Read Navajo GENESIS 27 Bible Online

GENESIS 27 - Navajo bible

GENESIS 27

¹Ákódzaago Áízak hadzistihgo doo ajoo'į́į da dzizlį́į́', áko haye' alą́ąjį' nilínígíí Íísa hágo bizhdííniidgo ábijiní, Shiye'! Áko áhodííniid, Jó, kǫ́ǫ́ naashá.

²Áko ájíní, Shoo, k'ad hasistih. Hahgoshį́į́ dadeestsaał éí doo shił bééhózin da.

³Éí bąą t'áá shǫǫdí, k'ad nibee na'azheehí éí nik'aayééł índa ne'ełtį́į́' bił dah diijáahgo halgaigóó dínááh; áádę́ę́' bįįh bitsį' shá niníyeeh,

⁴áádóó atsį' shił yá'át'éhígi át'éego shá hasht'edíílíiłgo shaa dííkááł, áko adeeshghał, índa t'ah doo daastsaahdą́ą́' nik'ijiideeshdliił.

⁵Áko Áízak haye' Íísa bich'į' yájíłti'go Rebékah hodiizts'ą́ą́'. Áádóó Íísa halgaidę́ę́' bįįh nizhdooyééł biniyé ákǫ́ǫ́ ajoolzhee'.

⁶Rebékah hayáázh Jéíkab bich'į' hadzoodzíi'go ábijiní, Shoo, nizhé'é éí nínaaí yich'į' yáłti'go diséts'ą́ą'go ání,

⁷Bįįh bitsį' shá nidííyéełgo yá'át'éehgo shá hasht'edíílííł, áko adeeshghał, áádóó t'ah doo daastsaahdą́ą́' Bóhólníihii binááł nik'ijiideeshdliił.

⁸Éí bąą shiyáázh k'ad bee nich'į' haasdzí'ígíí bik'eh honíł'įįh.

⁹Dibé naakaigóó dínáahgo áádę́ę́' tł'ízí yázhí yá'át'éhígíí naakigo náníjááh, áko nizhé'é éí atsį' t'áá bił łikanígi át'éego bá hasht'edeeshłííł.

¹⁰Índa nizhé'é baa dííkáałgo adoolghał, áádóó t'ah doo daatsaahdą́ą́' nik'ijiidoodliił.

¹¹Áko Jéíkab éí bimá Rebékah áyidííniid, Shoo, Íísa shínaaí éí diné ditł'oii nilį́; shí éí diné dilkǫǫhii nishłį́.

¹²Shizhé'é shídidoolnih, áko shizhdileeh lá nízingo hóyée'go shá hadoodzih; éí t'áá shí ásht'į́įgo doo shik'ihozhdoodliił da.

¹³Áko hamá áháłní, Shiyáázh, hóyée'go ha'doodzihígíí shígo shik'ijį' dooleeł; ándííniidígíí bik'eh honíł'įįhgo níláhdę́ę́' shá náníjááh.

¹⁴Áádóó dashdiiyáago áádę́ę́' hamá bá názhníjaa', áko hamá éí hazhé'é atsį' bił łikanígi át'éego hasht'eyiilaa.

¹⁵Áádóó Rebékah hayáázh alą́ąjį' nilínígíí Íísa bi'éé' yá'át'éhígíí wóne'dę́ę́' nízhdiinilgo hayáázh akéédę́ę́' nilínígíí Jéíkab bee hazhdiilaa.

¹⁶Tł'ízí yázhí bikágí Jéíkab bíla' áádóó bizénágháán gónaa ałdó' bik'ídzísti'.

¹⁷Áádóó atsį' ayóó áhálniihgo hasht'ejiilaii índa łees'áán biłgo hayáázh Jéíkab bílák'ejííką́.

¹⁸Áko hazhé'é baazhníyáago ázhdííniid, Shizhé'é! Áko áhodííniid, Kǫ́ǫ́ sétį́; háishą' ánít'į́, shiye'?

