Read Navajo GENESIS 41 Bible Online

GENESIS 41 - Navajo bible

GENESIS 41

¹Ákódzaadóó ts'ídá naaki nááhaigo Féro nidziizyeel: jó, tooh nílínígíí bąąhgóó dzizį́, dzinízin.

²Áádóó, shoo, tooh nílínídę́ę́' béégashii yá'ádaat'éehii índa daneesk'ahii tsosts'id haaskaigo hootsojį' eekaigo ákwii da'ałchozh.

³Náá'áłdó' tooh nílínídę́ę́' béégashii danichxǫ́ǫ́'ígo índa dabits'iinígo tsosts'idgo hanáánáskai, áko tooh nílínígíí bibąąhgóó béégashii ła'ígíí yíighahgóó naazį́.

⁴Áko danichxǫ́ǫ́'ígo dabits'iinígíí éí yá'ádaat'éehgo daneesk'ah yę́ę dayooldéél. Áko Féro ch'éédzídzid.

⁵Áádóó náá'jiiłhaazhgo łahgo nináádziizyeel: nít'éé' shoo, tł'oh naadą́ą́' t'ááłá'í sikaadígíí bineest'ą' yá'át'éehgo daneest'áanii tsosts'idgo bąąh dahazlį́į́'.

⁶Nít'éé' shoo, náábíkéédę́ę'go tł'oh naadą́ą́' bineest'ą' tsosts'idgo bąąh nááhásdlį́į'go ha'a'aahdę́ę́' níyol bíízeezgo daniiłna'.

⁷Áko tsosts'idgo daniiłna'ígíí éí tsosts'idgo yá'ádaat'ééh yę́ę adayiisna'. Áko Féro ch'éédzídzidgo nidziizyeel lá.

⁸Áádóó hoos'įįdgo yínííł dzizlį́į́', áko Ííjip kéyahgi déest'į́į́' ádeił'íinii índa hastóí dahóyáanii bíká i'jiis'a', áádóó Féro nidziizyeelígíí bee hastóí bił nahodzisne', nidi ááhyiłníinii doo bił béédahózingóó t'áadoo ła' yee Féro yił náhoolne'í da.

⁹Áko nida'iikaahí binanit'a'í Féro bich'į' hadzoodzíi'go ábijiní, Doo ákǫ́ǫ́ íít'įįdígíí díí jį́ bénááshnii'.

¹⁰Féro bá nidaal'a'í yich'į' báhóóchįįd yę́ędą́ą́' shí áádóó bááh ííł'íinii binanit'a'í biłgo siláo bighangi awáalyaa góne' yah anihíínínil.

¹¹Áko t'áá ła'óo tł'éé' t'áá áníidlah neisiigeel. Áko nihí t'áá ał'ąą át'éego neisiigeel; éí neisiigeelígíí bik'ehgo t'áá ał'ąą át'éego yaa halne'.

¹²Íídą́ą́' dinééh léi' Hííbrew dine'é nilį́įgo éí siláo binanit'a'í yá naal'a'í nilį́įgo bił naháatą́ą́ nít'éé', áko neisiigeelígíí bee bił hwiilne'go ááhyiłníinii yee nihił hoolne'; t'áá áníidlah neisiigeelígíí ááhyiłníinii bik'ehgo yee nihił hoolne'.

¹³Áádóó yee nihił hoolne' yę́ę bohoolyaa: shí shinaanish shaa nídííní'ą́; hó t'éí dah hodinilo'.

¹⁴T'áá áko Féro éí Jóseph bíká i'jííł'a', áko ná'áyaaí góyaa adahast'e' yę́ędę́ę́' t'ahaa'go hoł chídaaskai, áko hadághaa' jííshée'go éé' ła' bee hanáázdiidzaago Féro bił yah ajííyá.

¹⁵Áádóó Féro éí Jóseph áyidííniid, Neisíyeelgo baa neisíyeelígíí ááhyiłníinii t'áadoo shił hólne'í da, áko ni t'éiyá baa na'iisgeelii bik'idi'yiitįįhgo baa náhodíílnihgo diséts'ą́ą́'.

