Read Navajo GENESIS 34 Bible Online

GENESIS 34 - Navajo bible

GENESIS 34

¹Áádóó Líyah bich'é'é Dáínah éí Jéíkab bá jishchínígíí kéyahdi asdzání kéédahat'į́į́góó hootah ííyá,

²áko Háívah dine'é nilíinii Héímor wolyéii biye' Shííkem éí kéyahdóó naat'áanii nilį́įgo Dáínah yidánoos'niid, áádóó yił ninídéelgo t'óó baa yáhásinígi át'éego áyiilaa.

³Áko Shííkem éí Jéíkab bitsi' Dáínah k'ad yidáahjį' bi'niitsą́, áko ch'ikę́ę́h ayóó'áyó'níigo hazhóó'ógo łíídilchíigo yich'į' yáłti'.

⁴Áko Shííkem bizhé'é Héímor yich'į' haadzíi'go ání, Díí ch'ikę́ę́h shá naa dooltéelgo she'asdzą́ą́ dooleeł.

⁵Nít' éé' Jéíkab hatsi' Dáínah éí diné t'óó baa yáhásinígi ábííł'įįdgo jíínii', nidi haye'ké halgaidi halį́į́' nideiniłkaadę́ę́' nináhaaskaigo índa baa nídéesht'įįł, jiniizį́į́'.

⁶Áádóó Shííkem bizhé'é Héímor éí Jéíkab yił yaa nídóot'įįł biniyé yich'į' ííyá.

⁷Áádóó Jéíkab biye'ké dayíínii'go nida'niłkaadę́ę́' nináhaaskai, áko éí yik'ee bíni' dei'a' áádóó t'áá íiyisí doo bił dahaldin da, háálá Ízrel dine'é bitahgi bąąhági ádziidzaa. Jéíkab bitsi' bił jineezhtéézh lá. Ákót'éii doo ádoolníił da nít'éé'.

⁸Áko Héímor ídéé łkidgo ání, Shiye' Shííkem éí nitsi' t'áá íiyisí yidánoolní; t'áá shǫǫdí nánooshkąąh, be'asdzą́ą́ dooleeł biniyé baa nołteeh.

⁹Ahánda'iigeh doo, áádóó nihitsi' nihaa dahohníił doo, índa nihí ałdó' nihitsi' nihaa dahii'níił doo.

¹⁰Áko nihił kéédahoht'į́į doo; díí kéyahgi t'áá nihí danohsingóó kéédahoht'į́į doo, índa nida'iyołniih doo, áádóó ákwii naadeełí nishódahoołt'eeh doo.

¹¹Shííkem éí Dáínah bizhé'é índa bilahkéí áyidííniid, Shíni' ajooba' bee shich'oha'néego shąąh tsídadoohkos; t'áá shídeínóokeedígíí nihaa deeshłééł.

¹²Doogehii áádóó aa yílyáii t'áá shídeínóokeedígo nihaa deeshnił; azhą́ lą'í nidi ch'ikę́ę́h t'éí she'asdzą́ą́ dooleeł biniyé shaa nołteeh.

¹³Áko Jéíkab biye'ké éí Shííkem índa bizhé'é Héímor yida'doolohgo yich'į' hadaasdzíí', háálá Jéíkab biye'ké bideezhí Dáínah t'óó baa yáhásinígi ájiilaa,

¹⁴áko ádahodííniid, Díí doo ádao'nééh át'ée da; doo bąąh náhineeshgizhígíí nihideezhí doo baa daoltééł át'ée da; éí diné baa daniiltį́įgo baa yáhásingo nihidi'níl'į́į dooleeł.

¹⁵Nidi díí t'éí bee niha'dadi' diit'ááł: nihí ádaniit'éhígi ádanoht'éego diné danohłínígíí t'áá ánółtso nihąąh nídahineeshgizhgo t'éiyá nihaa dadiiltééł.

¹⁶Ákohgo índa danihitsi'ké nihaa dahidii'nił, áádóó nihí ałdó' danihitsi'ké nihaa dahidoohnił, áko kéédahwiit'į́įgo t'ááłá'í dine'é dadiidleeł.

