Read Navajo GENESIS 24 Bible Online

GENESIS 24 - Navajo bible

GENESIS 24

¹Áko Éíbraham lą'í binááhai, t'áá hazhó'ó haastih, áko Bóhólníihii t'áá ałtsoní yee Éíbraham yik'ijidlí.

²Áádóó Éíbraham haghangi há naal'a'í alą́ąjį'ígíí hwee hólóonii yaa áhályánígíí ábizhdííniid, T'áá shǫǫdí, shitsoosk'id biyaa adílnííh.

³Áko Bóhólníihii biniiłt'aa éí Diyin God nilį́įgo yádiłhił índa nahasdzáán bee bóhólníihii bee shich'į' ádee hadidíídzih, Kéínan dine'é bitah kééhasht'ínígíí bitsi'ké shiye' be'asdzą́ą́ dooleeł biniyé doo ła' bá nídidííłtéeł da.

⁴Nidi shikéyahgóó shik'éí bich'į' díínááł; áadi índa shiye' Áízak be'asdzą́ą́ dooleełígíí bá nídidííłtééł.

⁵Áko há naal'a'í áhodííniid, Díí kéyahjį' asdzání doo shikéé' bíni'góoshą', áko kéyah yíníyáádę́ę́' ákǫ́ǫ́ daats'í niye' bił deesh'ash.

⁶Áko Éíbraham áhodííniid, T'ááká ákǫ́ǫ́ shiye' bił dóó'ash lágo.

⁷Bóhólníihii Diyin God yá'ąąshdi hólóonii, éí shizhé'é bighandę́ę́' índa shik'éí bikéyahdę́ę́' ch'íshiníł'a', éí shich'į' ádee haadzíi'go ání, Na'áłchíní náás da'ahílchíihii díí kéyah baa dideesh'ááł; t'áá éí bidiyingo naal'a'í nilą́ąjį' yidooł'aałgo áádę́ę́' shiye' be'asdzą́ą́ dooleełígíí bił nídíít'ash.

⁸Áko asdzání doo nikéé' bíni' dago doo nihodiit'i'góó ch'ídíínááł, ákondi shiye' t'éiyá doo ákǫ́ǫ́ bił díí'ash da.

⁹Áko naal'a'í éí Éíbraham hananit'a'í bitsoosk'id biyaa azhdoolnii'go díidí bee ádá nihozhdeet'ą́.

¹⁰Ákohgo naal'a'í honanit'a'í bibighą́ą́'ask'idii neeznáá bee dashdiiná, honanit'a'í binaalye'é danizhónígíí ał'ąą ádaat'eełii ła' bóóltą'go hasht'e'ízh'diilyaago Mesopotéímiyagóó Néíhor bikin haal'áajį' dashdiiná.

¹¹Áko éí kin haal'áádóó tł'óo'gi tó hahadleeh léi'gi i'íí'ą́ągo jiníyá; ákwe'é haghą́ą́'ask'idii nitsidadéesgo'go ájiilaa; ts'ídá áajį' anáhwiilzhíishgo asdzání tó háádayiidloh.

¹²Áko sozdilzingo ájíní, Bóhólníihii nílíinii, shinanit'a'í Éíbraham biDiyin God nánooshkąąh; díí jį́ shíká anilyeed; Éíbraham shinanit'a'í baa jiiníbaah.

¹³Jó, díí tó hahadleeh bíighahgóó sézį́, índa diné dabitsi'ké kintahdę́ę́' tó hadeidiyoo'ááł yiniyé deíkááh,

¹⁴áko bíni' ákónééh; éí ch'ikę́ę́h ábidideeshniił, T'áá shǫǫdí nitóshjeeh nani'aahgo adeeshdlį́į́ł, áko ádidooniił, Ídlą́ índa nighą́ą́'ask'idii ałdó' bá tó hahideesh'ááł, áko ííshją́ą́ éí dooleeł; ninaal'a'í Áízak bá nídiniłtínígíí át'į́į doo, áko éí bee shił bééhodoozįįłgo shinanit'a'í baa jiisiníbaah doo.

¹⁵Áádóó t'ah doo niyájíłtééhgóó ákódzaa, jó'akon, Éíbraham bitsilí Néíhor be'asdzą́ą́ Mílkah biyáázh Biithúwel bitsi' Rebékah éí tóshjeeh biwos dah si'ą́ągo ch'íníyá.

