíhólééh lágo, doo nidi haada díílíił da, Diyin God t'áá íiyisí bóhoníłnííh lá k'ad shił bééhoozin, háálá t'ááłá'í niye'ígíí nidi doo shąąh síní'įįd da.

¹³Áko Éíbraham hajííghalgo nidzizghal, nít'éé' hane'jígo deenásts'aa' bidee' yee tsin yiih dinoolne' lá, áádóó Éíbraham éí deenásts'aa' néidiiłtį́įgo haye' bitsásk'ehgi didlidgo náádziisnii'.

¹⁴Áko Éíbraham ákwe'é Jiihóvah-jáíreh bee hojíízhi'; díigi át'éego díí jį́įjį' t'ah nidi bee ádajiní, Bóhólníihii bidził bighą́ą'gi yee aa áhodoolyąął.

¹⁵Áko díí bił naakidi aleeh góne' Bóhólníihii bidiyingo naal'a'í yá'ąąsh biyi'dę́ę́' Éíbraham nááyooji'go ání,

¹⁶T'áá shí kódíshníigo ádee hadeesdzíí', ní Bóhólníihii, háálá díí baa nisíníyá: t'ááłá'í niye'ígíí doo shąąh síní'įįdgóó bąą

¹⁷nik'ijishdlíigo éí t'áá íiyisí nik'ijishdlíi doo, áko na'áłchíní éí k'ee'ąą dínéesht'į́įłgo yádiłhił biyi'di sǫ'ígi ánéelą́ą'go índa tónteel bibąąhgóó séíígi ánéelą́ą'go na'áłchíní nídínéesht'į́į́ł áádóó na'áłchíní náás da'ahílchíihii bida'ana'í yik'eh dadidlį́į doo.

¹⁸Áádóó nits'ą́ą́dóó yichíiłii bee ał'ąą dine'é t'áá ałtso bik'ihozhdoodliił, háálá shizaad bik'eh honíł'į́.

¹⁹Ákohgo Éíbraham hatsíłkéí baa níjít'áazhgo t'áá ła' Bíyer-shííba hoolyéégóó dah nízhdiikai, áádóó Éíbraham éí Bíyer-shííbagi kééhojit'į́.

²⁰Áádóó náás nááhodeeshzhiizhgo Éíbraham bił hóóne', Jó, Mílkah ałdó', nitsilí Néíhor yá ni'iishchį́į́ lá, ho'doo'niid.

²¹Haz alą́ąjį' há yizhchį́, áádóó bitsilí Baz áádóó Kémyu'el éí Áram

²²áádóó Késed áádóó Héízo áádóó Píldash áádóó Jídlaf índa Biithúwel yizhé'é nilį́.

²³Biithúwel há yizhchíinii éí Rebékah wolyé: díí tseebíigo Mílkah éí Éíbraham bitsilí Néíhor yá niyiishchį́.

²⁴Áádóó Néíhor be'asdzą́ą́ yíł'íní Rúmah yolyéhígíí éí Tííba áádóó Géíham áádóó Téíhash índa Méí'akah ałdó' há niyiishchį́.