¹⁶Áko Jóseph kóníigo Féro yich'į' haadzíí', Shí doo shá bohónéedzą́ą da, nidi Diyin God t'éiyá Féro bił hodooshǫǫłii yił ch'íidoo'ááł.

¹⁷Áádóó Féro éí Jóseph áyidííniid, Neiseełgo, shoo, tooh nílínígíí bibąąhgóó sézį́, nisin.

¹⁸Áádóó shoo, tooh nílínídę́ę́' béégashii yá'ádaat'éehgo daneesk'ahii tsosts'id haaskaigo hootsojį' eekaigo ákwii da'ałchozh.

¹⁹Nít'éé' shoo, béégashii t'óó badahojoobá'ígo áádóó danichxǫ́ǫ́'ígo índa dabits'iinígo hanáánáskai; Ííjip kéyahgi t'áá át'éé nít'éé' t'ah doo ła' ákót'éego nichxǫ́'íii yiistséeh da.

²⁰Nít'éé' béégashii dabits'iiní áádóó danichxǫ́'ígíí béégashii daneesk'ahgo tsosts'idgo áłtsé haaskai yę́ę dayooldéél.

²¹Áko dayooldéél nidi t'áadoo dayooldéel da nidahalin. Nidi t'áá átséedi ádaat'é yę́ęgi ádaat'éego t'ahdii danichxǫ́ǫ́'í. Áko ch'éénísdzid.

²²Áádóó néidíshgeelgo, shoo, tł'oh naadą́ą́' t'ááłá'í sikaadígíí bineest'ą' yá'át'éehgo daneest'áanii tsosts'idgo bąąh dahazlį́į́'.

²³Áádóó náábikéédę́ę'go shoo, tł'oh naadą́ą́' bineest'ą' tsosts'id daniiłna'go áádóó áłts'óózí daazlį́į'go índa ha'a'aahdę́ę́' níyol dabíízeezgo diigaigo bąąh náádahasdlį́į́'.

²⁴Áádóó ádaałts'óózígíí éí tsosts'idgo yá'ádaat'ééh yę́ę adayiisna', áko déest'į́į́' ádeił'íinii bee bił hweeshne' nidi doo bił béédahózingóó t'áadoo ła' yee shił náhoolne'í da.

²⁵Áko Jóseph éí Féro áyidííniid, Féro nayiizyeelígíí éí t'ááłá'ígíí ááhyiłní, áko Diyin God k'adę́ę yaa nídiidáhígíí éí Féro yich'į' ííshjání áyiilaa.

²⁶Béégashii tsosts'idgo yá'ádaat'éhígíí éí tsosts'id nídoohah, áádóó tł'oh naadą́ą́' bineest'ą' yá'ádaat'éhígíí tsosts'idgo ałdó' tsosts'id nídoohah, níigo ání; neisíníyeelígíí éí t'ááłá'ígíí ááhyiłní.

²⁷Áádóó béégashii tsosts'idgo dabits'iinígíí índa danichxǫ́ǫ́'ígíí náábíkéédę́ę́' hanáánáskai yę́ę tsosts'id nídoohah lá, áádóó ałdó' tł'oh naadą́ą́' bineest'ą' tsosts'id daniiłna'go ha'a'aahdę́ę́' níyol bíízeezígíí éí hodichingo tsosts'id nídoohah, níigo ání.

²⁸Díidí Féro bee bił hweeshne'ígíí éí Diyin God k'adę́ę yaa nídiidáhígíí Féro yich'į' ííshją́ą́ áyiilaa.

²⁹Shoo, Ííjip kéyahgi t'áá át'éé nít'éé' tsosts'id nááhaijį' t'áá íiyisí nida'nt'ą' doo,

³⁰áádóó bik'ijį' tsosts'id nínáánááhaijį' éí dahodidoochįįł, áádóó Ííjip kéyahgi nida'nt'ą' yę́ę baa hodiyoo'nah, áko kéyahgi dichin ooghą́ął doo.