¹⁶Áko ch'ikę́ę́h diné t'ah doo bee haleehii jílį́, hodi'níl'į́įgo t'áá íiyisí jízhóní; diné t'ah doo hwéédahoosįįh da. Éí tó hahadleeh góyaa ajííyáago tóshjeeh tó bii' hééł ájiilaago háádzísdzá.

¹⁷Naal'a'í hadááh yílwodgo áhodííniid, T'áá shǫǫdí, tó áłch'į́į́dígo nitóshjeeh biyi'dę́ę́' ła' yishdlą́.

¹⁸Áko, Shinanit'a'í, ídlą́, bizhdííniidgo t'áá áko hálák'eejį' hatóshjeeh yaa ájiilaago tó hazhníką́.

¹⁹Ajoodlą́ą́'dóó bik'ijį' áhodííniid, Nighą́ą́'ask'idii ałdó' ałtso da'oodlą́ą'jį' tó bá hahideesh'ááł.

²⁰Tsį́įłgo łį́į́' yii' da'adlání biyi'jį' tó yáájii'áahgo tó hahadleeh góyaa anáádzoodzáago bighą́ą́'ask'idii t'áá ałtso tó bá hadziiz'ą́.

²¹Áko diné t'óó nitsíkeesgo doo yáłti'góó biniyé níyáhígíí daats'í Bóhólníihii iiniizį́į́', nízingo sizį́.

²²Áádóó ákódzaago ghą́ą́'ask'idii ałtso da'oodlą́ą'go óola yoostsah índa óola látsíní naakigo da'ílíinii baazhnínil.

²³Áko ájíní, T'áá shǫǫdí shił hólne', háishą' bitsi' nílį́? Nizhé'é bighandiísh t'áá nída'njah? bizhdííniid.

²⁴Ch'ikę́ę́h ádííniid, Mílkah biyáázh éí Néíhor yá yishchínígíí Biithúwel bitsi' nishłį́.

²⁵Áko ánáádoo'niid, Tł'oh naadą́ą́' bitsǫz índa łį́į́' bich'iyą' t'áá nihíneel'ą́, áádóó dínóohjahgi t'áá haz'ą́.

²⁶Áko diné yaa ádzaago Bóhólníihii yich'į' nahasáago

²⁷ádííniid, Shinanit'a'í Éíbraham biDiyin God baa ha'niih doo; éí bibee aa a'ááh hasin áádóó bit'áá aaníinii t'áadoo yee shinanit'a'í yaa yooznah da. Atiindę́ę́' yisháałgo Bóhólníihii shilą́ąjį' hólǫ́ǫgo shinanit'a'í bik'isóó bighanjį' níyá.

²⁸Áádóó ch'ikę́ę́h dah diilwodgo bimá bik'éí díidí yee yił nahasne'.

²⁹Áko Rebékah bínaaí ła' hólǫ́ éí Léíban wolyé, áko Léíban tó hahadleehgóó diné bich'į' jílwod.

³⁰Yoostsah índa látsíní hadeezhí bílátsíín sinilgo dziiłtsą́ áádóó hadeezhí Rebékah bizaad dzidiizts'ą́ą'go, Diné kóshíłní, níigo éí diné bich'į' jiníyáago tó hahadleehdi ghą́ą́'ask'idii yíighahgóó sizį́įgo baazhníyá.

³¹Áko ábijiní, Bóhólníihii bik'ijidlíii nílíinii, yah aninááh. Ha'át'íishą' biniyé tł'óo'di sínízį́? Kin góne' ná hasht'ehooshłaa áádóó ghą́ą́'ask'idii ałdó' bá hasht'ehooshłaa.

³²Áko kin góne' diné yah ííyáago Léíban éí haghą́ą́'ask'idii yik'i na'iiznil, áádóó tł'oh naadą́ą́' bitsǫz índa łį́į́' bich'iyą' bił ghą́ą́'ask'idii yá ni'níłjool, áádóó tó bee hakee' tázdoogisii índa diné bił nijikaígíí dabikee' ałdó' yee táádeidoogisii baazhníką́.

³³Áko azhdooyį́į́ł biniyé hayaa nizh'níką́, nidi, Biniyé níyáhígíí baa hweeshne'go índa adeeshį́į́ł, jiní. Hágoónee', hólne', hozhdííniid.

³⁴Áko ájíní, Éíbraham binaal'a'í nishłį́.

