Read Navajo GENESIS 29 Bible Online

GENESIS 29 - Navajo bible

GENESIS 29

¹Áádóó Jéíkab dah náádiidzáago ha'a'aah biyaadi diné kéédahat'ínígíí bikéyahdi jiníyá.

²Áko hajííghal, nít'éé' jó'akon, halgaigi tó hahadleeh bíighahgi táa'go dibé dah danéelkaadgo shijéé'; éí tó hahadleehígi nída'adlį́į́h lá, áko tsé ayóó áníłtsogo tó hahadleeh bidáádiní'ą́.

³Ákwe'é tó hahadleeh tsé bidádiní'áanii nahgóó anídeiłmasgo ákwii dibé t'áá ałtso ahanináhinilka'ígíí nída'adlį́į́h, áádóó tsé t'áá si'ą́ yę́ęjį' anídeiłmas lá.

⁴Áko Jéíkab áháłní, Shik'isóó, háádę́ę'shą' ádaaht'į́? Áko ádaaní, Héírandę́ę́' ádeiit'į́.

⁵Áko ánáábizhdoo'niid, Da' nihíísh Néíhor binálí Léíban wolyéii béédahonohsin? Áko áhodííniid, Aoo', béédahoniilzin.

⁶Da' yá'át'éehgoósh kééhat'į́? Áko ádadííniid, Aoo', yá'át'éehgo kééhat'į́. Jó, aadę́ę́' bitsi' Réíchel anoołkał.

⁷Áko ázhdííniid, Áko lá t'ahdii nízaa'az'ą́ ni; da'alį́į́' ahandadínóolkałgo t'ah doo baa hoolzhíish da; dibé da'oodlą́ą'go índa nílááhgóó bíni' ninááda'ałchozh doo.

⁸Áko ádadííniid, Dooda; t'áá ałtso ahanda'niilka'go índa tsé éí tó hahadleeh bidádiní'ánígíí nahgóó anídeilmasgo, índa dibé nída'adlį́į́h.

⁹Áko t'ahdii bił ałch'į' yádajiłti'go Réíchel hazhé'é bilį́į́' jininíłkaad, háálá éí nazh'niłkaad.

¹⁰Ákódzaago Jéíkab hamá bínaaí Léíban bitsi' Réíchel áádóó hamá bínaaí Léíban bilį́į́' jiiłtsą́ągo baazhníyá, áko Jéíkab éí tséhígíí tó hahadleeh bidádiní'áanii nahgóó ayííł máazgo hamá bínaaí Léíban bilį́į́' da'oodlą́ą́'.

¹¹Áádóó Jéíkab éí Réíchel yizts'ǫsgo yícha.

¹²Kójíníigo Réíchel bił hojoolne', Nizhé'é éí shidá'í át'é; Rebékah biyáázh nishłį́, áko áádóó Réíchel dashdiilwodgo hazhé'é bił hojoolne'.

¹³Ákódzaago Léíban hadeezhí biyáázh Jéíkab níyá ha'níigo jidiizts'ą́ą'go ákǫ́ǫ́ bidááh jílwod, áádóó bizééjízhchidgo jizts'ǫs, índa haghangóó bił níjít'áázh, áko díidí t'áá ałtso bee Léíban bił nahojisne',

¹⁴áko Léíban áhodííniid, T'áá aaníí shits'in áádóó shits'íís nílį́į́ lá! Áko t'áá ákwe'é ba'ałk'ee dzizdáago ła' nídeezid.

¹⁵Áádóó Léíban éí Jéíkab áyidííniid, Da' t'óósh shidá'í nílínígíí bąą t'áá níík'eh shá nanilnish doo? Shił hólne', díkwíishą' bik'é nanilnish doo?

¹⁶Áko Léíban éí bitsi' naaki, alą́ąjį' nilínígíí Líyah wolyé, akéédę́'ígíí éí Réíchel wolyé.

¹⁷Líyah éí ha'át'e' ádin joolnáá', nidi Réíchel éí t'áá íiyisí ayóó ánóolnin áádóó baadzólní.

