Read Navajo GENESIS 45 Bible Online

GENESIS 45 - Navajo bible

GENESIS 45

¹Ákohgo Jóseph hwíighahgóó naazínígíí binááł doo hasht'ezhdit'eehgóó biniinaa yéego hadzoodzíi'go ájíní, Diné t'áá ałtso átsé ch'ínóhkááh, dabidohní. Áko diné doo ła' wóne' nidaaldeehgóó Jóseph hak'isóó bich'į' ádééhojooszįįd.

²Áko ayóó íits'a'go jíícha, áko Ííjip dine'é Féro bighandóó nidaakaígíí dahodiizts'ą́ą́'.

³Áko Jóseph bik'isóó áyidííniid, Shí Jóseph ásht'į́. Da' shizhé'éésh t'ah hiná? Áko hak'isóó bił nidzizínígíí doo hach'į' hadaodziih ádaadzaa da, háálá t'óó bił adahayóigo nídaasdzííd.

⁴Áko Jóseph bik'isóó áyidííniid, T'áá shǫǫdí, shíighahjį' ninohkááh. Áko hwíighahjį' nijíkaigo áhodííniid, Shí, Jóseph nihik'is, Ííjip kéyahjį' nidahisoołnii'ígíí ásht'į́.

⁵Áko kojį' nidashiyoołnii'ígíí t'áadoo bąąh danihíni'í, índa t'áadoo ách'į' nihá nídahachįįhí. Háálá Diyin God t'áá nihítséedi shiníł'a'go dahináanii dadoodzih biniyé ádzaa lá.

⁶Háálá díí kéyah bii' hodichingo k'ad naaki nááhai, áádóó ashdla' nináádoohah hadziih; éí bii' doo nidahwiildlaad da doo, índa doo da'agizh da doo.

⁷Nidi Diyin God nihítséedi kojį' shiníł'a'; éí niha'áłchíní nahasdzáán bikáá'góó náás da'ahílchíih doo, índa shí shinahjį' ayóó át'éii bee dadoohdzih biniyé ádzaa.

⁸Áko nihí doo kwe'é dashinooł'a' da, nidi Diyin God át'į́, áko Féro bizhé'é nishłį́įgo índa bighan t'áá át'é áádóó Ííjip kéyah t'áá át'éé nít'éé' binanisht'áago áshiilaa.

⁹Tsxį́įłgo shizhé'é bich'į' nídóhkáahgo ádabididoohniił, Niye' Jóseph kóní, Diyin God éí Ííjip kéyah t'áá át'éé nít'éé' binanisht'áago áshiilaa; t'áadoo na'áhodílziidí áádę́ę́' shaa díínááł.

¹⁰Áko Góshen kéyahgi kéédahoht'į́į doo; ni lá áádóó na'áłchíní áádóó éí banááda'áłchíní índa nidibé, nibéégashii índa nee hólóonii t'áá ałtso bił t'áá áyídígóó kééhoht'į́į doo.

¹¹Ákwii nihaná'ástso' doo, háálá t'áá hodichingo ashdla' nínáádoohah. Áko ni áádóó bił dah yinéełii índa nee hólóonii t'áá ałtso doo nihaa dahojoobá'í dadoohłeeł.

¹²Áádóó shoo, t'áá nihí índa shitsilí Bénjamin ałdó' bił dashinół'į́; t'áá shí nihich'į' hahasdziih.

¹³Áko Ííjip kéyahgi bee shaa ha'niihígíí índa daołtsánígíí t'áá ałtso bee shizhé'é bił dahodoołnih, áádóó tsį́įłgo áádę́ę́' bił nídoohkah.

¹⁴Ákohgo hatsilí Bénjamin bizééjízhchidgo jíícha; Bénjamin ałdó' yícha.

¹⁵Índa hánaaíké t'áá ałtso dadzizts'ǫs, áádóó bizéédajizhchidgo bił dajíícha. Áádóó bik'ijį' hak'isóó bił ahił dahojoolne'.

¹⁶Áádóó Jóseph bik'isóó yíkai; ha'níigo Féro bighandi baa hóóne'go Féro índa bá nidaal'a'í yaa bił dahózhǫ́.

¹⁷Áko Féro éí Jóseph áyidííniid, Nik'isóó ábididííniił, kódadoohnííł; nihilį́į́' hééł bił bik'i nida'ohtł'o'go Kéínan kéyahgóó dah nídoohkááh.

¹⁸Áko nihizhé'é índa nihada'áłchíní áádę́ę́' bił shaa doohnééł; Ííjip kéyahgi ts'ídá aláahdi át'éii nihaa dideesh'ááł, áádóó kéyahgi nidant'ą'ii agháago yá'ádaat'éehii daohsą́ą doo.

¹⁹Díí bee bich'į' hanáádíídzih; éí díí bida'ohłééh; niha'áłchíní índa nihida'asdzą́ą́ biniyé Ííjip kéyahdóó tsinaabąąs ch'ídahidoołbąs, áádóó nihizhé'é áádę́ę́' bił doohnééł.

²⁰Áko ałdó' nihiyéél t'áadoo nihida'diił'áhí, háálá Ííjip kéyahgi yá'ádaat'éehii t'áá ałtso nihá dahólǫ́.

²¹Áko Ízrel biye'ké ákódaadzaa; Féro ádííniidígi át'éego Jóseph tsinaabąąs haa yiiznil, áádóó hast'e' bikiin níjookah dooleełígíí há hasht'éyiilaa.

²²Índa t'áá ádzíłtso éé' da'ílíinii ałnáádajiyoo'niłgo biih nídajikah dooleełii hataiznii', nidi Bénjamin éí béésh łigaii táadi neeznádiin bíighahgo índa éé' ashdladi ał'ąą bii' doodáałgo yeinínil.

²³Áádóó hazhé'é éí Ííjip kéyahdóó yá'ádaat'éehii télii neeznáá bił bik'i nida'astł'ǫ́ǫgo áádóó télii dabi'ádígíí neeznáago, neest'áanii áádóó ch'iyáán índa bist'e'go áádę́ę́' yikiin doogáałii bił bik'i nida'astł'ǫ́ǫgo, díí yich'į' áyiilaa.

²⁴Ákohgo índa, Nááhkahgóó t'áadoo ahináádoohjahí, bizhdííniidgo hak' isóó béézh'níłnii'. Áádóó dah nídiikai.

²⁵Áko Ííjip kéyahdóó nihééjíkaigo Kéínan kéyahdi hazhé'é Jéíkab baa níjíkai.

²⁶Áko bił dahojoolne'go ádajiní, Jóseph t'ah hináá lá. Ííjip kéyah t'áá át'éé nít'éé' yinant'á. Áko doo joodlą́ą́góó t'óó hoł yée'go bik'ee k'asdą́ą́' háni' ásdįįd.

²⁷Áko Jóseph éí saad yee hach'į' hahaasdzí'ígíí t'áá át'é bee bił dahojoolne', áádóó tsinaabąąs éí hoł nídoobąs biniyé Jóseph hach'į' áyiilaii dziiłtsą́ągo hazhé'é Jéíkab bii' hááhwiisdoh.

²⁸Áko Ízrel ádííniid, K'ad lą́ą, shiye' Jóseph hináá lá; t'ah doo daastsaahdą́ą́' bich'į' deesháałgo néídeestsééł.