³⁵Bóhólníihii éí shinanit'a'í ayóó át'éego yik'ijisdli', áko ayóó át'éii dzizlį́į́', áádóó dibé naazhjé'ígíí beinínil, áádóó béégashiida, béésh łigaiida, óolada, diné há nidaalte', asdzání há nidaalte', ghą́ą́'ask'idii índa téliida beinínil.

³⁶Áko shinanit'a'í be'asdzą́ą́ Sárah haastihgo shinanit'a'í biye' yishchį́, áko t'áá bee hólónígíí t'áá ałtso yeidiní'ą́.

³⁷Shinanit'a'í ádee hashiyííłdzíí' kóníigo, Kéínan dine'é bikéyah biyi' kééhasht'ínígíí dabitsi'ké shiye' be'asdzą́ą́ dooleełígíí doo ła' bá nídidííłtéeł da.

³⁸Shizhé'é bik'éí bidine'é bitahgóó díínááł, áádę́ę́' shiye' be'asdzą́ą́ dooleełígíí bił nídíít'ash.

³⁹Áádóó shinanit'a'í ábidííniid, Asdzání doo shikéé' bíni'góoshą'?

⁴⁰Áko áshidííniid, Bóhólníihii binááł naasháhígíí bidiyingo naal'a'í nił yidooł'aał, éí níká adoolwołgo shizhé'é bik'éí bidine'é bitahdę́ę́' shiye' be'asdzą́ą́ dooleełígíí bił nídíít'ash.

⁴¹Áko shik'éí bitahgóó ch'ééh nisíníyáago áádóó doo ła' naa deistį́į́góó éí doo nihodiit'i'góó ch'ídíínááł.

⁴²Áko jį́į́dą́ą́' tó hahadleehgi níyá, áádóó ádíshní, Éíbraham shinanit'a'í biDiyin God Bóhólníihii nílíinii, biniyé yisháłígíí bee shíká anilyeed.

⁴³Jó, tó hahadleeh bíighahgóó sézį́, áko bíni' ákónééh; ch'ikę́ę́h tó haidooloh yiniyé ch'ídoogáałgo ábidideeshniił, T'áá shǫǫdí, tó áłch'į́į́dígo nitóshjeeh biyi'dę́ę́' ła' shaa nízííd.

⁴⁴Áádóó ch'ikę́ę́h áshididooniił, Ídlą́ índa nighą́ą́'ask'idii ałdó' bá tó hahideesh'ááł; ííshją́ą́ asdzání éí Bóhólníihii shinanit'a'í biye' yá néidiiłtínígíí át'į́į dooleeł.

⁴⁵Áko t'áá shiyi'ídi t'ah doo niyáníshtééhgóó Rebékah éí tóshjeeh hawosgi dah si'ą́ągo ch'ízhníyá; tó hahadleeh góyaa ajííyáago tó hajíílo', áko áhodishní, T'áá shǫǫdí tó ła' shaa nízííd.

⁴⁶T'áá áko hatóshjeeh hawosdóó nizhdii'ą́ índa, Nighą́ą́'ask'idii ałdó' bá tó hahideesh'ááł, shizhdííniid, áko eeshdlą́ą́' áádóó ghą́ą́'ask'idii ałdó' bá tó hadziiz'ą́.

⁴⁷Áádóó nahódíshkidgo áhodishní, Háishą' bitsi' nílį́? Áko ájíní, Néíhor hwe'asdzą́ą́ Mílkah haye' há yishchínígíí Biithúwel bitsi' nishłį́. Áko yoostsah háchį́į́h bąąh dah sé'ą́, áádóó látsíní hálátsíín ninínil.

⁴⁸Áádóó yaa ásdzaago Bóhólníihii bich'į' sodeeszingo Éíbraham shinanit'a'í biDiyin God Bóhólníihii bich'į' ahééh niizį́į́', háálá shinanit'a'í bitsilí bitsi' éí haye' bá nídideeshtéełgo yá'át'éehgo shilą́ąjį' hólǫ́ǫgo níyá.

⁴⁹Áko k'ad dajiinohba'go shinanit'a'í t'áá aaníí bił ákóda'ahidoołníiłgo bee shił dahołne'; doodago ałdó' éí bee shił dahołne', ákohgo háajigo shį́į́ dah dideeshááł; nish'náájí daats'í, doodaii', nishtł'ají daats'í.