³¹Áko kéyahgi ayóó át'éego nida'nt'ą' yę́ę hodííchįįdígíí biniinaa doo béédahaniih da doo, háálá t'áá íiyisí bik'e'íyé'ígi át'éego hodidoochįįł.

³²Áko díí biniinaa Féro naakidi nidziizyeel, háálá éí Diyin God t'áá bí yee nihoní'ą́, áádóó Diyin God éí t'áá hąhí yi'doolííł.

³³Éí bąą k'ad Féro éí diné t'áadoo le'é nayik'ísíłkeesii áádóó hóyáanii néididoołtééł, áko éí Ííjip kéyahgi bee bóhólníihgo íidoolííł.

³⁴Bíni'dii Féro kódoonííł: kéyah yindant'áa dooleełígíí niidoonił, áádóó ashdla'go daníjaa'ígíí éí t'ááłá'í shijaa' yits'ánídayii'nił dooígíí éí Ííjip kéyahgi t'áá íiyisí nínáda'nt'į́įhgo tsosts'id nídoohah.

³⁵Áko t'áá nináháhááh bik'eh ch'iyáán bee ída'azįįdgo óolzin doo, áádóó tł'oh naadą́ą́' t'áá ałtso Féro áníinii bik'ehgo áłah áńdaal'įįh doo, índa kin hadaas'áágóó ch'iyáán nooh nídaachíhígíí baa ádahojilyą́ą doo biniyé niho'dee'nil doo.

³⁶Ch'iyáán ts'ídá łą́ągo nooh nídaachíihgo tsosts'id nááhaijį' hodichingo chodao'į́į doo biniyé yah anídahayéeh doo; éí Ííjip kéyahgi ákót'éego hwiidoo'aał, áko kéyahgi diné doo dichin yiih dínóodah da.

³⁷Áko Féro índa bá nidaal'a'í t'áá ałtso bił yá'ádaat'ééh.

³⁸Áádóó Féro éí bá nidaal'a'í áyidííniid, Da' diné éí Diyin God biNíłch'i bii' hólóoniísh t'áá ła' nídadidiiltééł?

³⁹Áko Féro éí Jóseph áyidííniid, Díidí Diyin God nich'į' ííshją́ą́ áyiilaaígíí bąą t'áadoo ła' t'áadoo le'é nayik'ísíłkeesí da, doo nidi honíyánígi ájít'éhí da;

⁴⁰shighan áádóó shidine'é t'áá ałtso nik'ehgo ádaat'éego binanít'áa doo, áko shí t'éiyá niláahgo naat'áanii nishłį́į dooleeł.

⁴¹Áko Féro éí Jóseph áyidííniid, Shoo, Ííjip kéyahgi t'áá át'éé nít'éé' níhólníihgo ániishłaa.

⁴²Áádóó Féro biyoostsah haidiit'ą́ągo Jóseph bíla' yąąh niiní'ą́, índa áłts'óózígo yisdizígíí bee na'at'ą́hí daalgaii dits'idgo ádaalyaii éé' yee hahodiilaa, índa óola da'ahólzha'go yoo'ígíí hazénéíst'i',

⁴³áádóó aláahgo naat'áanii bitsinaabąąs bijáád naakiígíí t'áá akéé' góne'ígíí hoł nidzit'igo áhoolaa, áádóó halą́ąjį' deíjeehígíí, Nitsidadinohgeeh, daaníigo dadilwosh. Áko Ííjip kéyahgi t'áá át'éé nít'éé' hóhólníihgo áhoolaa.

⁴⁴Ákohgo Féro éí Jóseph áyidííniid, Shí Féro ásht'į́; Ííjip kéyahgi t'áá át'éé nít'éé' t'áadoo bee i'níłníhí diné ła'da hála' índa hakee'da bee doo ha'át'íida ázhdoołíił da.

