Read Navajo GENESIS 39 Bible Online

GENESIS 39 - Navajo bible

GENESIS 39

¹Áko Jóseph éí Ííjip kéyahdi hoł íldee', áádóó Íshmeiyel dine'é hoł yíkaígíí bits'ą́ą́dóó Féro bisiláo binanit'a'í, Pátifer wolyéii nahwiisnii'.

²Áko Jóseph éí Bóhólníihii bił hólǫ́, áádóó diné bohónéedzáanii dzizlį́į́', áko Ííjip diné honanit'a'í nilíinii bighan góne' kééhojit'į́į́ nít'éé'.

³Áko honanit'a'í éí Bóhólníihii hoł hólǫ́ǫgo áádóó baa nijigháhígíí t'áá ałtso Bóhólníihii há náás áyoolíiłgo yiyiiłtsą́.

⁴Jóseph éí ajooba' bee bich'oha'néego bąąh tsízdeezkééz, áko há naal'a'go haghan índa hwee hólóonii t'áá ałtso yinant'áa doo biniyé bee bíhojoos'níí'.

⁵Haghan índa jit'ínígíí t'áá ałtso yinant'áago ájiilaadóó wóshdę́ę́' Jóseph biniiłt'aa Bóhólníihii éí Ííjip diné bighan yik'ijisdli', ákohgo bighan góne' hólóonii índa bidá'ák'ehdi hólóonii t'áá ałtso yee Bóhólníihii hak'ijisdli'.

⁶Jit'ínígíí t'áá ałtso bee Jóseph bíhojoos'níí', áko doo baa nitsídzíkees da; t'áá hazhó'ó jidooyį́įłii t'éiyá. Jóseph éí diné bíiyisii nilį́ áádóó baa dzólní.

⁷Ákódzaadóó bik'ijį' Jóseph hananit'a'í be'asdzą́ą́ hadánoos'níi'go áhodííniid, Shił níteesh.

⁸Nidi doo íiznízingóó hananit'a'í be'asdzą́ą́ ábizhdííniid, Shoo, shinanit'a'í bighan góne' hólóonii baa áháshyáanii doo yaa nitsíkees da, áádóó bee hólóonii t'áá ałtso yee shíhoos'níí'.

⁹Díí kin biyi' doo ła' shiláahgo ájít'éhí da, índa t'áadoo shąąh yi'íní da, t'áá hazhó'ó ni t'éiyá, háálá be'asdzą́ą́ nílį́. Áko ha'át'éegoshą' díí ts'ídá doo yá'áshónígi ádeeshnííł, áádóó ałdó' Diyin God bich'į' ádił adeesih?

¹⁰Áko t'áá ákwíí jį́ hach'į' yáłti'go, Díníitish, doodaii', Shił síníké, ch'ééh hałníigo doo dzíists'ą́ą' da.

¹¹Łah Jóseph náázhdeesh'nishgo wóne'é yah ajííyáago kindóó diné doo ła' ákóne' naagháa da.

¹²Áko ha'éé' yąąh dah neeshjį́įdgo, Shił níteesh, hałní áádóó ha'éé' t'áá ákǫ́ǫ́ dah yoołtsosgo tł'óó'góó ch'íjílwod.

¹³Ákódzaago ha'éé' t'áá ákǫ́ǫ́ dah yoołtsosgo t'óó honíł'į́įgo bits'ą́ą́' ch'íjílwodgo

¹⁴t'áá áko bikindóó diné yich'į' hadoolghaazhgo ání, Shoo, Hííbrew diné t'óó bee ádílááh t'éiyá yiniyé yił nát'áázh lá. Shił dínóotish yiniyé shił yah ííyá, nidi yéego hadeeshghaazh.

¹⁵Áko hadeeshghaazhgo yidiizts'ą́ą'go bi'éé' t'áá ákǫ́ǫgo dah diilwodgo ch'élwod.

¹⁶Áko ha'éé' t'áá ákǫ́ǫ́ neiłtsoosgo hananit'a'í nádzá,

¹⁷áádóó t'áá éí saadígíí yee yił hoolne'go ání, Hííbrew naal'a'í kwe'é bił néínít'ázhígíí t'óó bee ádíláahgo shił yah ííyá.

¹⁸Ákódzaago yéego hadeeshghaazhgo bi'éé' t'áá ákǫ́ǫgo ch'élwod.

¹⁹Áádóó ákódzaago hananit'a'í be'asdzą́ą́, Ninaal'a'í kóshiilaa, níigo yił hoolne', áko yidiizts'ą́ą'go t'áá íiyisí yik'ee báhóóchįįd.

²⁰Áko Jóseph hananit'a'í hoł dah dii'áazhgo aláahgo naat'áanii bi'awáalyaaí shijé'é góne' yah ahóółt'e'; ákwe'é awáalyaa dzizdá.

²¹Nidi Bóhólníihii éí Jóseph yił hólǫ́ǫgo yaa a'áhí nízin, índa awáalyaaí yaa áhályáanii bił jílį́įgo áhoolaa.

²²Áko awáalyaaí yaa áhályáanii awáalyaa naazhjé'ígíí t'áá ałtso yee Jóseph yíhoos'níí'; ákwii yaa naakaígíí t'áá ałtso hó hak'ehgo baa na'aldeeh nít'éé'.

²³Awáalyaaí yaa áhályáanii éí Jóseph bee hóhólníihii łá'í nidi doo yaa nitsíkees da, háálá Bóhólníihii hoł hólǫ́, áádóó baa nijigháhígíí Bóhólníihii há náás kóyoolííł.