Read Navajo GENESIS 37 Bible Online

GENESIS 37 - Navajo bible

GENESIS 37

¹Jéíkab éí hazhé'é kéyah Kéínan yiyi' tádííná yę́ęgi kééhojit'į́.

²Díí Jéíkab ba'áłchíní náás da'ahílchíihii baa hane'. Jóseph tsosts'idts'áadah binááhaigo bínaaíké yił nida'niłkaad, áko hazhé'é be'asdzą́ą́ yíł'íní Bílhah índa Zílpah biyáázhké bił tázhdíkááh, áko bąąhági ádajit'į́įgo Jóseph éí bizhé'é yee yił hoolne'.

³Áko Ízrel ła' ha'áłchínígíí biláahgo Jóseph ayóó'ájó'ní, háálá hadzistihgo há yizhchį́, áko éé' ał'ąą ádaat'eełgo łikizhgo bá ájiilaa.

⁴Áko hánaaíké éí hazhé'é hánaaíké t'áá ałtso biláahgo áhó'níigo bił béédahoozingo dahodzoosłáá', áádóó yá'át'éehgo doo hach'į' hadaodziih át'ée da.

⁵Áko Jóseph nidziizyeelgo baa nidziizyeelígíí bee hánaaíké bił hojoolne'; nít'éé' t'óó yówehda hak'ee dadeez'nih.

⁶Áko ábizhdííniid, T'áá shǫǫdí, da'íísółts'ą́ą́', baa neiséyeelígíí bee nihił hodeesh'nih:

⁷éíyee' dá'ák'ehdi tł'oh naadą́ą́' bida'iitł'o'go, áko shí be'sétł'ónígíí nídii'na'go yiizį', áko nít'éé', nihí bida'sootł'ónígíí t'áá ałtso shíhígíí yich'į' ahąh ádzaago yaa ádaadzaa.

⁸Áko hánaaíké ádahodííniid, Da' t'áásh aaníí nihinant'áa doo? Da' t'áásh íiyisí nihee ádíhwíínílníih doo? Áko nidziizyeelígíí índa bee bił hojoolne'ígíí biniinaa t'óó yówehda hak'ee náádadeez'nih.

⁹Áádóó łah nináádziizyeelgo baa nináádziisyeelígíí bee hánaaíké bił nááhojoolne'go ájíní, Shoo, ninéisíyeelgo baa neiseełígíí éí jį́honaa'éí áádóó tł'ééhonaa'éí índa sǫ' ła'ts'áadahgo shich'į' yaa áńdaat'įįh nisin.

¹⁰Nidi hazhé'é índa hánaaíké bił hojoolne'go hazhé'é hach'ahóóshkeedgo áháłní, Ha'át'íishą' bił shį́į́ bee nayííníyeel? Da' t'áásh aaníí shí áádóó nimá índa nínaaíké naa nídeiikahgo nich'į' yaa áńdeit'įįh doo?

¹¹Áko díí biniinaa hánaaíké dahoołch'į́į́d, nidi hazhé'é t'éiyá t'óó yaa nitsékees.

¹²Áko hánaaíké hazhé'é bilį́į́' Shííkem bikin haal'á nahós'a'góó adeineeskaad.

¹³Áko Ízrel éí Jóseph áyidííniid, Nínaaíké Shííkemdi nida'niłkaad. Tį', ákǫ́ǫ́ nidish'á. Áko ábizhdííniid, Kǫ́ǫ́ naashá.

¹⁴Áko ábijiní, Ákǫ́ǫ́ dínáahgo nínaaíké áádóó dibé baa nidíníítaał; nínaaíké índa dibéda daats'í yá'ádaat'ééh. Áko áádę́ę́' hane' shaa nídíí'ááł. Ákohgo Hííbran honíteeldóó dahozhdiił'a'go Shííkem nahós'a'di jiníyá.

¹⁵Áko halgaigi ch'ééh nazh'ntáago diné léi' hak'íníyáago áháłní, Ha'át'íishą' hanítá?

¹⁶Áko ájíní, Shínaaíké hanishtá; t'áá shǫǫdí shił hólne', háadi nida'niłkaad?

¹⁷Áko éí diné ání, Kodóó lá dah dadiináa ni'; Dóthan nahós'a'góó dii'nééł, daaníigo diséts'ą́ą́'. Áádóó Jóseph hánaaíké bikéé' dah náázdiidzáago Dóthandi bíznísá.

