Read Navajo GENESIS 35 Bible Online

GENESIS 35 - Navajo bible

GENESIS 35

¹Diyin God éí Jéíkab áyidííniid, Dah diinéehgo Béthelgóó dínééh; áadi kénááhót'į́į doo; ákwe'é Diyin God bich'į' náádi'yííłnih biniyé bikáá' náá'iiniihí ádíílííł; nínaaí Íísa bits'ą́ą́' yóó'íínílwod yę́ędą́ą́' ákwii nich'į' yit'íní í'diishyaa.

²Ákohgo Jéíkab éí ba'áłchíní índa yił naakaígíí t'áá ałtso áyidííniid, Ana'í bi'eda'alyaii nihee dahólóonii yóó'adahołtł'iid áádóó ádąąh dahołdééh, índa danihi'éé' ła' biih náádaahkai.

³Áko sołtį', Béthel góde dii'nééł; áadi Diyin God bich'į' náádi'yeesh'nih biniyé bikáá' náá'iiniihí ádeeshłííł; shich'į' nahwii'ná yę́ędą́ą́' éí shich'į' ééhoosinii éí t'áá naasháágóó shaa áhályą́ą́ nít'éé'.

⁴Áko ana'í bi'eda'alyaii nidajijaahígíí t'áá a łtso índa jaatł'óół hajaa' bighá daaz'áhígíí Jéíkab baa dadziiznil, áko Jéíkab éí Shííkem bíighahgi chéch'il biyaagi nooh yishchį́.

⁵Áko índa dah náádazhdii'ná, áko éí dahanaagóó kin hadaas'áhígíí Diyin God bik'ee hoł daayéé', áko Jéíkab biye'ké t'áadoo yich'į' dadeezbaa' da.

⁶Áádóó Kéínan kéyahgi Luz kin shijaa'di éí biyi' (t'áá éí Béthel hoolyéhígi); Jéíkab índa diné bił nijikaígíí t'áá ałtso bił jíkai.

⁷Ákwe'é bikáá' náá'iiniihí ájiilaa, áko éí haz'ánígi El Béthel hoolyée doo, jidííniid, háálá hánaaí bits'ą́ą́' yóó'ajoolwod yę́ędą́ą́' ákwe'é Diyin God hach'į' yit'íní í'diilyaa.

⁸Áko Déborah éí Rebékah bineesánígíí daaztsą́ągo Béthel biyeijígo chéch'il biyaagi łeeh bi'dooltį́; ákwe'é Álan-bákoth hoosye'.

⁹Áko Diyin God éí Jéíkab yich'į' yit'íní í'diilyaa; Péídan-éíramdę́ę́' ch'íná'náago bik'ijisdli'.

¹⁰Áádóó Diyin God ábidííniid, Jéíkab éí nízhi'; k'ad éí doo Jéíkab yinílyée da doo, nidi Ízrel yinílyée doo, áádóó Ízrel yee hóózhi'.

¹¹Áko Diyin God ánáábidoo'niid, Diyin God Aláahgo Ayóó'ábóodziilii nishłį́; náásgóó na'áłchíní k'ee'ąą yilzhish doo; k'ee'ąą nooht'į́įł doo; dadine'é índa ał'ąą dine'é nits'ą́ą́dóó hodooleeł, índa nits'ą́ą́dóó naat'áanii ch'íhidookah.

¹²Éíbraham índa Áízak éí kéyah baa diní'áanii naa dideesh'ááł, índa na'áłchíní náás da'ahílchíihii ałdó' baa dideesh'ááł.

¹³Áádóó índa Diyin God hach'į' yáłti' yę́ę hats'ą́ą́' dah náhodiidle'.

¹⁴Áádóó Jéíkab éí Diyin God hach'į' haadzí'ígi tsé ajíítsigo bik'ijį' yanáadzi'go nááhániihii yajiiziid, índa ak'ah ałdó' yajiiziid.

¹⁵Áko Jéíkab ákwe'é Diyin God hach'į' haadzí'ígi Béthel hoolyée doo, jidííniid.

¹⁶Áádóó Bétheldóó dah náázhdii'ná, áko Éfrath t'áá áyídí hadziihgo Réíchel awéé' bídii'na'go t'áá íiyisí bich'į' nahwiisnáá'.

¹⁷Ákódzaago t'áá íiyisí bich'į' nahwii'náago asdzání ha'niyóodii áhodííniid, T'áadoo nił yé'í, niyáázh k'ad ła' nááhodoodleeł.

¹⁸Ákódzaago hwii' sizíinii hwii' haalyeedgo Benónai joolyée doo, jidííniid, háálá dadziztsą́, nidi bizhé'é éí Bénjamin yidííniid.

¹⁹Áko Réíchel daaztsą́ągo Éfrathgóó atiinígíí bíighahgi łeeh bi'dooltį́; t'áá ákwe'é Béthlehem hoolyé.

²⁰Áko Jéíkab jishcháá' bikáa'gi tsé yeidíníishin; éí díí jį́į́góó Réíchel bijishcháá' bikáa'gi tsé yadíníilzhin át'é.

²¹Áádóó Ízrel dah náázhdii'náago Ííden kin nineezgo yaa'áhígíí biláahdi honíbaal nizhnínil.

²²Áko ákódzaago Ízrel éí kéyah yiyi'gi kééhat'į́įgo Rúben dah diiyáago Bílhah, hazhé'é be'asdzą́ą́ yíł'íní, bił jineezhtéézh, áko éí Ízrel yiyíínii'. Jéíkab biye'ké éí naakits'áadah.

²³Líyah biyáázhké: Jéíkab bá alą́ąjį' yizhchíinii éí Rúben wolyéii áádóó Símiyan áádóó Líívai áádóó Júdah áádóó Ísakar índa Zébyulan daolyé.

²⁴Réíchel biyáázhké éí Jóseph índa Bénjamin wolyé.

²⁵Áádóó Réíchel bá naal'a'í Bílhah biyáázhké éí Dan índa Náftalai wolyé.

²⁶Líyah bá naal'a'í Zílpah biyáázhké éí Géed índa Ásher wolyé. Díidí Jéíkab biye'ké ádaat'į́; éí Péídan-éíram hoolyéegi bá niheezhchį́.

²⁷Áádóó Mámre hoolyéegi Árbah bikin haal'áhígíí éí Hííbran hoolyéedi Jéíkab bizhé'é Áízak yaa níyá. Ákwe'é Éíbraham índa Áízak t'óó átsééd kééhat'į́į́ nít'éé'.

²⁸Áko Áízak bíídíiską́ą́dóó neeznádiindóó ba'aan tseebídiin binááhai.

²⁹Áko Áízak honíłch'i hwii' haalwodgo dadziztsą́; hwíídíiską́ą́dóó lą'í hwiiską́ągo hadzistihgo hak'éí yę́ę ahikááhgóó dzizlį́į́', áko haye' Íísa índa Jéíkab łeeh hóółtį́.