¹⁹Áko Jéíkab bizhé'é áyidííniid, Íísa ásht'į́, alą́ąjį' ná yizhchínígíí; áshidííníniidígíí bi'iishłaa; t'áá shǫǫdí nídii'néehgo nídaah; shibįįh bitsį' nilghał, áko shik'ijídliih.

²⁰Áko Áízak haye' ábizhdííniid, Haaléit'éego t'áadoo hodina'í bik'ííníyá, shiye'? Áko ájíní, Bóhólníihii niDiyin God shíká aalwodgo bik'íníyá.

²¹Áko Áízak éí Jéíkab áyidííniid, Wóshdę́ę́', shíighahgi ninínááh, áko nídideeshnih; t'áá daats'í aaníí shiye' Íísa ánít'į́, dooda daats'í.

²²Áko Jéíkab hazhé'é Áízak bíighah nizhníyáago hódeesnii'go ání, Bizhí la' éí Jéíkab bizhí; bíla' éí Íísa bíla'.

²³Áko hánaaí Íísa bíla' nahalingo hála' ditł'ogo biniinaa t'áadoo hwéédi'nítą́ą da, áko t'óó hak'idzisdli'.

²⁴Áádóó ázhdííniid, Da' t'áásh aaníí shiye' Íísa ánít'į́? Áko ání, Shí lá éí ásht'į́ ni.

²⁵Áádóó ájíní, Shíighah niníkaahgo shiye' bibįįh bitsį' deeshghał, áko nik'iijiideeshdliił. Áko hwíighah niiníką́ągo ajoolghal, índa wáin ałdó' hainíką́ągo joodlą́ą́'.

²⁶Áádóó hazhé'é Áízak áhodííniid, Hágo shiye', shíighah ninínáahgo shiits'ǫs.

²⁷Áko bíighah nizhníyáago jizts'ǫs, áádóó ha'éé' halchinígíí yishchą́ą́', áko hak'ijisdli'go áháłní, Shoo, shiye' halchinígíí éí Bóhólníihii kéyah yik'ijidlíhígi át'éego halchin!

²⁸Éí bąą Diyin God éí yádiłhił biyi'dę́ę́' dahtoo' índa kéyah bikáá' t'áá íiyisí nida'nt'ą́'ígíí áádóó tł'oh naadą́ą́' índa wáin lą'ígo neididoo'ááł.

²⁹Áko bíni' diné ná nidaal'a'; ał'ąą dine'é nich'į' yaa áńdaat'įįh le'. Nik'isóó nídahółníih doo; nimá ba'áłchíní nich'į' yaa áńdaat'įįh doo. Hóyée'go ná hadahadziihígíí éí ałdó' hóyée'go bá hada'iidziih doo; nik'idajidlíhígíí éí bik'idahojidlíi dooleeł!

³⁰Áádóó ákódzaago Áízak éí ałtso Jéíkab bik'ijiijisdli', áádóó Jéíkab hazhé'é Áízak bits'ą́ą́' t'óó ch'éédzídzáhígo hánaaí Íísa naashzhee'dę́ę́' nádzá.

³¹Áko hó ałdó' hazhé'é bá atsį' ayóó áhálniihígíí bá hasht'ejiilaago baazhníką́ągo hazhé'é ábizhdííniid, Nídii'nééh shizhé'é, niye' bibįįh bitsį' nilghał, áko shik'iizhdíídliił.

³²Áko hazhé'é Áízak áháłní, Háí lá ánít'į́įgo ádíní? Áko Íísa ání, Niye' alą́ąjį' ná yizhchínígíí Íísa ásht'į́.

³³Áko Áízak t'áá íiyisí hatah hoditłidgo ájíní, Háí lá t'ah doo nánídááh yę́ędą́ą́' bįįh bitsį' sheiníką́ągo eeshghalgo bik'ijiisisdli' lá? Áko éí t'áá aaníí bik'ihojidlíi doo.

