Read Navajo GENESIS 32 Bible Online

GENESIS 32 - Navajo bible

GENESIS 32

¹Áádóó Jéíkab dah náázhdii'náago joonééł nít'éé'; Diyin God bidiyingo nidaal'a'í hadááh yíkai,

²áko Jéíkab yiyiiłtsą́ągo ádííniid, Dííyee' Diyin God bits'ą́ą́dóó dah oonéełii át'éé lá! Áko ákwe'é Meihanéíyim hoolyée doo, jidííniid.

³Áko Jéíkab éí Síyer nahós'a'jį' t'áá éí kéyah Íídam hoolyéejį' hánaaí Íísa bich'į' hane' nidei'áhí alą́ąjį' adziis'a'.

⁴Hane' nidei'áhí ábizhdííniid, Shinanit'a'í Íísa kódabididoohniił, Ná naal'a'í Jéíkab kóní, Léíban bił tádíshnééh nít'éé', índa ákwe'é sédáago kojį' ahoolzhiizh,

⁵áko béégashii áádóó télii áádóó dibé áádóó diné nidaal'a'í índa asdzání nidaal'a'í shee hólǫ́, áko ajooba' bee shich'oha'néego shąąh tsídookos biniyé shinanit'a'í bił hodoonihgo i'ííł'a'.

⁶Áko hane' nidei'áhí nát'ą́ą́' Jéíkab yaa nákaigo ádaaní, Nínaaí Íísa baa niikai, áko bí ałdó' áádę́ę́' diné dį́įdi neeznádiingo yił nidáahjį' deeskai.

⁷Ákohgo Jéíkab ayóó át'éego nídzísdzíidgo ádił nisidzídzá, áko diné bił joonéłígíí áádóó dibé áádóó béégashii índa ghą́ą́'ask'idii naakijį' ałts'ádadziznilgo

⁸ázhdííniid, Íísa t'ááłá'í dah oonééł neistseedgo ła'ígíí éí dadoodzih.

⁹Áko Jéíkab ádííniid, Shizhé'é Éíbraham biDiyin God nílíinii, shizhé'é Áízak biDiyin God nílíinii Bóhólníihii, shą́ą́' áshidiní, Nikéyahgóó nik'éí bich'į' nídídááh, áko yá'át'éehgo naa nitsískees doo,

¹⁰bee a'ááh nínízinii áádóó nit'áá aaníinii t'áá át'é kóníshéhí nidi ná naal'a'í nishłíinii bił bééhosínísįįdígíí nádį́'ídi doo bą́ą́h anishłį́į da, háálá shigish t'éiyá hólǫ́ǫgo díí Jórdan tooh tsé'naa niníyá, áko k'ad yisht'ínígíí naakigo dah oonééł silį́į́'.

¹¹Nánooshkąąh, shínaaí Íísa bits'ą́ąjį' yisdáshíłteeh, háálá binásdzid; shaa doogáałgo shidiyoołhééł, índa amá danilíinii ba'áłchíní t'áá yił ałdó' neidoołtsił.

¹²Áádóó ádííníniid ni', T'áá aaníí nik'ijishdlíi doo, índa na'áłchíní náás da'ahílchíihii tónteel bibąąhgi séiigi át'éego doo wóolta' ánéelą́ą' da dooleeł.

¹³Áko éí bitł'éé' t'áá ákǫ́ǫ́ hwiiską́, áádóó t'áá ákǫ́ǫ́ bił dah joonéłígíí hánaaí Íísa baazhdooniłígíí bá ats'ázhnínil;

¹⁴tł'ízí dabi'ádígíí naakidi neeznádiingo áádóó tł'ízíką' naadiingo áádóó dibé dabi'ádígíí naakidi neeznádiingo índa deenásts'aa' naadiingo,

¹⁵ghą́ą́'ask'idiitsa'ii tádiingo dabiyázhí t'áá bił, béégashii dabi'ádígíí dízdiingo, dóola neeznáá áádóó téliitsa'ii naadiingo índa dabiyázhí ałdó' neeznáá bóóltą'go bá ats'ázhnínil.

