Read Navajo GENESIS 46 Bible Online

GENESIS 46 - Navajo bible

GENESIS 46

¹Ákohgo Ízrel bee hólónígíí t'áá ałtso yił dah diináago Bíyer-shííbagi niníná; ákwe'é hazhé'é yę́ę Áízak biDiyin God bich'į' náá'jiisnii'.

²Áko tł'ée'go Diyin God éí Ízrel bił yee yich'į' haadzíi'go ání, Jéíkab, Jéíkab. Áko ázhdííniid, Kǫ́ǫ́ sétį́.

³Áko áháłní, Shí Diyin God ásht'į́; nizhé'é yę́ę biDiyin God; Ííjip kéyahjį' yínéłígíí t'áadoo bik'ee nił yé'í, háálá ákwii dine'é ayóó át'éii ándeeshłíí ł.

⁴Ííjip kéyahgóó nił deeshnééł, áko áádę́ę́' t'áá aaníí háánihideesh'ish, áádóó dasínítsą́ągo Jóseph nináá' ałch'į' kwíidoolííł.

⁵Ákohgo Jéíkab éí Bíyer-shííbadóó dashdiináago Ízrel biye'ké dabizhé'é Jéíkab áádóó bada'áłchíní índa bida'asdzą́ą́ yił Féro tsinaabąąs beezhdoonééł biniyé hach'į' áyiilaaígíí bee jiníná.

⁶Dabilį́į́' índa deit'ínígíí éí Kéínan kéyahdi hwee dahazlį́'ígíí yił dah diiná; Jéíkab índa ba'áłchíní t'áá ałtso bił Ííjip kéyahdi jiníná.

⁷Biye'ké áádóó bitsi'ké áádóó binálíkéda índa ba'áłchíní t'áá ałtso Ííjip kéyahdi yił níná.

⁸Díí Ízrel ba'áłchíní Ííjip kéyahdi nínánígíí dabízhi'; Jéíkab áádóó biye'ké: Jéíkab há alą́ąjį' yizhchínígíí Rúben wolyé,

⁹áádóó Rúben biye'ké éí Héínak áádóó Pálu áádóó Hézran índa Kármii daolyé.

¹⁰Símiyan biye'ké éí Jíímyuwel áádóó Jéímin áádóó Óhad áádóó Jéíkin índa Zóhar daolyé. Áádóó Shéíyal éí Kéínan asdzání biyáázh ałdó'.

¹¹Líívai biye'ké éí Gérshan áádóó Kóhath índa Miirárai daolyé.

¹²Júdah biye'ké éí Er áádóó Ónan áádóó Shíílah áádóó Píírez índa Zíírah daolyé, nidi Er áádóó Ónan éí Kéínan kéyahdi jineezná; Píírez biye'ké éí Hézran índa Héímal wolyé.

¹³Ísakar biye'ké éí Tóla áádóó Púwa áádóó Job índa Shímran daolyé.

¹⁴Zébyulan biye'ké éí Sííred áádóó Íílan índa Jáliyel daolyé.

¹⁵Díí Líyah biyáázhké Péídan-éíram hoolyéedi Jéíkab yá niyiishchį́, índa bitsi' Dáínah ałdó'; Jéíkab biye'ké áádóó bitsi' bił t'áá ałtso tádiindóó ba'aan tájílt'é.

¹⁶Géed biye'ké éí Zíífan áádóó Hágai áádóó Shúnai áádóó Ézban áádóó Íírai áádóó Éírad índa Aríílai daolyé.

¹⁷Ásher biye'ké éí Jímna áádóó Íshowah áádóó Íshowai áádóó Biiráíyah índa bilah Síírah daolyé. Biiráíyah biye'ké éí Hííber índa Málkiyel wolyé;

¹⁸Léíban bitsi' Líyah yeiníłtínígíí Zílpah wolyéii éí díí biyáázhké; hastą́'áadah yilt'éego Jéíkab yá niyiishchį́.

¹⁹Jéíkab be'asdzą́ą́ Réíchel biyáázhké éí Jóseph índa Bénjamin wolyé.

²⁰Áádóó Jóseph éí Ííjip kéyahdi Manáseh áádóó Íífreiyim éí An hoolyéédóó náá'iiłniihii Potífera bitsi' Ásenath wolyéii há yishchį́.

²¹Bénjamin biye'ké éí Bíílah áádóó Bííker áádóó Áshbel áádóó Gííra áádóó Néíyaman áádóó Ííhai áádóó Rash áádóó Máppim áádóó Háppim índa Ard daolyé.

²²Díí Réíchel biyáázhké Jéíkab yá niyiishchį́; t'áá ałtsogo dį́į́ts'áadah yilt'é.

²³Dan biye' éí Húshim wolyé.

²⁴Náftalai biye' ké éí Jáhziyel áádóó Gúnai áádóó Jíízer índa Shíllem daolyé;

²⁵Léíban bitsi' Réíchel yeiníłtínígíí Bílhah wolyéii éí díí biyáázhké; t'áá ałtsogo tsosts'id yilt'éego Jéíkab yá niyiishchį́.

²⁶T'áá ádzíłtso Jéíkab bits'ą́ą́dóó dahodzizlį́į'ii Ííjip kéyahdi bił jinínánígíí, Jéíkab dabizháá'áád t'áágéedgo, hastą́diindóó ba'aan hastą́ą́h jilt'é;

²⁷Jóseph haye'ké Ííjip kéyahgi há yizhchínígíí éí naaki, áko Jéíkab ba'áłchíní t'áá ałtso Ííjip kéyahgi nínánígíí éí tsosts'idiin.

²⁸Áko Jéíkab éí Júdah ádílą́ąjį' Jóseph bich'į' ajííł'a'go éí Góshen kéyahgóó hodoo'ishgo áadi nizhdoonééł biniyé i'jííł'a', áádóó Góshen kéyahdi jiníná.

²⁹Áko Jóseph hatsinaabąąs bijáád naakiígíí hasht'ejiilaago Góshendi hazhé'é Ízrel bidááshdoogáałgo dashdiiyá, áko baazhníyáago bizéédzíznii'go jichago t'áá nízaadgóó hodíína'.

³⁰Áko Ízrel éí Jóseph áyidííniid, T'ah hinínáá lágo ná niiłtsánígíí bąą k'ad háni' dadeestsaał.

³¹Áko Jóseph hak'isóó índa hazhé'é ba'áłchíní t'áá ałtso ábizhdííniid, Féro bich'į' deesháałgo bił hodeeshnihgo ábidideeshniił, Shik'isóó índa shizhé'é ba'áłchíní t'áá ałtso Kéínan kéyahdi kéédahat'į́į́ nít'é'ígíí shaa níná.

³²Nida'niłkaadii danilį́; dabilį́į́' yaa ádahalyą́ągo yídaneesdin, áádóó dabidibé índa dabibéégashii índa deit'ínígíí t'áá ałtso yił níná.

³³Ákohgo Féro hágo nihidííniidgo ánihididooniił, Ha'át'íí naanish shį́įshą' nihindaanish?

³⁴Áko kódabididoohniił, Ná nidaal'a'í daniidlíinii, nihí áádóó danihizhé'é t'áá áłchíní daniidlį́į́dą́ą́' nihilį́į́' nidaniilkaad, ákohgo Góshen kéyah bii' kéédahoht'į́į dooleeł, háálá Ííjip dine'é nida'niłkaadii t'áá ałtso daabił t'óó badaa'ih.