Read Navajo GENESIS 38 Bible Online

GENESIS 38 - Navajo bible

GENESIS 38

¹Ákódzaago íídą́ą́' Júdah bik'isóó yits'ą́ą́' dah diiyáago Adálam dine'é léi' ła' Háírah yolyéego yaa níyá.

²Ákwe'é Júdah éí Kéínan dine'é léi' Shúwah wolyéii bitsi' jiiłtsą́. Áko éí yił ahaa yít'áazhgo

³i'niiltsąądgo ashkii yishchį́; éí Er bee jíízhi'.

⁴Áádóó anáá'niiltsąądgo ashkii náánéíshchį́; éí Ónan bee jíízhi'.

⁵Áádóó anáá'niiltsąądgo ashkii ła' náánéíshchį́; éí Shíílah bee jíízhi'; Júdah éí Kíízib hoolyéegi nijigháago há ashchį́.

⁶Áko Júdah bá alą́ąjį' yizhchíinii Er wolyé; éí Téímar wolyéii be'asdzą́ą́ dooleeł biniyé yá néidiiłtį́.

⁷Áko Júdah bá alą́ąjį' yizhchíinii Er wolyéego Bóhólníihii binááł doo yá'áshóonii yaa yigáałgo Bóhólníihii biisxį́.

⁸Áko Júdah éí Ónan áyidííniid, Nínaaí yę́ę be'asdzą́ą́ bił yah anináahgo bá'dííyeh, áko nínaaí yę́ę bá áłchíní hodooleeł.

⁹Nidi hánaaí yę́ę bá áłchíní doo hodooleeł da biniyé hánaaí yę́ę be'asdzą́ą́ bił yah ajííyáago t'óó ni'jį' hwíígąsh hadziistł'ííd.

¹⁰Áko ájíít'įįdígíí Bóhólníihii doo bił yá'át'ééhgóó biniinaa nááhwiisxį́.

¹¹Ákohgo Júdah hazháá'áád Téímar ábizhdííniid, Haa'íshą', nahastiin t'áá ádingo nizhé'é bighandi sínídáa doo, shiye' Shíílah neiyą́ągo índa. Háálá ájíní, Éí doodago éí ałdó' dadootsaał sha'shin. Áko Téímar dashdiiyáago bizhé'é bighandi kééhat'į́.

¹²Áko náás hodeeshzhiizhgo Shúwah bitsi' Júdah be'asdzą́ą́ daaztsą́, áko Júdah habi'doosni'go bí áádóó bik'is Háírah; éí Adálam dine'é nilíinii Tímnathgóó halį́į́' há tándeidigishii bich'į' ajíí'áázh.

¹³Áko Téímar bił hóóne'go ábi'doo'niid, Shoo, bizháá'áád nílíinii Tímnathgóó bilį́į́' táididoogish yiniyé yigááł.

¹⁴Áko ahastiin daaztsą́ągo éé' bee bééhózinii hazhdii'nilgo anii' bik'ínáltihí hanii' bik'ídzísti', áádóó náánáła' éé' biih jííyáago Tímnathgóó atiin bąąhgi náhoot'ínígi dzineezdá; jó, Shíílah neeyą́ą nidi be'asdzą́ą́ jidooleeł biniyé t'ah doo baa ho'deelteehígíí bąą ájít'į́.

¹⁵Áko Júdah hoołtsą́ągo ałjiłnii át'į́, hó'ní, háálá hanii' bik'é'ésti'.

¹⁶Atiin bąąhgóó dzizdáago haa níyáago áhodííniid, Tį', nił yah adeeshááł; hazháá'áád át'į́įgo éí doo hoł bééhózin da, áko Téímar ání, Ha'át'íishą' shaa dííleełgo bik'é shił yah adíínááł?

¹⁷Áádóó ázhdííniid, Dibé shijéé'dę́ę́' tł'ízí yázhí ła' nánídooltééł. Áko Téímar ádííniid, Éí shaa yíltį́įjį' t'áadoo le'é shaa nílé.

¹⁸Áko ázhdííniid, Ha'át'íishą' naa deeshłééł? Áádóó ábizhdííniid, Niyoostsah lą́ą, áádóó nílátsíní índa nigish nílák'ee sitánígíí. Áko éí hainínil áádóó t'áá áko hoł yah ííyáago bá izh'niiltsąąd.

¹⁹Áádóó asdzání nízhdii'na'go anídzoodzá; anii' bik'ínáltihí hazhdiiltsoozgo ahastiin daaztsą́ą́jí éé' bee ééhózinii hazhdii'nil yę́ę biih nídzoodzá.

²⁰Áko Júdah hach'ooní Adálam dine'é nilíinii yódí há néidoojih biniyé ákǫ́ǫ́ tł'ízí yázhí há ayííłtį́; nít'éé' t'áadoo yik'íníyáa da.

²¹Ákohgo diné ákwe'é kéédahat'ínígíí kójíníigo nabízhdééłkid, Háájíshą' ałjiłnii atiin bąąhgóó náhoot'ínígi sidáá nít'éé' yę́ę? Áko ádahodííniid, Kwe'éga' ałjiłnii doo ła' hólǫ́ǫ da.

²²Júdah baa nídzídzáago ázhdííniid, Ch'ééh hanétą́ą́'; ákwe'é kéédahat'ínígíí ałdó', Kwe'é ałjiłnii doo hólǫ́ǫ da, daaní.

²³Áko Júdah ádííniid, Doo nihaa yáhodoosįįłígíí biniyé bíni' yódí t'áá bí dooleeł. Jó'akon, díí tł'ízí yázhí nisíníłtį́į nidi t'áadoo hak'ííníyáa da.

²⁴Ákódzaadóó bik'ijį' táá' nídeezidgo, Téímar nizháá'áád ałjiłnii yéé'iidlaa, áádóó jó'akon, ajił bee izh'niiltsąąd, ha'níigo Júdah bił hóóne'. Áádóó Júdah ádííniid, Aadę́ę́' bił ch'ínóhkááh, áko bíni'dii azhdidook'ą́ą́ł.

²⁵Áko hoł ch'í'íldee'go bizháá'áád jílíinii bich'į' i'jííł'a'go ájíní, Diné bá i'niistsąądígíí díí yódí bí. Díí yoostsah áádóó látsíní índa gish níníł'į́. Háísh bí?

²⁶Áko Júdah hó nít'é'ígíí át'éego baa ákozniizį́į'go ázhdííniid, Hó shiláahgo t'áá ákwii ájít'éé lá, háálá shiye' Shíílah t'áadoo baa honíłtį́į da. Áádóó ts'ídá t'áadoo baa nínáádzíst'įįd da.

²⁷Ákódzaago awéé' hodooleeł baa hoolzhiizhgo, jó'akon, naakií bíjooltsą́ą́ lá.

²⁸Áko awéé' hódii'na'go ła' hadoolchid, áko asdzání ha'niyóodii, Díí átsé hadoolchid, níigo bílátsíín gónaa tł'óół łichxí'ígíí yee ye'eztł'ǫ́.

²⁹Nidi t'ą́ą́' anídoolchidgo, jó'akon, bínaaí háátłizh, áko ázhdííniid, Ha'át'éegoshą' háínítłizh! Díí íinidzaaígíí nik'ijį' nídoodleeł; éí Píírez dzoosye'.

³⁰Áádóó bik'ijį' hatsilí bílátsíín gónaa tł'óół łichxíí' binázt'i'ígíí háátłizh. Éí Zíírah woosye'.