Read Navajo GENESIS 30 Bible Online

GENESIS 30 - Navajo bible

GENESIS 30

¹Áko Réíchel éí Jéíkab doo bá ajiłchíígóó hádí joołch'į́į́d, áko Jéíkab ábijiní, Áłchíní ła' shaa nínííł, doodago éí dadeestsaał.

²Áko Jéíkab éí Réíchel bich'į' hashkézniidzį́į'go ázhdííniid, Da' shíísh Diyin God sizínígi sézį́įgo doo íłchíígóó ániishłaa?

³Áko Réíchel ádííniid, Shoo, shá naal'a'í Bílhah bił yah aninááh, áko azhdoołchíiłgo honiiłt'aa sha'áłchíní hodooleeł.

⁴Áádóó há naal'a'í Bílhah hwe'asdzą́ą́ dooleeł biniyé haazhníłtį́, áko Jéíkab hoł yah ííyá.

⁵Áko Bílhah i'niiltsąądgo ashkii Jéíkab yá yishchį́.

⁶Áádóó Réíchel ádííniid, Diyin God shá yaa nást'įįd, áádóó shidiizts'ą́ą'go shiyáázh sheiníłtį́; díí bąą ashkii éí Dan bee jíízhi'.

⁷Réíchel bá naal'a'í Bílhah ináá'niiltsąądgo Jéíkab bá ashkii náájíshchį́.

⁸Áko Réíchel ánáádoo'niid, Ayóó át'éego shádí bił ahaa naasht'aashgo baa honíłná, áko ashkii éí Náftalai bee jíízhi'.

⁹Áko Líyah doo náá'jílchíígóó ha'ízh'deel'į́į́', áko há naal'a'í Zílpah éí Jéíkab be'asdzą́ą́ dooleeł biniyé baazhníłtį́.

¹⁰Áádóó Líyah bá naal'a'í Zílpah éí Jéíkab yá ashkii yishchį́.

¹¹Líyah ádííniid, Shich'ohasne'! Éí bąą ashkii éí Géed bee jíízhi'.

¹²Áko Líyah bá naal'a'í Zílpah éí Jéíkab bá ashkii náájíshchį́.

¹³Líyah ánáádoo'niid, Shił hózhǫ́! Háálá diné dabitsi' éí bik'ihojidlíii dashiłníi doo, áko ashkii éí Ásher bee jíízhi'.

¹⁴Áádóó tł'oh naadą́ą́' ádaalne'jį' ayííłką́ągo Rúben halgaigóó ííyá, áko ch'il bich'į' ni'iichíhígíí yik'íníyáago bimá Líyah yá néiníłjool, ákohgo Réíchel éí Líyah áyidííniid, T'áá shǫǫdí niyáázh ch'il néiníłjoolígíí ła' shaa níłjooł.

¹⁵Líyah áhodííniid, Da' shahastiin shits'ąą naní'aahígíísh t'įįhdígo íínít'įįdgo baa nitsíníkees? Da' ákoósh shiyáázh bich'il dah náádidííłjoł? Áko Réíchel ádííniid, Niyáázh bich'il shaa níłjooł, áko díí tł'éé' Jéíkab nił dízhnóotish.

¹⁶Áádóó i'íí'ą́ągo Jéíkab dá'ák'ehdę́ę́' náádáałgo Líyah ch'íníyáago hadááh níyá, áko ádííniid, T'áá shił yah adíínáłí, háálá shiyáázh bich'il bik'é niníłjool. Áko t'áá éí bitł'éé' hoł jineezhtéézh.

¹⁷Áko Líyah ázhdííniidígíí Diyin God yidiizts'ą́ą'go izh'niiltsąąd, áádóó Jéíkab bá ashkii náájíshchį́; éí bił ashdladi ajishchį́.

¹⁸Áko Líyah ání, Shá naal'a'í shahastiin baa níłtį́įgo bąą Diyin God shich'į' na'nílá, áko ashkii éí Ísakar bee jíízhi'.

¹⁹Náá'áłdó' Líyah ináá'niiltsąądgo Jéíkab bá ashkii náájíshchį́; éí bił hastą́ądi ajishchį́.

²⁰Áko Líyah ání, Diyin God éí aa yílyáii shá áyiilaa; k'ad shahastiin shił sikée doo, háálá biye' hastą́ą́h bá shéłchį́, áko ashkii éí Zébyulan bee jíízhi'.

²¹Áádóó bik'ijį' hach'é'é jishchį́įgo at'ééd éí Dáínah bee jíízhi'.

²²Áko índa Diyin God éí Réíchel yénáálnii', áádóó Diyin God hodiizts'ą́ą'go jooltsą́ągo áhoolaa.

²³Áko Réíchel izh'niiltsąądgo ashkii jishchį́, áádóó ájíní, Doo ił nishłį́į da yę́ę Diyin God shits'áidiní'ą́;

²⁴ashkii éí Jóseph bee jíízhi'go ájíní, Bóhólníihii bíni'dii shiyáázh ła' shaa nááyółtééł.

²⁵Ákódzaago Réíchel hayáázh Jóseph jishchį́įgo Jéíkab éí Léíban áyidííniid, Kééhasht'į́į́ nít'é'ígóó shikéyahgóó nídeeshdleeł biniyé nihééshidííł'aał.

