Read Navajo GENESIS 33 Bible Online

GENESIS 33 - Navajo bible

GENESIS 33

¹Áádóó Jéíkab hajííghalgo jidéé'į́į́'; nít'éé' Íísa aadę́ę́' diné dį́įdi neeznádiin yił yinééł. Áko áłchíní ałts'ájíínilgo Líyah áádóó Réíchel ła' baazhnínil, índa asdzání naaki á naal'a'í ałdó' ła' baazhnínil.

²Áko á naal'a'í índa bada'áłchíní alą́ąjį' nizhnínil, índa náá'ákéé' góne' Líyah áádóó ba'áłchíní nináájí'nil, áádóó Réíchel índa Jóseph éí ts'ídá akéédę́ę́' nizhnínil.

³Áádóó éí oonéłígíí bíighah ch'ízhníyáago hánaaí baazhníyáajį' tsosts'idi ni'jį' yaa ádziidzaa.

⁴Nidi Íísa hadááh yílwodgo hazénázhchid, áádóó hazts'ǫs, áko t'áá ájíłah jííchah.

⁵Áádóó Íísa hajííghal, nít'éé' asdzání índa áłchíní yiyiiłtsą́ągo ání, Eiishą' bił yíkahígíí háí ádaat'į́? Áko ájíní, Ná naal'a'í ba'áłchíní éí Diyin God jooba'ii beinínilígíí ádaat'į́.

⁶Ákohgo asdzání nidaalte' bada'áłchíní yił áháníjį' hach'į' niikaigo yaa ádaadzaa,

⁷áádóó Líyah ba'áłchíní yił áháníjį' hach'į' niikaigo ałdó' yaa ánáádaadzaa, áádóó bik'ijį' Jóseph índa Réíchel áháníjį' niní'áazhgo yaa ánáánádzaa.

⁸Áko Íísa ání, Ha'át'íishą' biniyé t'óó ahayóí shidááh da'niiskaad? Áádóó ázhdííniid, Shinanit'a'í nílíinii, díí ajooba' bee shich'oha'néego shaa nitsíníkees doo biniyé danéelkaad.

⁹Áko Íísa ánáádoo'niid, Shee hólónígíí t'áá ákódígo nisin, shitsilí; éidíígíí bíni'dii t'áá ni dooleeł.

¹⁰Áko Jéíkab ádííniid, Dooda, nánooshkąąh, k' ad ajooba' bee shich'oha'nínígíí nił hóshǫ́ǫ́ ládą́ą́', naa diní'ánígíí ni doo biniyé nídiilé; Diyin God binii' jiiłtsą́ nahalingo ninii' yiiłtsą́, háálá shaa nił hózhǫ́.

¹¹T'áá shǫǫdí nánooshkąąh, shibee ak'ihojidlíii naa diní'ánígíí nídiinííł, háálá éí Diyin God yee shaa joozba'; shee hólónígíí t'áá ákódígo shił bíighah. Áádóó bee hozhniiltee'go índa nízhdiinil.

¹²Áko Íísa ádííniid, Tį' nídidii'néełgo yii'neeł doo; shí nihilą́ąjį' yisháał doo.

¹³Áko ábizhdííniid, Shinanit'a'í bił bééhózin; áłchíní doo dadijáad da, índa ayázhí dahólǫ́ǫgo bił yishnééł, áko ła'a jį́da tsį́įłgo dínéeskaadgoda ałtso dínóonééł.

¹⁴Haa'íshą', shinanit'a'í nílíinii, ná naal'a'í bilą́ąjį' náá'nééł, áko Síyerdi shinanit'a'í baa níyáajį' shilį́į́' índa sha'áłchíní t'áá bik'ehígo yii'néeł doo.

¹⁵Áko Íísa ádííniid, Haa'íshą' diné bił naashkaígíí ła' nił ninish'nííł. Áko ájíní, Éíshą' ha'át'íí biniyé? Shinanit'a'í nílíinii, háni'dii ajooba' t'éí bee shich'oha'néego shąąh tsídíkees.

¹⁶Áko índa t'áá éí bijį́ Síyergóó Íísa dah nízhdii'ná.

¹⁷Áko Sákath hoolyéejį' Jéíkab níná; ákwe'é dahasbį', índa bilį́į́' ałdó' yá chaha'oh ádayiilaa; éí biniinaa ákwe'é Sákath hoosye'.

¹⁸Áádóó Kéínan kéyahgi Shííkem kin haal'áajį' t'áadoo át'éhígóó Jéíkab jiníná; Péídan-éíram hoolyéédę́ę́' níjoo'néełgo éí kin haal'áhígíí bíighahgi haníbaal nizhnínil.

¹⁹Áko haníbaal nizh'nínil yę́ęgi kéyah ła' nidziis'nii'; Shííkem bizhé'é Héímor wolyéii baa nidziis'nii'; éí neeznádiin béeso bik'é nizhnínil.

²⁰Áko ákwe'é bikáá' náá'iiniihí ájiilaago El Élohi Ízrel hoolyée doo, jidííniid.