Read Navajo GENESIS 40 Bible Online

GENESIS 40 - Navajo bible

GENESIS 40

¹Ákódzaadóó bik'ijį' Ííjip dine'é aláahgo binanit'a'í yaná'ákáhígíí índa bibááh ííł'íní Ííjip kéyahgi aláahgo naat'áanii doo yił hóshǫ́ǫ́góó áyiilaa.

²Áko díí naakigo, anída'akáhígíí binanit'a'í índa bááh ádeił'íinii binanit'a'í yich'į' Féro báhóóchįįd.

³Áádóó siláo binanit'a'í bighangi awáalyaa góne' yah ahóónil; ákwe'é Jóseph awáalyaa sidá.

⁴Áko siláo binanit'a'í éí Jóseph áyidííniid, Hazhó'ó baa áhólyą́, áko yaa áhályą́ągo t'áá awáalyaa góne' sikéego t'áá hodíína'.

⁵Áádóó t'áá ła'óo tł'éé' t'áá ájíłah t'áá ał'ąą át'éego nidziizyeel; Ííjip dine'é aláahgo binanit'a' í yaná'ákáhí índa bááh ííł'íní awáalyaa góne' dzizkéego nidziizyeel.

⁶Áko abínígo Jóseph hoł yah ííyáago yínííł dzizkéego haa ákoniizį́į́', jó'akon.

⁷Áko hananit'a'í bi'awáalyaa góne' Féro binaal'a'í bił awáalyaa jizhjé'ígíí neízhdééłkidgo ábizhdííniid, Díí jį́shą' ha'át'íí bąąh nihíni'go sooké.

⁸Áko áhodííniid, Neisiigeelgo baa neisiigeelígíí ááhyiłníinii t'áadoo yee nihił hólne'í da. Áko Jóseph áhodííniid, Ááhyiłníinii éí Diyin God yíí' nilíinii t'éiyá yaa hodoolnih. Baa neisooyeelii bee shił hołne', t'áá shǫǫdí.

⁹Áko anída'akáhígíí binanit'a'í nidziizyeelígíí bee Jóseph bił hojilne'go ázhdííniid, Neiseełgo, shoo, ch'il na'atł'o'ii léi' shidááhgóó sikaad nisin;

¹⁰éí ch'il na'atł'o'ii bits'áoz'a'ígíí táá'; éí bílátahgóó dah deitsoii nahalin, áádóó bílátahí dahazlį́į́', áádóó índa ch'il na'atł'o'ii bąąh neest'ą́.

¹¹Áádóó Féro bibee adlání dah yish'áałgo ch'il na'atł'o'ii ni'diinilgo Féro bibee adlání biyi'jį' bitoo' bąąh sénihgo Féro bílák'ééką́ nisin.

¹²Áko Jóseph áhodííniid, Díí ááhyiłní, Táá' bits'áoz'a'ígíí éí táá' yidoołkááł.

¹³Táá' yiską́ągo Féro ch'éenidoołt'eełgo ninaanish naa néididoo'ááł, áádóó Féro bibee adlání bee t'áá nahdę́ę́' baa ná'íkááh nít'éé' yę́ę bee bílák'ee nínáá'íkáah doo.

¹⁴Áko ch'éeni'deelt'e'go shéénílniih doo, áádóó shaa jiiníba' doo, índa, t'áá shǫǫdí, Féro bich'į' shá hadíídzih, áko díí kin bii'dóó ch'ééshidííłt'eeł.

¹⁵Háálá t'áá aaníí Hííbrew dine'é bikéyahdę́ę́' shidi'neest'į́į́', áádóó kwe'é t'áadoo ásdzaaígóó ná'áyaaí góyaa adasist'e'.

¹⁶Áko bááh ádeił'íinii binanit'a'í hane' yá'át'éehgo dzidiizts'ą́ą'go Jóseph ábizhdííniid, Shí ałdó' neiseełgo, jó, ts'aa' daalgaígíí táa'go shitsiit'áagi ałk'i dasinil, nisin.

¹⁷Áádóó ts'aa' akáa'gi dah si'ánígíí biyi' ch'iyáán éí Féro bá daazt'éii dah siką́ nisin, nidi ts'aa' shitsiit'áagi bee dah azkánígíí bii'dóó tsídii da'ííyą́ą́' nisin.

¹⁸Áko Jóseph haadzíi'go áhodííniid, Díí ááhyiłní, Ts'aa' tá'ígíí éí táá' yidoołkááł.

¹⁹Táá' yiską́ągo Féro ch'éenidoołt'eełgo tsin yąąh dah nididooloh, áádóó nits'íís tsídii deidooyį́į́ł.

²⁰Áko táá' yiską́ągo éí Féro bi'dizhchį́ yę́ęjį' anáyííłką́ągo bá nidaal'a'í t'áá ałtso yá áda'íísįįd, áko nida'iikaahí binanit'a'í índa bááh ádeił'íní binanit'a'í éí bá nidaal'a'í bitahjį' awáalyaadę́ę́' ch'ínéi'nil.

²¹Áko nida'iikaahí binanit'a'í na'akáago ánáyiidlaa áádóó Féro yee adlání yee yílák'ee ná'ákááh.

²²Nidi Jóseph hoł hoolne'ígi át'éego bááh ádeił'íní binanit'a'í dah ho'diidlo'.

²³Áko nida'iikaahí binanit'a'í éí Jóseph t'aadoo yénáálnii' dago yaa yooznah.