²⁶Sha'ákéí índa sha'áłchíní bideená ná nishishnish nít'é'ígíí shaa nínííł, áko shíni' dah diishnééh, háálá ná nishishnishígíí nił bééhózin.

²⁷Nidi Léíban áháłní, Shich'oha'néego shaa nitsíníkees ládą́ą́' t'áá shǫǫdí t'áá kǫ́ǫ́ sínídá, háálá lą'ígóó shił ni'ééhwiizįįdgo niniit'aa Bóhólníihii shik'ijidlíigo shił bééhoozin.

²⁸Díkwíishą' bik'é nanilnish doo éí bee shił hólne', ákohgo nich'į' ni'iishłée doo.

²⁹Áko ábizhdííniid, Nił bééhózingo ná choisí'įįd, áádóó nilį́į́' baa áháshyą́ą́ nít'éé'.

³⁰T'ah doo naa nishááhdą́ą́' nilį́į́' áłch'į́į́dí yee' nít'éé', áko k'ad t'óó ahayóí silį́į́'; naa níyáádóó índa Bóhólníihii nik'ijidlíigo hodideeshzhiizh, ákohgo hahgoshą' sha'áłchíní daabí dooleełígíí nabik'ítsískees doo? jidííniid.

³¹Áko ánáádoo'niid, Ha'át'íishą' naa deeshłééł? Jéíkab ání, Doo ha'át'íhída shaa dííléeł da; t'óó kóshidíílíiłgo nilį́į́' ná ninááníshkaad doo índa baa áháshyą́ą doo.

³²Díí jį́ nilį́į́' bitahgóó deesháałgo áádę́ę́' dibé daastł'inígíí áádóó daalkizhígíí ats'ádeesh'nił, áádóó dibé bitahdę́ę́' dibéłchí'í t'áá ałtso, áádóó tł'ízí bitahdę́ę́' tł'ízí daalkizhígíí índa daastł'inígíí ats'ádeesh'niłgo éí bik'é ná naashnish doo.

³³Baa hoolzhiizhgo shich'į' nidííléłígíí biniyé yíníyáago sha'át'e' ádingo nił bééhodoozįįł. Tł'ízí bitahdę́ę́' tł'ízí doo daastł'inígíí áádóó doo daalkizhígíí t'áá ałtso índa dibé bitahdę́ę́' doo dibéłchí'ígi ádaat'éhígíí ła' shilį́į́' bitah yiniłtsą́ągo ííshją́ą́ neest'į́į'ii ádaat'ée doo.

³⁴Áádóó Léíban ání, Shił t'áá áko, t'áá ádííníniidígi át'ée doo.

³⁵Ákohgo t'áá éí bijį́ Léíban éí tł'ízíką' danoodǫ́zígíí áádóó daalkizhígíí áádóó tł'ízí dabi'áadii daalkizhígíí áádóó daastł'inígíí t'áá ałtso t'áá hait'éegoda dah daalgaígíí t'áá ałtso, índa dibé bitahdę́ę́' dibéłchí'í t'áá ałtso haye'ké éí yaa ádahalyą́ą dooleełgo bá ats'ázh'nínil,

³⁶áádóó tágí jį́ oodááł bíighah ánízáágóó Jéíkab bits'ádzískai, áádóó Léíban bilį́į́' łahjį'ígíí éí t'áá ákǫ́ǫ́ Jéíkab há yaa áhályą́.

³⁷Ákódzaago Jéíkab éí t'iis áádóó tsin héízel wolyéii índa chésnat wolyéii bits'áoz'a' daditłé'ígíí néidiinilgo náhineesk'ęę'go yídayíízǫ́ǫzgo łigaigo noodǫ́ǫzgo áyiilaa.

³⁸Áko tsin bídzíízǫ́ǫzgo noodǫ́ǫzgo ájiilaaígíí dibé yii' da'adlánígíí biyi'gi adadziztsih, áko dibé da'adlą́ągo adadí'nóoltsąął dzinízingo ájít'į́.

³⁹Áko dibé índa tł'ízí ałdó' tsin yidááhdóó ada'niiltsąąd; biyázhí daashtłizh áádóó daastł' in índa daalkizhgo nidayiishchį́.

⁴⁰Áko Jéíkab éí dibé yázhí ats'éinínil áádóó Léíban bilį́į́' bitahgóó dibé daashtłizhígíí índa dibéłchí'ígíí yił neiniłkaad. Áko Jéíkab t'áá sahdii bilį́į́' neiniłkaadgo t'áadoo Léíban bilį́į́' yitah yiinínil da.

⁴¹Ákót'éego alį́'ígíí aláahgo dabidziilii adadí'nóoltsąąłgo tsinígíí bíighahgi inída'niiltsąąh doo biniyé Jéíkab éí alį́'ígíí binááł tsinígíí éí tsé yii' nída'adlį́hígíí yiih néí'nił.

⁴²Nidi alį́į́' doo dabidziilígíí éí doo tsin yá ninéí'nił da, áko doo dabidziilígíí éí Léíban bí; dabidziilígíí t'éiyá Jéíkab bí.

⁴³Áko Jéíkab t'áá íiyisí azdeest'įįd; halį́į́' áádóó asdzání há nidaalte' áádóó diné há nidaalte' áádóó ghą́ą́'ask'idii índa télii t'óó ahóóyóí.