Read Navajo GENESIS 28 Bible Online

GENESIS 28 - Navajo bible

GENESIS 28

¹Áádóó Áízak éí Jéíkab hágo yidííniidgo yik'i sodoolzin, áádóó hazhó'ógo bee bił hojoolne'go ábizhdííniid, Kéínan dine'é bitsi'ké ts'ídá doo ła' ne'asdzą́ą́ ádíílíił da.

²Asht'e'ádílnéehgo nimá bizhé'é Biithúwel bighangóó Péídan-éíram hoolyéejį' dínááh; áadi nimá bínaaí Léíban bitsi'ké ła' ne'asdzą́ą́ ádíílííł.

³Diyin God Aláahgo Ayóó'ábóodziilii nik'ijidlíi doo, áádóó náás nooht'į́įłgo índa k'ee'ąą nooht'į́įłgo ándoolííł, áko diné nááséełii nohłį́į doo.

⁴Áádóó Éíbraham bee bik'ihodzisdli'ii éí na'áłchíní náás da'ahílchíhígíí t'áá bił nik'ihwiizhdoodliił, áko dé'éyóní nílį́įgo kéyah bikáá' nanináhígíí Diyin God éí Éíbraham yeidiní'áanii bee níhólníih dooleeł.

⁵Áko Áízak haye' Jéíkab dashdiił'a', áádóó Péídan-éíramgóó Síriya dine'é Biithúwel biye' éí Jéíkab áádóó Íísa bimá Rebékah bínaaí Léíban bich'į' ajííyá.

⁶Ákohgo Íísa díí hoł bééhoozin: Áízak éí Jéíkab yik'ijisdli' lá, áádóó Péídan-éíram hoolyéédóó hwe'asdzą́ą́ dooleełii nízhdidoołtééł biniyé ákǫ́ǫ́ ahóół'a', áádóó bik'ijiijisdli'go hazhó'ó bizhníłnii'go ábijiní, Kéínan dine'é bitsi'ké ts'ídá doo ła' ne'asdzą́ą́ ádíílíił da,

⁷áádóó Jéíkab bizhé'é índa bimá yik'eh hóół'įįdgo Péídan-éíram hoolyéégóó ííyá.

⁸Hazhé'é éí Kéínan dine'é bitsi'ké doo bił aaníígóó hoł bééhoozingo

⁹Íísa dashdiiyáago Íshmeiyel bighangi jiníyá; áádę́ę́' asdzání hwe'asdzą́ą́ dooleełii éí Éíbraham biye' Íshmeiyel wolyéii bitsi' Méíhalah wolyéego Nibéíyah yilah nilį́įgo hwe'asdzą́ą́ dooleeł biniyé nínáázhdiiłtį́.

¹⁰Áko Bíyer-shííba hoolyéédóó Jéíkab dashdiiyáago Héírangóó ajííyá.

¹¹Áádóó i'íí'ą́ągo bąą t'áá ádzaagi hwiiską́; ákwii tsé ła' nízhdii'ą́ągo hatsii'áál ájiilaago jineeztį́įgo ajiiłhaazh.

¹²Nít'éé' kót'éego nidziizyeel, jó'akon, nahasdzáán bikáá'dóó haaz'éí yádiłhił biní'á; éí bikáá'dóó Diyin God bidiyingo nidaal'a'í dego áádóó yaago ałnánákahgo jiiłtsą́.

¹³Áádóó, shoo, éí bilááhdę́ę́' Bóhólníihii sizį́įgo ání, Bóhólníihii ásht'į́, nizhé'é yę́ę Éíbraham biDiyin God áádóó Áízak yę́ę biDiyin God nishłį́; kéyah bikáá' sínítíinii naa dinish'aahígíí na'áłchíní náás da'ahílchíihii ałdó' baa dideesh'ááł.

¹⁴Áádóó nahasdzáán bikáa'gi łeezhígi ánéelą́ą'go na'áłchíní ákónéelą́ą' doo; e'e'aahjigo áádóó ha'a'aahjigo áádóó náhookǫsjigo áádóó shádi'áahjigo k'ee'ąą deílzhíish doo, áko ni ninahjį' índa na'áłchíní náás da'ahílchíihii binahjį' nahasdzáán bikáa'gi ał'ąą dine'é t'áá ałtso bik'ihozhdoodliił.

¹⁵Jó'akon, nił honishłǫ́; t'áá hidínááhgóó naa áháshyą́ą doo, áádóó díí kéyahgi nił nínáádeesht'ash; bee nich'į' haasdzíi'ii bi'iishłaajį' doo nits'ą́ą́' dahodideeshłeeł da.

¹⁶Áko Jéíkab ch'éédzídzidgo ázhdííniid, T'áá aaníí Bóhólníihii kwe'é hólǫ́ǫgo doo shił bééhózin da lá.

¹⁷Áko nídzíldzidgo ázhdííniid, Dooládó' kwe'é náhádzid da lá! Díí t'áá aaníí Diyin God bighan lá; yá'ąąsh bich'é'étiin át'éé lá.

¹⁸Áko Jéíkab t'ah abíínígo nízhdii'na'go tsé hatsii'áál ájiilaii nízhdii'ą́ągo ajíítsih, índa bílátahgi ak'ah yadziiziid.

¹⁹Ákwe'é Béthel hoolyée doo, jidííniid; bitséédą́ą́' Luz hoolyéego kin haal' áá nít'éé'.

²⁰Áko Jéíkab ádee hadzoodzíi'go ázhdííniid, Diyin God shił hólǫ́ǫgo áádóó naasháágóó shaa áhályą́ągo áádóó sha'ałtso'go áádóó éé' yee hááshidoodlíiłgo

²¹índa shizhé'é bighandi hózhǫ́ǫgo baa nínáádeeshdáałgo Bóhólníihii shiDiyin God nilį́į doo,

²²áádóó tsé íí'áago íishłaaígíí éí Diyin God bighan doo, áádóó t'áá ałtso shaa hidí'aahígíí neeznáá daníjaa'ígíí éí t'ááłá'í shijaa' naa náhidish'aah doo.