Read Navajo GENESIS 44 Bible Online

GENESIS 44 - Navajo bible

GENESIS 44

¹Áádóó hakin yaa áhályáanii ábizhdííniid, Hééł t'áá yídaneel'ánígi diné t'áá ałtso bida'azis bii' ch'iyáán hadadidííłbį́į́ł, índa dabibéeso bida'azis biih náhidíí'nił.

²Áádóó béésh łigaii shibee adlání índa béeso yee tł'oh naadą́ą́' nayiis'nii'ígíí ałdó' akéédę́ę́' nilínígíí be'azis biih díínił. Áko Jóseph áhodííniidígíí bi'jiilaa.

³Áko hoos'įįdgo diné áádóó dabitélii bił bééda'iisnii'.

⁴Áko kin haal'áádę́ę́' ch'íjíkaigo t'áá áhánígóó jookahgo Jóseph bikin yaa áhályáanii áyidííniid, Nílááh, diné bikéé' dínááh, áko bíínísáago ábididííniił, Ha'át'éegoshą' yá'át'éhígi ánihiishłaa nidi nihí éí bąąhági ádashooł'įįd?

⁵Díí shinanit'a'í yee adlánígíí át'é; éí yee náásgóó áhodooníiłii bił bééhózin. Kódaohdzaaígíí bee doo yá'áshónígi ádaohdzaa, yidííniid.

⁶Áko bízhnísáago díí saad bee bich'į' hadzoodzíí'.

⁷Áko ádahodííniid, Ha'át'éegoshą' nihinanit'a'í díí saad yee haadzíí'. Ná nidaal'a'í t'áá íiyisí doo ákódaone' át'ée da.

⁸Shoo, nihe'azis bii' béeso nídadii'nilígíí Kéínan kéyahdę́ę́' nídashiijaa', ákoshą' ha'át'íí biniyé ninanit'a'í bighandę́ę́' béésh łigaii áádóó óolada dadíníit'į́į́ł?

⁹Ná nidaal'a'í t'áá háí shį́į́ nei'áhígíí háni'dii bidi'yoolyééł; nihí ałdó' nihinanit'a'í yá nidaalte' dadiidleeł.

¹⁰Áko ádííniid, T'áá ádadohnínígi át'ée doo; t'áá nei'áhígíí éí shinaalte' doo; nihí éí doo nihik'íhát'áah da doo.

¹¹Áko t'áá ádzíłtso tsį́įłgo hoda'azis hadadadziizyį́įgo ąą ádajiilaa.

¹²Áko bíká nikizh'diich'idgo alą́ąjį' naagháhígíí bee hodeeshzhiizhgo akéédę́ę́' naagháhígíí bee nihoolzhiizh, áko Bénjamin be'azis bii'dę́ę́' bee adlání hanáát'ą́.

¹³Ákohgo daha'éé' nidadziizǫ́ǫzgo t'áá ádzíłtso dahayéél dahatélii bik'i dah nidadzis'nilgo kin haal'áágóó nát'ą́ą́' níjíkai.

¹⁴Áko Júdah hak'is bił Jóseph bighandi níjíkaigo t'ah t'áá ákwii lá, áádóó bich'į' yaa ánáádadziidzaa.

¹⁵Áko Jóseph áhodííniid, Díísh haa daoht'įįd lá? Da' doósh nihił béédahózin da, diné shígi át'éii náásgóó áhodooníiłii bił bééhózin.

¹⁶Áko Júdah ádííniid, Shinanit'a'í, ha'át'íishą' dabididii'niił? Ha'át'íishą' bee hadadiidzih? Índa ha'át'éegoshą' doo nihidahodiit'i'góó bikáá' ídadi'diilnííł? Diyin God éí ná nidaal'a'í doo ákwii ádáát' įįdígíí bił bééhoozin. Shoo, nihí índa bee adlání hats'ą́ą́' hanáát'ánígíí hoł shinanit'a'í bá nidaalte' dasiidlį́į́'.