¹⁷Ákondi ąąh náhinilgish danihidii'nínígíí doo danohsingóó nihich'eekę' t'óó bił dah didii'nééł.

¹⁸Áko dabizaadígíí Héímor índa biye' Shííkem ałdó' bił yá'át'ééh.

¹⁹Áko dinééh t'áá áko bił yá'íít'ééh, háálá Jéíkab bitsi' t'áá íiyisí hoł yá'át'ééh. Hazhé'é ba'áłchíní bitahgi t'áá hó t'éiyá aláahgo ajílį́.

²⁰Áko Héímor índa haye' Shííkem bił hakin haal'áhígíí ch'é'étiingi nizhní'áázh, áko hakin haal'áádóó diné bił baa nídadzist'įįdgo ájíní,

²¹Díí diné yá'ádaat'ééh; éí bąą bíni' kéyah yiyi' kéédahat'į́ índa yiyi'gi nida'iiłniih; jó'akon, kéyah t'áá bilááh neel'ą́; nihíni' dabitsi'ké nihaa dayiiníiłgo niheda'asdzą́ą́ dadooleeł, índa nihí ałdó' nihitsi'ké baa dahii'níił doo.

²²Díí kódeiidzaago t'éiyá nihił kéédahat'į́įgo t'ááłá'í dine'é dadiidleeł; diné daniidlínígíí t'éiyá bí ádaat'ínígi át'éego nihąąh nídahidínóolgish.

²³Dabibéégashii áádóó deit'ínígíí índa dabilį́į́' t'áá ałtso, da' éísh doo danihí da doo? Haa'íshą' ákódadii'nííł, áko nihił kéédahat'į́į doo.

²⁴Áko Héímor índa biye' Shííkem yił bikin haal'áhígíí bich'é'étiingi ałná'ádaat'ínígíí t'áá ałtso dabidiits'a'go diné t'áá ałtso bąąh nídahineeshgizh; kin haal'áhígíí bich'é'tiingi ałná'ádaat'ínígíí t'áá ałtso ákódabi'diilyaa.

²⁵Ákódzaadóó táá' yiską́ągo t'ah haa da'neezgaigo Símiyan índa Líívai, Jéíkab biye'ké Dáínah bínaaí, t'áá ał'ąą bidiltłish dah yidiijaa'go t'áá nant'inee kin haal'áhídi ní'áazhgo diné danilínígíí ałtso neistseed.

²⁶Héímor índa biye' Shííkem diltłish yee yiyííghą́ą́', áko Shííkem bighandóó Dáínah yił ch'ínákai.

²⁷Áko Jéíkab biye'ké éí diné nideistseedígíí yaa yíkaigo kin haal'áhígi diné binaalye'é deisná, háálá dabideezhí t'óó baa yáhásingo áál'įįd.

²⁸Áko dabidibé áádóó dabibéégashii áádóó dabitélii índa kin haal'áhígíí biyi' hólóonii áádóó halgaigi dahólóonii ałtso áłah ádayiilaa,

²⁹índa bibéeso t'áá ałtso áádóó bada'áłchíní t'áá ałtso áádóó bida'asdzą́ą́da nidaal'a' biniyé dah deidii'eezh, índa kin biyi' hólóonii t'áá ałtso áłah ádayiilaa.

³⁰Áko Jéíkab éí Símiyan índa Líívai áyidííniid, Shik'ijį' hoołchįįdgo kéyah yii' kéédahat'ínígíí Kéínan dine'é índa Píírez dine'é t'áá íiyisí dashidzoosłáá'; t'áá dókóniilt'éhí, áko bí t'éiyá nihich'į' áłah áhi'doolníiłgo nidanihidoołtsił, áko shí áádóó sha'áłchíní bił ádiidįįł.

³¹Nidi ádííniid, Da' nihideezhí kin yąąh sizíní nahalingo ájiilaaígíísh yá'át'ééh?