¹⁸Áko Jéíkab éí Réíchel ayóó'áyó'níigo ání, Nitsi' Réíchel, akéédę́ę́' naagháhígíí, tsosts'id nááhaijį' bideená ná naashnish doo.

¹⁹Áádóó Léíban ání, Nigo éí t'áá ákónéehee naa nishteeh doo; diné náánáła'go éí dooda, áko t'áá kǫ́ǫ́ naniná.

²⁰Áko Jéíkab éí Réíchel bik'é nijilnishgo tsosts'id nááhai, áko ayóó'ájó'níigo bąą t'áá díkwíí yee' yiską́ hoł nahalin.

²¹Áko Jéíkab éí Léíban áyidííniid, She'asdzą́ą́ dooleełígíí shaa níłteeh, háálá k'ad beiníłką́, áko bił ahaa deesht'ash.

²²Léíban éí diné ákwe'é kéédahat'ínígíí áłah áyiilaago áda'íísįįd.

²³Ákódzaago hiłiijį́į'go bitsi' Líyah yił haa ní'áázh, áádóó bił yah ajííyá.

²⁴Léíban éí asdzání há naal'a'í Zílpah wolyéii éí hatsi' Líyah yá naal'a' doo biniyé baazhníłtį́.

²⁵Ákódzaago abínígo jó'akon, Líyah át'į́į́ lá, áko Léíban ábizhdííniid, Díishą' haa shííníł'įįd? Shą́ą́', Réíchel bik'é ná naash'a' ni'. Ha'át'éegoshą' shi'díínílo'?

²⁶Áko Léíban ádííniid, Nihikéyahgi doo ákódaat'į́į da; akéédę́ę́' naagháii doo átsé diné baa yílteeh da; alą́ąjį' yizhchíinii éí átsé ádeił'į́.

²⁷Díí bił síníkéego t'ááłáhídi damóo adooleeł, áádóó índa ła'ígíí naa náádadiiltééł; éí bik'é shá nanilnishgo tsosts'id nínáádoohah.

²⁸Áko Jéíkab ákódzaago éí bee hach'į' ha'oodzí'ígíí bíighah adzisłį́į'go índa bitsi' Réíchel ałdó' haa néiníłtį́.

²⁹Áádóó Léíban éí asdzání há naal'a'í Bílhah wolyéii éí hatsi' Réíchel yá naal'a' doo biniyé baazhníłtį́.

³⁰Jéíkab éí Réíchel yił yah anáánáádzá, áko Líyah biláahgo Réíchel ayóó'ájó'ní, áádóó bik'é nijilnishgo tsosts'id nínáánááhai.

³¹Bóhólníihii éí Líyah bijijoodláago bił bééhózin, áko jooltsą́ągo áhoolaa, nidi Réíchel éí doo ałchíi da.

³²Líyah izh'niiltsąądgo ashkii jishchį́; éí ashkii Rúben bee jíízhi'go ázhdííniid, T'áá aaníí shich'į' nahwiiłnáanii Bóhólníihii shá yaa ákoniizį́į́'; k'ad shahastiin ayóó'áshó'níi doo.

³³Áádóó anáázh'niiltsąądgo ashkii náájíshchį́, áko ánáázhdí'ní, Shiji'joodláhígíí éí Bóhólníihii shá yidiizts'ą́ą́'; éí biniinaa díí ashkii shaa néiníłtį́, áko éí ashkii Símiyan bee jíízhi'.

³⁴Náá'ákóne' anáázh'niiltsąądgo ashkii náájíshchį́, áko ázhdííniid, K'ad lá índa shahastiin bił hinish'náa doo ni, háálá táadi haye' há shéłchį́, áko díí bąą ashkii Líívai bee jíízhi'.

³⁵Náábíkéé' góne' anáázh'niiltsąądgo ashkii náájíshchį́, áko ánáázhdoo'niid, K'ad Bóhólníihii baa hashniih doo; díí biniinaa ashkii Júdah bee jíízhi', áádóó t'áadoo náá'jíshchį́į da.