¹⁷Áko ádííniid, Ákódeeshníłígíí t'áá íiyisí doo óoshne' át'ée da. Bee adlání bits'ą́ą́' hanáát'ánígíí éí shinaalte' jílį́į doo. Áko nihí t'éiyá nihił dahózhǫ́ǫgo nihizhé'é bich'į' nídoohkah.

¹⁸Ákohgo Júdah hwíighahgi niníyáago ádííniid, Shoo, shinanit'a'í, t'áá shǫǫdí, ná naal'a'í yóhółníihii t'ááłáhígo bee nich'į' haasdziih. Áádóó ná naal'a'í t'áadoo bich' į' náháchį'í, háálá Féro bił ahiníłt'é.

¹⁹Shinanit'a'í, ná nidaal'a'ígíí nabídííníłkidgo ádííníniid, Da' nihizhé'éésh hólǫ́, índa nihitsilíísh hólǫ́.

²⁰Áko shinanit'a'í ádandii'niid, Nihizhé'é hólǫ́; t'áá hazhó'ó haastih, índa haastihgo bá yizhchínígíí éí t'ah ániid naaghá; bínaaí ádin, áko bí t'éí bimá yę́ę yits'ą́ą́dóó yidziih, áko bizhé'é ayóó'ábó'ní.

²¹Áko ná nidaal'a'í daniidlíinii ánihidííníniid, Hwiideestsééł biniyé bił shaa nohkááh.

²²Áko shinanit'a'í ádandii'niid, Ashkii bizhé'é doo yits'ágháah da, háálá bizhé'é yits'áníyáago bizhé'é dadootsaał.

²³Nihitsilí doo bił noohkaigóó t'éiyá doo náádashiidoołtséeł da, diníigo ná nidaal'a'í bich'į' háínídzíi' ni'.

²⁴Ákohgo shizhé'é ná naal'a'í nilíinii baa nániikaigo shinanit'a'í áníinii bee bił dahwiilne'.

²⁵Áko nihizhé'é ánáánihidoo'niid, Nihílááh, náádóhkáahgo ch'iyáán áłch'į́į́dígo nihá nináádahołniih.

²⁶Áko ádadii'niid, Doo ákóyaa dookááh át'ée da. Nihitsilí akéédę́'ígíí biłgo t'éiyá ákóyaa diikah, háálá nihitsilí akéédę́ę́' nilínígíí t'áadoo bił niikaigóó éí diné doo náádeidiiltséeł da.

²⁷Áko ná naal'a'í nihizhé'é ánihidííniid, Nihił béédahózingo she'asdzą́ą́ ashiiké naaki shá yishchį́.

²⁸Áko ła' shits'ą́ą́' yóó'ííyá, dííniid, t'áá aaníí nibi'diisdláád lá, áko t'áadoo néiiłtsą́ą da.

²⁹Áádóó díidí ałdó' bił dah náádadoohkaigo haada yidzaago shitsii' t'áá íiyisí yiigaigo áádóó yíní biih néítłizhgo dasétsą́ągo łeeh dashidoołtéeł ni.

³⁰Éí bąą ná naal'a'í shizhé'é baa nánísdzáago ashkii doo nihitah nádzáágóó éí t'áá íiyisí ádíyóltą'ii nilį́,

³¹ákohgo doo nihitah nádzáágóó bił bééhoozingo dadootsaał. Áko ná nidaal'a'í bizhé'é bitsii' t'áá íiyisí yiigaigo áádóó yíní yiih náátłizhgo dadootsaałgo łeeh deidoołtééł.

³²Háálá ná naal'a'í bizhé'é kwíidííniid yę́ędą́ą́' ání, Ashkii bá naashtłizh doo; t'áadoo bił naa nánísht'áázhgóó hool'áágóó shizhé'é shik'íhá'áah doo.

³³Éí bąą t'áá shǫǫdí, shinanit'a'í binaalte' nishłį́į doo biniyé ná naal'a'í bíni'dii ashkii yitsásk'ehgi sidáa doo, áko ashkii bíni' bínaaíké yił nihinákááh.

³⁴Ashkii t'áágéedgoshą' haash yit'éego shizhé'é bich'į' nídeeshdááł. Doodago éí bąąhági át'éii shizhé'é bik'i hwiidooleełígíí binásdzid.