Read Navajo GENESIS 3 Bible Online

GENESIS 3 - Navajo bible

GENESIS 3

¹Áko íídą́ą́' tł'iish agháago nítséékosii éí nihokáá'góó naaldeehii Bóhólníihii Diyin God ábiilaaígíí t'áá ałtso yiláahgo át'é. Áko asdzání áyidííniid, Da' t'áásh aaníí Diyin God kóní, Tsin t'áá ałtso dá'ák'ehgi naazkaadígíí t'áadoo bąąhdóó ohsání?

²Áádóó asdzání éí tł'iish áyidííniid, Tsin bineest'ą' yiidą́ biniyé dá'ák'ehgi naazkaadígíí nihaa deet'ą́,

³nidi tsin bineest'ą' hólóonii dá'ák'eh ałníi'gi sikaadígíí éí Diyin God ánihiłní, Éí doo bąąhdóó adoohsį́įł da; bidinoołchidgo éí dínóohnééł.

⁴Áádóó tł'iish éí asdzání ánéidoo'niid, Doo t'áá aaníí dínóohnéeł da,

⁵háálá Diyin God bił bééhózin, éí bijį́ wooyą́ą'go jideezghaliigi ádoohnííł áádóó Diyin Godgi ánóht'ée doo; yá'át'ééhjí índa doo yá'át'ééhjí nihił ééhodoozįįł.

⁶Áádóó asdzání éí tsin bineest'ą' ch'iyáán yá'át'éehii át'éego áádóó bik'izhníghalgo hoł yá'íít'éehgo índa tsin la' t'áá hojíyą́ áhóle'ígi át'é dziniizį́į'go bineest'ą' ła' nizhdii'ą́ągo jííyą́ą́', áádóó hahastiin ałdó' ła' baazhní'ą́ągo yiyííyą́ą́'.

⁷Áko t'áá ájíłah jideezghaliigi ádziidzaago t'áá jilchí'ígo hoł bééhoozin, áko fig sikaadii bit'ąą' ahídazhdiiłkadgo bee átł'adziskał.

⁸Áádóó honiik'aazgo dá'ák'ehgi Bóhólníihii Diyin God honíle'go biinéé' dzidiizts'ą́ą́', áko Ádam hwe'asdzą́ą́ bił dá'ák'ehgi tsintahgi Bóhólníihii Diyin God bits'ąą nízdeest'į́į́'.

⁹Áádóó Bóhólníihii Diyin God éí Ádam yíká ádííniidgo áyidííniid, Háadish naniná?

¹⁰Áko ázhdííniid, Dá'ák'ehgi niinéé' diséts'ą́ą'go nísísdzííd, háálá t'áá łinishchí'í; éí bąą nídísht'į́į́'.

¹¹Áádóó Bóhólníihii ádííniid, Háísh, T'áá łiníchí'í, niłní? Da' tsin doo bąąhdóó adííyį́įł da, nidishní yę́ęésh bąąhdóó ííníyą́ą́'?

¹²Áko diné ázhdííniid, Asdzání shéíníłtį́įgo bił naash'aashígíí éí sha'níłtsoodgo yíyą́ą́'.

¹³Áádóó Bóhólníihii Diyin God éí asdzání áyidííniid, Díishą' ha'át'íí baa nisíníyá? Áko asdzání ázhdííniid, Tł'iish shina'azlo'go bíniik'ehgo yíyą́ą́'.

¹⁴Áádóó Bóhólníihii Diyin God éí tł'iish áyidííniid, Díí baa nisíníyáhígíí biniinaa alį́į́' t'áá ałtso biláahgo áádóó nihokáá'góó naaldeehii t'áá ałtso biláahgo hóyée'go ná ha'oodzíí'; nibid bee nani'na' doo; łeezh nildeełgo níyoołkáałgo hinínáa doo.

¹⁵Áádóó ni índa asdzání bił ałk'ee diní'niihgo ádeeshłííł; na'áłchíní índa éí ba'áłchíní yił ałk'ee dadi'niihgo ádeeshłííł; éí nitsiits'iin yidoołjish; ni éí bikétal dííłjish.

¹⁶Asdzání ałdó' áyidííniid, Ts'ídá ayóó át'éego yínííł nide ánát'įįhgo i'niiłchíihgo ti'hoyíníihgo ádeeshłííł; nił nahonigaahgo ni'iyíłchíih doo; nahastiin bídin nílį́į doo, áádóó bí bóhoníłníih doo.

¹⁷Áádóó Ádam ałdó' áyidííniid, Ne'asdzą́ą́ ánínígíí yísíníłts'ą́ą'go, Tsin doo bąąhdóó adííyį́įł da, nidishní yę́ę bąąhdóó ííníyą́ą́'; éí bąą niniinaa ni' hóyée'go bá ha'oodzíí'; nich' į' nahwii'náago nanilnishgo bits'ą́ą́dóó i'dílnahgo ni'dííłdįįł;

¹⁸ch'il dadeeníinii índa hosh ałdó' nich'į' hááhinoot'į́į́ł; dá'ák'ehdóó nidanise'ii niyą́ą doo.

¹⁹Łeezh nísínídlį́į'jį' nitásiil nahgóó ahíghaasgo nanilnishgo índa íyą́ą doo, háálá łeezh bits'ą́ą́dóó áni'diilyaago łeezh nílį́, áko łeezh nídíídleeł.

²⁰Ádam éí hwe'asdzą́ą́ Íiv bee jíízhi', háálá dajiináanii t'áá ádzíłtso hamá silį́į́'.

²¹Áádóó Bóhólníihii Diyin God éí Ádam índa be'asdzą́ą́ ałdó' bá akágí éé' ájiilaa áádóó bee hazhdiilaa.

²²Áádóó Bóhólníihii Diyin God ádííniid, Shoo, diné t'áá nihígi át'éego yá'át'ééhjí áádóó doo yá'át'ééhjí bił bééhózin silį́į́'. Áko k'ad kodóó iiná tsin bineest'ą' neidi'doo'áałgo yidooyį́įłgo bá hashja'doolííł dó'óshłí áádóó hináago ahool'áa doo.

²³Éí bąą Bóhólníihii Diyin God éí Ííden dá'ák'ehdóó nahgóó ahonííyood, áko łeezh bits'ą́ą́dóó áho'diilyaaígíí t'áá éí bininájílnish dooleeł.

²⁴Áko diné ch'ínizhníłchą́ą́' áádóó Diyin God éí dá'ák'eh Íídendi ha'a'aahjígo diyingo nidaal'a'í áádóó kǫ' bits'áhodino'ii diltłishgi át'éego t'áá ałtsogóó náálkiłgo iiná tsin bich'į' atiinígíí yaa ádahalyą́ą doo biniyé niinínil.