³⁴Ákohgo Íísa éí hazhé'é bizaad jidiizts'ą́ą'go t'áá íiyisí yéego bąą háni'go hajííchah, áko hazhé'é ábijiní, Shizhé'é nílíinii, t'áá shǫǫdí shí ałdó' shik'ijiinídliih.

³⁵Áádóó ání, Nitsilí shi'deezlo'go bee nik'ihojidlíi dooleeł yę́ę nighaideet'ą́.

³⁶Áko ánáázhdoo'niid, Da' doósh t'áá hweełt'éego Jéíkab joolyée da? Jó'akon, k'ad naakidi shitsásk'eh shighahozhdeet'ą́; átséédą́ą́' alą́ąjį' yizhchíinii bee bóhólníihii shighazhdeet'ą́, áádóó jó'akon k'ad nááná bee ak'ihojidlíii shighanáázhdeet'ą́. Áádóó ázhdííniid, Da' bee ak'ihojidlíiísh t'áadoo ła' shá áásínísįįd da?

³⁷Áko Áízak éí Íísa ánéidoo'niid, Jó'akon, bóhoníłníihii áshłaa, áádóó bik'isóó t'áá ałtso bá nidaalte' dooleeł go baa diní'ą́, áádóó tł'oh naadą́ą́' índa wáin bił baa diní'ą́; k'adshą' ha'át'íí íiyisí ná baa nideeshaał, shiye'?

³⁸Áko Íísa hazhé'é ánáábizhdoo'niid, Da' t'ááshłá'í nibee ak'ihojidlíhí nít'éé', shizhé'é? T'áá shǫǫdí shizhé'é, shí ałdó' shik'ijiinídliih. Áko Íísa yéego hajííchah.

³⁹Hazhé'é Áízak hach'į' hanáánáádzíi'go áháłní, Jó'akon, kéyah bikáá' nida'nt'ą'ígíí bits'áhoní'ą́ądi áádóó yádiłhiłdę́ę́' dahtoo' bits'áhoní'ą́ądi kééhót'į́į doo.

⁴⁰Nidiltłish bee hinínáa doo, áádóó nitsilí bóhwííníłníih doo; ííshją́ą́ biyaa háíníyáago doo bóhwííníłníih da dííleeł.

⁴¹Éí bąą Íísa t'áá íiyisí Jéíkab bik'eezdeeznih, háálá hazhé'é bee ak'ihojidlíii yee yik'idzisdli', áko Íísa t'áá biyi'ídi ání, Shizhé'é baa dazhdoochahjį' áhání hadziih; áadi índa Jéíkab shitsilí hodiyeeshxééł.

⁴²Áko Rebékah hayáázh alą́ąjį' nilínígíí bizaad bee hoł hóone'go hayáázh akéédę́ę́' nilínígíí bíká i'jííł'a'go hágo bizhdííniidgo ábijiní, Shoo, nínaaí Íísa kót'éego naa nitsékees lá; hodiyeeshxééł nízingo yee ha'ólníí lá.

⁴³Éí bąą shiyáázh, k'ad ándishnínígíí bik'eh honíł'įįh; asht'e'ádílnéehgo Héírangóó shínaaí Léíban bich'į' tsį́įłgo ákǫ́ǫ́ dínááh;

⁴⁴áadi díkwíida niidoołkááł; nínaaí bá náhoojǫǫdgo índa;

⁴⁵nínaaí nich'į' bá náhoojǫǫdgo áádóó íínít'įįdii yaa yooznahgo índa níká adeesh'aał, áko áádę́ę́' nídíídááł. Ha'át'éegoshą' t'áá ánółah t'áá ła'óo jį́ shąąh dínóohnééł?

⁴⁶Áko Rebékah éí Áízak áyidííniid, Het dine'é bitsi'ké biniinaa hinishnánígíí sé'įįd, áko Het dine'é bitsi'ké ła' díí kéyahgi kéédahat'ínígíí Jéíkab be'asdzą́ą́ silį́į'go t'áadoo biniyéhígóó hinishnáa doo.