Read Navajo GENESIS 23 Bible Online

GENESIS 23 - Navajo bible

GENESIS 23

¹Áko Sárah éí neeznádiindóó ba'aan naadiin tsosts'id binááhai; kwíí nááhaijį' Sárah hináá nít'éé'.

²Ákohgo Kírjath-árbagi t'áá ákwe'é Hííbran hoolyé; Kéínan kéyah biyi'gi Sárah daaztsą́, áko Éíbraham atínízhdindleehgo áá jiníyáago Sárah baa jííchah.

³Áádóó Éíbraham bąąh daaztsáanii yits'ą́ą́' dah diiyá, áko Het ba'áłchíní yich'į' hahaasdzíi'go ádííniid,

⁴Shí dé'éyóní nishłį́ áádóó t'óó átsééd nihitah kééhasht'į́; łeeh ho'dii'níiłgi łahgo shaa hodinoh'aah, áko shąąh dadziztsánígíí áajį' yóó'áhodeeshłííł.

⁵Áko Het ba'áłchíní Éíbraham yich'į' hadaasdzíi'go ádahodííniid,

⁶Shinanit'a'í, nihííníłts'ą́ą́', ayóó át'é naat'áanii nihitahgi nílį́. Nihitséní'ootséél aláahgo hózhónígi náhodii'aah; ákwii nąąh daaztsánígíí łeeh dííłtééł; nihí doo ła' bitséní'ootséél nits'ąą kódadiilníił da, índa nąąh daaztsánígíí ákwii yóó'ádíílííł.

⁷Áko Éíbraham nízhdii'na'go éí kéyahgi kéédahat'ínígíí Het dine'é bich'į' yaa ádziidzaa.

⁸Áádóó bił baa nídajit'į́įgo ájíní, Shąąh daaztsánígíí nii'ohjį' ádeeshłíłígíí nihił t'áá da'ákogo dashíínółts'ą́ą́'; Zóhar biye', Íífran shá ádabidohní,

⁹Makpííla hoolyéegi tséníhoodzánígíí éí Íífran bikéyah nihoneel'ánídi yóó'áda'alne' biniyé t'áá bą́ą́h ílínígo nihinááł sheididoo'ááł.

¹⁰Áko Íífran éí Het ba'áłchíní yitahgi sidá; nít'éé' Íífran, Het dine'é nilíinii bikin haal'áii bich'é'étiin góne' Het ba'áłchíní yah aheeskaígíí t'áá ałtso dabinááł Éíbraham áyidííniid,

¹¹Dooda, shinanit'a'í shííníłts'ą́ą́'; kéyahígíí áádóó biyi' tséníhoodzánígíí ałdó' t'óó naa dideesh'ááł; shidine'é ba'áłchíní dabinááł naa dideesh'ááł, áko nąąh daaztsánígíí ákwii yóó'ádíílííł.

¹²Áko Éíbraham éí kéyahgi kéédahat'ínígíí bich'į' yaa ádziidzaa.

¹³Áádóó kéyahgi kéédahat'ínígíí t'áá ałtso dabinááł Íífran bich'į' hadzoodzíi'go ájíní, T'áá shǫǫdí shííníłts'ą́ą́'; díí kéyah bik'é béeso nich'į' ni'deeshłéłígíí nídiinííł, índa ákwe'é shąąh daaztsáanii yóó'ádeeshłííł.

¹⁴Íífran éí Éíbraham yich'į' haadzíi'go ání,

¹⁵Shinanit'a'í, shííníłts'ą́ą́'; kéyahígíí dį́įdi neeznádiin shékel béésh łigaii bą́ą́h ílį́; éísh ha'át'éegoda baa nínáánéit'į́į doo? Nílááh, nąąh daaztsáanii ákwii yóó'ádíílíí ł.

¹⁶Áádóó Éíbraham éí Íífran haadzí'ígíí yidiizts'ą́ą'go Het ba'áłchíní dabinááł bee ha'oodzíi'ii íídą́ą́' béeso chodayooł'íinii bik'ehgo dį́įdi neeznádiin shékel béésh łigaii Íífran yá dah yidiyiilo'.

¹⁷Áko Makpíílagi Mámre hoolyéhígíí bíighahgóó Íífran bikéyahígíí áádóó tsénihoodzánígíí índa éí kéyah nidanees'áníjį' tsin naazkaadii t'áá ałtso t'áá bił

¹⁸Het dine'é áádóó kin haal'áii bich'é'étiin góne' yah aheeskaígíí t'áá ałtso dabinááł t'áá aaníí Éíbraham bíí' dooleeł biniyé baa deet'ą́.

¹⁹Áádóó bik'ijį' Mámre hoolyéédóó ha'a'aahjigo Makpííla kéyahgi tséníhoodzání góne' Éíbraham hwe'asdzą́ą́ yę́ę Sárah yóó'ájiilaa; t'áá éí Kéínan kéyahgi Hííbran hoolyé.

²⁰Áko éí kéyah áádóó tséníhoodzánígíí Éíbraham bíí' dooleełgo tséní'ootséél dooleeł biniyé Het dine'é éí haa dahodeez'ą́.