⁵⁰Ákohgo Léíban índa Biithúwel hach'į' haadzíi'go áhodííniid, Díidí Bóhólníihii bits'ą́ą́dę́ę́' át'éé lá, áko nichǫ́'ígo doodaii' yá'át'éehgoda doo nich'į' hadaodziih át'ée da.

⁵¹Jó, kǫ́ǫ́ Rebékah hoł nihiní'aash, áko ninanit'a'í biye' be'asdzą́ą́ jidooleeł. Jó, ákót'éego Bóhólníihii haadzíí' lá.

⁵²Ákódzaago Éíbraham binaal'a'í hazaad yidiizts'ą́ą'go ni'jį' yaa ádzaago Bóhólníihii yich'į' nahasá.

⁵³Áádóó naal'a'í éí yódí ałtaas'éí béésh łigaii áádóó óola bee ádaalyaii índa éé'da hayiiznilgo Rebékah yeinínil, áádóó yódí da'ílínígíí ałdó' hánaaí índa hamá yeinínil.

⁵⁴Ákohgo diné bił nijikaígíí bił da'jííyą́ą́', índa t'áá ákwii jineezhjéé'. Abínígo nízhdiijée'go ájíní, Shinanit'a'í bich'į' náshidoł'á.

⁵⁵Ch'ikę́ę́h bínaaí índa bimá ałdó' ádííniid, Bíni' átsééd t'áá díkwíí yiskáníjį' ch'ikę́ę́h bił naháatą́ą doo; neeznáá yiską́ąjį'da, áádóó bik'ijį' índa ákǫ́ǫ́ jidoogááł.

⁵⁶Áko ábijiní, Bóhólníihii shíká aalwodígíí bąą t'áadoo nidashinoh'iní; náshidoł'á; shinanit'a'í bich'į' nídeeshdááł.

⁵⁷Áko ádaaní, Ch'ikę́ę́h hágo dabididii'niiłgo nideídídíilkił.

⁵⁸Áko Rebékah hágo dayidííniidgo ádeiłní, Díí diné daats'í bił nihéédíít'ash? Áko ázhdííniid, Ákǫ́ǫ́ lá deesháał ni.

⁵⁹Áko hadeezhí Rebékah áádóó asdzání Rebékah bineesánígíí índa Éíbraham binaal'a'í áádóó diné yił naakaígíí t'áá ałtso bił bida'dzisnii'.

⁶⁰Áádóó Rebékah bá sodazdoolzingo ádabizhdííniid, Nihideezhí nílį́, t'óó ahayóídi miiltsoh bimá dííleeł, áádóó na'áłchíní náás da'ahílchíihii dabijoołáhígíí yik'eh dadidlį́į doo.

⁶¹Áádóó Rebékah hasht'e'ádiilyaago ch'ikę́ę́h ła' biłgo diné bił dashdiikaigo ghą́ą́'ask'idii bee nihijíkai, áko naal'a'í éí Rebékah yił nihiní'áázh.

⁶²Áízak éí Laháíroigi tó hahadleehdę́ę́' jiníyá, háálá kéyah Shádi'ááh hoolyééjí kééhojit'į́.

⁶³Áko i'íí'ą́ągo Áízak halgaigóó joogáałgo na'ák'ítsídzílkeesgo áádóó ajííghal, nít'éé', shoo, ghą́ą́'ask'idii náákahgo dziiłtsą́.

⁶⁴Áko Rebékah ałdó' ajííghal, nít'éé' Áízak dziiłtsą́ągo ghą́ą́'ask'idii bik'i nijííyá.

⁶⁵Áko naal'a'í ábizhdííniid, Níléí diné nihidáahjį' yigáłígíishą' háí át'į́? Áko naal'a'í ání, Shinanit'a'í át'į́. Ákohgo ch'ikę́ę́h binii'jį' yik'é'ésti'.

⁶⁶Áádóó naal'a'í naho'dis'a'góó ájíít'įįdígíí t'áá ałtso bee Áízak bił hojoolne'.

⁶⁷Áízak éí ch'ikę́ę́h yił dah dii'áazhgo bimá Sárah yę́ę biníbaal góne' yił yah íí'áázh, áádóó be'asdzą́ą́ dzizlį́į́', áko Áízak ayóó'áhó'níigo bimá daaztsą́ą́dóó bik'ijį' ha'oosniid.