Read Navajo GENESIS 43 Bible Online

GENESIS 43 - Navajo bible

GENESIS 43

¹Áko éí kéyahgi t'áá íiyisí hodichin.

²Áko Ííjipdę́ę́' tł'oh naadą́ą́' nidadziizyį́ yę́ę ałtso dajííyą́ą'go hazhé'é ánááhodoo'niid, Náádóhkáahgo ch'iyáán ła' nináádahołniih.

³Áko Júdah áhodííniid, T'áadoo naaki nilíní diné nihich'į' haadzíi'go ání, Nihitsilí t'áadoo bił noohkaigóó t'éiyá doo náádashiidoołtséeł da.

⁴Nihitsilí nihitah díníł'a'go t'éiyá ákóyaa diikahgo ch'iyáán ła' nináádahidiilnih.

⁵Áko éí doo nihił díníł'a'góó doo ákóyaa náádiikah da, háálá diné ánihiłní, Nihitsilí t'áadoo bił noohkaigóó t'éiyá doo náádashiidoołtséeł da.

⁶Áádóó Ízrel ádííniid, Ha'át'íishą' biniyé doo shaa dajiinohba'góó, Nihitsilí ła' t'ah hólǫ́, dadohníigo diné bił dahołne'?

⁷Áko ádahodííniid, Nihí índa nihik'éí yínanihídíłkidgo ání, Nihizhé'éésh t'ah hiná? Nihitsilíísh ła' nááhódlǫ́? Áko t'áá nanihídíłkidgóó bee bił nídahwiilne' nít'éé'. Nihitsilí bił nínáánóhkááh nihididooniiłígíishą', haash yit'éego nihił béédahózin doo?

⁸Áko Júdah éí bizhé'é Ízrel áyidííniid, Nihí áádóó ni lá índa niha'áłchíní yázhí t'áá ałtso doo dadíníi'néeł da, nidi dahinii'náa doo biniyé ashkii shił bi' níłnííh, áko dah didiikah.

⁹Shí bá naashtłizh doo, áko biniyé nishiníłteeh. Doo bił naa náánísht'áázhgóó hool'áágóó bíni'dii shik'íhát'áah doo;

¹⁰doo nida'áhodiilziidgóó k'ad naakidi nániikai doo nít'éé'.

¹¹Áko hazhé'é Ízrel áhodííniid, T'áá aaníí t'áá ákót'éego kódaohnééh; kéyahgi aneest'ą' ts'ídá yá'ádaat'éehii nihiyéél dabiyi'go t'áá níík'eh diné bich'į' dadohjááh; éí ch'óh bijeeh áłch'į́į́dígo áádóó tsés'ná bitł'izh áłch'į́į́dígo áádóó jeeh łikání halchinígíí áádóó tłah ílíinii mir wolyéii áádóó neeshch'íí' t'áá ał'ąą ádaat'éii índa álman wolyéhígíí bił dadohjááh.

¹²Béeso naakidi ákónánéelt'e'go dayínóhjáah doo. Índa béeso éí nihe'azis biih nídahaas'nil yę́ę éí ałdó' nídayínóhjáah doo; doo t'áá ákónéehgo ádaat'į́į da sha'shin.

¹³Hasht'e'ádadołnéehgo nihílááh; nihik'is ałdó' bił diné baa nínáánóhkááh.

¹⁴Áko Diyin God Aláahgo Ayóó'ábóodziilii éí diné nihaa a'ááh nízingo íidoolíiłgo nihitsilí ła'ígíí áádóó Bénjamin yił nihich'į' yéé'doołnih. Áko sha'áłchíní shighaa'nilgo éí shį́į́ shighaa'nil doo.

¹⁵Áko aye' ké éí aneest'ą' atisgo yá'ádaat'éhígíí índa béeso naakidi ákónánéelt'e'ígíí dah dazhdiijaa'; Bénjamin ałdó' bił dashdiikaigo Ííjip kéyah góyaa anáájookaigo Jóseph bidááhdóó nijíkai.

¹⁶Áko Jóseph éí Bénjamin atah jiiłtsą́ągo hakin yaa áhályáanii ábizhdííniid, Díí diné shighan góne' yah ani'éésh. Áádóó aałk'ee áhóléehgo ałníní'ą́ągo díí diné shił da'dooyį́į́ł.

¹⁷Díí diné éí t'áá Jóseph áhodííniidígi ádziidzaa; Jóseph bighan góne' diné yah ajíí'eezh.