¹⁶Áko t'áá da'ał'ąą dah naazhjaa'go há nidaal'a'í bá ats'á'dziiznil, áádóó há nidaal'a'í ábizhdííniid, Shilą́ąjį' tsé'naa nihohnééh; nihita' honí'ą́ągo danóołkaad.

¹⁷Alą́ąjį'ígíí ábizhdííniid, Shínaaí Íísa nidááh níyáago áádóó nanídééłkidgo, Háishą' bíí' nílį́? Háágóoshą' díníyá? índa, Díí nííłkałígíishą' háí bí? nidííniidgo

¹⁸kódidííniił, Ná naal'a'í Jéíkab bí; shinanit'a'í Íísa yeínííł, áádóó ałdó' t'áá bí nihikéédę́ę́' yinééł.

¹⁹Naaki góne'ígíí áádóó náá'ákéédę́'ígíí áádóó t'áá ałtso ałkéé' da'néełkaadígíí ałdó' ákódabizhdidooniił, Íísa bidááh noohkaigo kót'éego bił nidahodoołnih,

²⁰áádóó ánáádadidooh'niił, Ná naal'a'í Jéíkab ałdó' nihikéédę́ę́' yinééł. Háálá ání, Haa deeshniłígíí shilą́ąjį' yikahgo binahjį' shich'į' k'énízdínóodzįįł, áádóó bik'ijį' índa náhwiideestsééł, áko daats'í k'énáshididoo'niił.

²¹Ákohgo aazhdooléłígíí halą́ąjį' danéelkaad; hó éí oonéłígíí t'áá ákwe'é bił dahwiiską́.

²²T'áá éí bitł'éé' nízhdii'na'go hwe'asdzą́ą́ t'áá áłah dashdii'eezh, índa asdzání á naal'a'í t'áá áłah índa haye'ké ła'ts'áadahígíí ałdó', áádóó tooh Jábak ha'naa nideetiin gónaa ha'naa nijíkai.

²³Dah yidii'eezhgo tó nílínígíí tsé'naa ajiis'a' áádóó jit'ínígíí t'áá ałtso tsé'naa ájiilaa.

²⁴Áko Jéíkab t'áá sáhí jiida', áko ákwe'é hayííłką́ąjį' diné léi' hoł na'ahíneeztą́ą́'.

²⁵Áko diné doo hak'eh dódle' át'éégóó bił bééhoozingo hak'ai' hooldzisígi yideelchid, áko bił na'ahízhnítaahgo Jéíkab hak'ai' hááwod.

²⁶Áko áháłní, Shidíchííd, háálá hayííłką́. Nidi ábijiní, Shik'ijiisínídli'go índa nidideeshchił.

²⁷Áko ánááhodi'ní, Haashą' yinílyé? Jéíkab yinishyé, bijiní.

²⁸Áko áháłní, Jéíkab doo náánéinílyée da doo, nidi Ízrel yinílyée doo, háálá naat'áanii t'áá aké'égoígíí nahalingo Diyin God bich'į' nidziil; diné ałdó' bich'į' nidziil, áko bíni' bá áhwiinilaa.

²⁹Áko Jéíkab nahódééłkidgo ání, Nízhi' bee shił hólne', t'áá shǫǫdí. Áko áháłní, Ha'át'íishą' biniyé shízhi' bína'ídíłkid? Áádóó ákwe'é hak'ijisdli'.

³⁰Áko Jéíkab ákwe'é Piináíyel hoolyée doo jidííniidgo ájíní, Diyin God bił ahiistsą́, nidi t'ah hinishná.

³¹Áko Piinúwel bitis jííyáago hwee ha'íí'ą́, áko hak'ai' hááwodgo adíznéesxod.

³²Áko Ízrel dine'é díí jį́į́góó ak'ai' hooldzisígi ats'idígíí doo deiyą́ą da, háálá Jéíkab bik'ai' hooldzisígi ats'id bizhdeelchidgo ahaneheetah.