¹⁸T'ah nízaadę́ę́' joogáałgo dahoołtsą́, áko t'ah doo baa jíghááhgóó, Dahodiyiilyééł, daaníigo hondahaz'ą́.

¹⁹Ahidadeeshchidgo ádaaní, Shoo, aadę́ę́' ashkii nayiiyeełí yigááł.

²⁰Tį'éi, dahodiyiilyéełgo haa'ída a'áán góyaa adahodiyiilghą́ą́ł, áko, Naaldlooshii da'aldeełii ła' boolghal lá, dadidii'niił, áko nidziizyeelígíí ha'át'íí nídoodlee łgo nihił béédahodoozįįł.

²¹Nidi Rúben yidiizts'ą́ą'go hach'ą́ą́h haadzíi'go ání, Doo dadiyiilyéeł da!

²²Áko Rúben ánááhodoo'niid, Doo bidił doogoh da; kwe'é halgaigi t'óó a'áán góyaa adahołhan, áko doo atídadoohłíił da; dabílák'ee hadeeshtéełgo yisdádeeshtééł, áádóó bizhé'é bił baa nídeesht'ash dziniizį́į́'.

²³Áko ákódzaago Jóseph hánaaíké baazhníyáago Jóseph ha'éétsoh naashch'ąą'ígíí t'áá na'níle'dii haa deidiyiiłhan.

²⁴Áko ałts'ą́ą́' dahasiłgo a'áán góyaa adahasgo'; a'áán góyaa éí doo siláhí da; tó nidi ádin.

²⁵Áko dineezbingo ada'niiyą́ą́'; nít'éé' hadaazghalgo dadéé'į́į́'; nít'éé' Gíliyad kéyahdóó Íshmeiyel dine'é Ííjip kéyahgóó yinéełgo łikání dahalchinii spáis wolyéii áádóó azee' índa tłah ílíinii mir wolyéii ghą́ą́'ask'idii yee dayíyeeh.

²⁶Áko Judah éí bik'isóó áyidííniid, Nihitsilí daseelyį́įgo índa bidił nídadeel'į́įgoshą' ha'át'íí bits'ą́ą́dóó nídadidiilyééł?

²⁷Tį', Íshmeiyel dine'é bich'į' nidahodiyiilnih, áko doo haada dahodiilníił da, háálá nihitsilí jílį́, índa nihits'íís jílį́. Áko bik'isóó bił t'áá da'ííko.

²⁸Áko Mídiyan dine'é naalyéhé nayiiłniihii hwíighahgóó deeznáago a'áándę́ę́' Jóseph hadadzizlo', áko Jóseph éí Íshmeiyel dine'é bich'į' naho'diiznii'; naadiin béésh łigaii hą́ą́h azlį́į́'; áko Jóseph éí Ííjip kéyahdi hoł aníná.

²⁹Áko Rúben a'áandi nídzídzá, nít'éé' Jóseph doo a'áán góyaa hólǫ́ǫ da, áko bąąh háni'go ádąąh ni'jooldláád.

³⁰Hak'isóó baa náádzídzáago ábizhdííniid, Ashkii doo áadi da. Áko shíshą' háájí deeshááł?

³¹Áko tł'ízí dayiisxį́įgo bidił Jóseph bi'éétsoh yéédeistsooz,

³²áko éétsoh naashch'ąą'ígíí bizhé'é yaa deistsoozgo ádaaní, Díidí nídadiiltsooz; díí niye' bi'éétsoh daats'í át'é, dooda daats'í?

³³Áko yééhoosįįdgo ádííniid, Jó, shiye' bi'éétsoh át'é; naaldlooshii da'aldeełii boolghal sha'shin; t'áá aaníí Jóseph yę́ę nibi'diisdláád lá.

³⁴Áko Jéíkab ádąąh na'ooldláadgo tł'oh yishbizh hatł'aajį' bik'ídzísti', áko haye' bąą háni'go lą'í yiską́.

³⁵Áádóó haye'ké t'áá ałtso índa hatsi'ké t'áá ałtso hada'ahoyiiłniih doo biniyé haa dahaaskai, áko hadabi'joołniihígíí doo yinízingóó ádííniid, Shiye' bąą shíni', áko bikéé' łeeyi' góyaa deeshłeeł, níigo hazhé'é haa yicha.

³⁶Áko Mídiyan dine'é éí Ííjip kéyahdi Féro bisiláo binanit'a'í Pátifer bich'į' Jóseph naho'diiznii'.