¹⁸Áko Jóseph bighan góne' yah aho'doot'eezhígíí biniinaa nídadzisdzíidgo ádazhdííniid, Áłtséédą́ą́' nihe'azis biyi' béeso naaznil yę́ę biniinaa lą́ą; nihik'i hodidoo'ááł índa danihiidoołtsołgo binaa'nil ádanihidoolííł, áádóó nihitélii nihighaidoo'nił biniyé yah anihi'doot'eezh ni.

¹⁹Áko Jóseph bikin yaa áhályánígíí yich'į' niikaigo ch'é'étiingi yich'į' yádaałti'.

²⁰Áko ádazhdííniid, Shoo, nihinanit'a'í, nihí áłtséédą́ą́' ch'iyáán nidahidiilnih biniyé niikai.

²¹Áádóó nída'njahgi niikaigo nihe'azis ąą ádeiilyaa nít'éé'; t'ááłá'í niitínígo nihibéeso t'áá át'é azis bii' naaz'nil lá, áko éí béeso naa nídaniijaa'.

²²Ch'iyáán nidahidiilnih biniyé béeso ła' náádashiijaa'. Háí shį́į́ nihibéeso nihe'azis yiih ná yoo'nil lá doo nihił béédahózin da.

²³Áko ádííniid, Nihił dahózhǫ́; t'áadoo nídaałdzidí; nihiDiyin God índa nihizhé'é biDiyin God éí béeso nihe'azis yiih yiyíínil; shí nihibéeso nídiinil nít'éé'. Áko Símiyan haa néiníłtį́.

²⁴Áko diné éí Jóseph bikin góne' yah ayíí'eezhgo tó yeiníką́ągo hakee' táádadzizgiz, áádóó dahatélii yá nida'azhjaa'.

²⁵Áko ałníní'ą́ągo Jóseph nádzáago t'áá jíík'eh baa dahizhdooníłígíí hasht'edajiilaa, háálá ákwii dazh'dooyį́įłgo dazdiizts'ą́ą́'.

²⁶Áádóó Jóseph nádzáago t'áá jíík'eh baa dahizhdooníłígíí bił yah adajiizhjaa'go ni'jį' bich'į' tsé'yaa dazhneeshjool.

²⁷Ákohgo ádajít'éhígíí yínahódéé łkidgo áhodííniid, Da' hastiin baa dahołne'ígíí nihizhé'é, éísh yá'át'ééh? T'ahásh hiná?

²⁸Áko ánáádabizhdoo'niid, Nihizhé'é ná naal'a'í doo át'éhí da, t'ah hiná. Áko bich'į' yaa ánáádadziidzaa.

²⁹Áádóó bitaadzizghalgo hatsilí Bénjamin hamá biyáázh jiiłtsą́ągo ázhdííniid, Da' díísh nihitsilí bee shił dahoołne'ígíí át'į́? Áádóó ábizhdííniid, Shiye' nílíinii, Diyin God naa jooba' le'.

³⁰Áko Jóseph hatsilí baa a'áhí jiniizį́į'go tsį́į́ł dzizlį́į́', áko haa'ída deeshchah jinízingo jintéhí góne' yah ajííyáago t'áá íiyisí atínízhdindleehgo jíícha.

³¹Áko hanii' táádzízgizgo áádę́ę́' ch'éédzídzá, áko hasht'éézhdíít'e'go ájíní, Nida'ayohkaah.

³²Ííjip dine'é éí Hííbrew dine'é yił da'ayą́ągo doo deíłdingóó bąą Ííjip dine'é éí Hííbrew dine'é doo yił da'ayą́ą da, áko éí biniinaa t'áá sahdii há ni'íką́, áádóó bik'is ałdó' t'áá sahdii yá nída'iizką́, áádóó ałdó' Ííjip dine'é hoł nída'adį́į́hígíí t'áá sahdii yá nída'iizką́.

³³Áko hadáahgi t'áá nidaho'diizhchínígi át'éego dah deidineesbin, áko diné ałch'į' yik'ee t'óó bił adahayóí.

³⁴Áko ch'iyáán hadááhdóó hach'į'go dadeeską́, nidi Bénjamin éí hó ádanéelt'e'ígíí ashdladi ákónánéelt'e'go ba'íką́. Áádóó doodlį́įłii dajoodlą́ą'go bił hoł dahózhǫ́.