⁴⁵Áko Féro éí Jóseph jílíinii Záfiinath-paníyah yee hóózhi', índa An hoolyéhédóó náá'iiłniihii Potífera wolyéii bitsi' Ásenath hwe'asdzą́ą́ doo biniyé hainíłtį́. Áko Jóseph dah diiyáago Ííjip kéyah t'áá át'éé nít'éé' yaa naneeztą́ą́'.

⁴⁶Áádóó Jóseph tádiin binááhaigo Ííjip dine'é binanit'a'í Féro binááł naat'áanii dzizlį́į́'. Jóseph éí Féro yits'ą́ą́dóó ch'ínádzáago Ííjip kéyah t'áá át'éé nít'éé' yaa naneeztą́ą́'.

⁴⁷Tsosts'id nááhaijį' nahasdzáán bikáá' t'óó ahayóí nínáda'nt'į́įhgo ch'iyáán bee ída'íízįįd nít'éé'.

⁴⁸Áádóó Jóseph bíniik'ehgo tsosts'id nááhaijį' Ííjip kéyahgi ch'iyáán t'áá át'éé áłah ádajiilaago Ííjip kin hadaas'áhígi ahandadziizyį́; éí t'áá hadáda'ak'ehídę́ę́' t'áá kin hadaas'áhígi ch'iyáán nooh dajishchį́.

⁴⁹Áko Jóseph bik'ehgo tónteel bibąąhgóó séiigi ánéelą́ą'go neest'áanii t'óó ahayóí nooh dajishchį́, áko hónáásdóó jółta'ígíí bik'izhdeeyá, háálá doo jóołta' ánéelą́ą' da.

⁵⁰Ákohgo dahodidoochįįłígíí t'ah doo baa hoolzhííshgóó Jóseph éí ashiiké naaki há yizhchį́; éí An hoolyéédóó náá'iiłniihii Potífera wolyéii bitsi' Ásenath há yishchį́.

⁵¹Áko Jóseph alą́ąjį' há yizhchínígíí, Manáseh wolyée doo, jidííniid, háálá ájíní, Diyin God éí shich'į' nahwiisnáa'ii t'áá ałtso índa shizhé'é ba'áłchíní t'áá ałtso beisénahgo áshiilaa.

⁵²Áko akéédę́'ígíí, Éí Íífreiyim wolyée doo, jidííniid, jó, Diyin God éí kéyahgi bik'ee ti'hwiisénii'ii biyi' noot'į́įłii yee shik'ijidlíigo áshiilaa.

⁵³Áko tsosts'id nááhaijį' Ííjip kéyah biyi' lą'í nínádant'į́hígíí bíighah azlį́į́',

⁵⁴áádóó Jóseph ádííniidígi át'éego dahodichingo tsosts'id nídoohahígíí baa hoolzhiizh. Áko kédaayahgóó t'áá ałtsogi dahodííchįįd, nidi Ííjip kéyahgi t'éiyá t'áá át'éé nít'éé' ch'iyáán hólǫ́.

⁵⁵Áko Ííjip kéyahgi t'áá át'éé nít'éé' dahodííchįįdgo éí diné yik'ee ti'dahooníihgo Féro éí ch'iyáán bídajókeed, áko Féro éí Ííjip dine'é t'áá ałtso áyidííniid, Jóseph baa hohkáahgo t'áá ánihiłnínígóó ádaaht'į́.

⁵⁶Ákohgo nahasdzáán t'áá níłtéél nít'éé' bikáá'góó dahodííchįįd. Áko Jóseph éí kin bii' ch'iyáán héé ł ádaalyaa yę́ę ąą ádayiilaago Ííjip dine'é yich'į' nayiis'nii', háálá Ííjip kéyahgi t'óó tsé'édinda hodichin hazlį́į́'.

⁵⁷Áko kédaayahdę́ę́' t'áá níłtéél nít'éé' diné Ííjip kéyahjį' Jóseph yaa hakáahgo doodį́įłii yaa nidayiiłniih nít'éé', háálá t'áá ałtsogóó t'áá íiyisí dahodííchįįd.