Read Navajo GENESIS 47 Bible Online

GENESIS 47 - Navajo bible

GENESIS 47

¹Áko Jóseph éí Féro yaa níyáago áyidííniid, Shizhé'é áádóó shik'isóó áádóó dabilį́į́' índa deit'ínígíí t'áá ałtso Kéínan kéyahdę́ę́' yił nínáago k'ad Góshen kéyahgi niníná.

²Áko hak'isóó ashdla'go bił dashdiikaigo Féro bił baa jíkai.

³Áko Féro éí hak'isóó áyidííniid, Ha'át'íí naanish shį́įshą' nihindaanish? Áko Féro ádabizhdííniid, Ná nidaal'a'í daniidlíinii, na'niłkaadii daniidlį́; danihizhé'é na'nilkaad t'éí yaa nidaakai nít'éé' yę́ęgi át'éego nihí ałdó' ákódeiit'į́.

⁴Áko Féro ánáádabizhdoo'niid, Kéyah bii' t'óó átsééd kééhwiit'į́į doo biniyé nii'ná, háálá ná nidaal'a'í dabilį́į́' ch'il bá ádaadin, háálá Kéínan kéyahdi t'áá íiyisí dahodííchįįd; éí bąą, t'áá shǫǫdí, ná nidaal'a'í éí Góshen kéyah yii' kéédahat'į́į dooleełgo baa diní'aah.

⁵Áko Féro éí Jóseph áyidííniid, Nizhé'é índa nik'isóó naa níná.

⁶Áko Ííjip kéyah nihich'į' ąą át'é; bíni'dii kéyah agháago yá'áhoot'éhígi nizhé'é índa nik'isóó kéédahat'į́į doo; bíni'dii Góshen kéyahgi kééhat'į́į doo, áádóó nik'isóó bitahdóó diné dahayóígíí ła' bééhonísindą́ą́' éí shilį́į́' yaa ádahalyáanii yindant'áago shá ádadíílííł.

⁷Áko Jóseph éí bizhé'é Jéíkab, Féro yich'į' yił yah íí'áázh, áádóó Jéíkab éí Féro yik'ijisdli'.

⁸Áko Féro éí Jéíkab áyidííniid, Díkwíishą' ninááhai?

⁹Jéíkab éí Féro áyidííniid, Shíiníłką́ą́dę́ę́' t'áá tádíshnéehgo neeznádiindóó ba'aan tádiin shinááhai; shíiníłkánígíí t'áá díkwíhí yee' índa shich'į' nahwii'náago tádííná, áko éidí dashizhé'é yę́ę tádadinéehgo nináháhááh áádóó bídeiníłką́ą́dę́ę́' éí t'áadoo yé'éztį́įh da.

¹⁰Áko Jéíkab éí Féro yik'ijisdli'go yits'ą́ą́' ch'ínádzá.

¹¹Áádóó Jóseph hazhé'é índa hak'isóó kéyah baa hozhdiní'ánígíí éí Ííjip kéyahgi agháago yá'áhoot'éehgi Rámsiiz hoolyéedi hasht'e'nidahaazná. T'áá Féro ádííniidígi át'éego ádadziidzaa.

¹²Áko Jóseph hazhé'é áádóó hak'isóó índa hazhé'é bighandóó t'áá ałtso ádanéelt'e'ígíí bik'ehgo ch'iyáán bee baa áhojilyą́ą́ nít'éé'.

¹³Áko t'áá íiyisí hodichinígíí bąą kéyah t'áá át'éé nít'éé' biyi' ch'iyáán ádaasdįįd, áko Ííjip kéyahgi índa Kéínan kéyahgi dine'é t'áá íiyisí dichin yik'ee ti'dahoonííh.

¹⁴Áko Jóseph éí Ííjip kéyahgi índa Kéínan kéyahdę́ę́' béeso bik'é doodį́įłii hach'į' nidayiizla'ígíí ahąh ájiilaago Féro bighan góne' yah ajííjaa'.

¹⁵Áko Ííjip kéyahgi índa Kéínan kéyahgi béeso ádaasdįįdgo Ííjip dine'é t'áá ałtso Jóseph yaa haaskaigo ádeidííniid, Ch'iyáán nihitaa niniih; ha'át'íishą' biniyé ninááł dadíníi'nééł? Háálá nihibéeso ádaasdįįd.

¹⁶Nít'éé' Jóseph ádííniid, Nihibéeso ádaasdįįdgo nihilį́į́' shaa dahohníiłgo nihilį́į́' bideená nihadi'yeestsoł.

¹⁷Áko dahalį́į́' Jóseph baa dadziiznil, áko Jóseph éí łį́į́' áádóó dibé áádóó béégashii índa télii bideená ch'iyáán hataiiznii', áko éí bighaí dahalį́į́' ałtso bideená hada'altso' nít'éé'.

¹⁸Áko éí nínáánááhaigo baa náádziiskaigo ádabizhdííniid, Nihinanit'a'í, nihibéeso bik'é ida'diilnahgo ałtso ádasiildįįdígíí nihinanit'a'í doo bits'ąą nanóol'į́į́' át'ée da; danihilį́į́' t'áá ałtso nihinanit'a'í bíí' silį́į́'; nihinanit'a'í yoo'į́įgo t'áadoo yiila'í da; t'áá hazhó'ó danihits'íís índa danihikédaayah t'éiyá daadziih.

¹⁹Ha'át'íishą' biniyé nihí índa nihikédaayah bił t'áá ninááł ádadiidįįł? Ch'iyáán bideená nihí índa nihikédaayah Féro bá nidaal'a'í dadiidleeł; k'eelyéí nihitaa niniih, áko dahinii'náa dooleeł áádóó doo dadíníi'néeł da índa kéyah doo t'áá bíni' hwiidoo'aał da.

²⁰Áko Jóseph éí Ííjip kéyah t'áá át'é Féro yá nayiisnii', áko hodichinígíí hadeinídiidzáago bąą Ííjip dine'é bidáda'ak'eh baa nidahaaznii'. Ákódzaago kéyah Féro bíí' silį́į́'.

²¹Nít'éé' Ííjip kéyahgi da'níłts'ą́ą́dę́ę́' diné éí kin hadaas'áhígi kéédahat'į́įgo ájiilaa.

²²Nááda'iiłniihii bikédaayah t'éiyá t'áadoo nidziisnii' da, háálá Féro éí nááda'iiłniihii yá ch'iyáán niinínilgo yikiin dahináago nááda'iiłniihii bikédaayah t'áadoo baa nidahaaznii' da.

²³Ákohgo Jóseph éí diné áyidííniid, Shoo, díí jį́ nihí índa nihikédaayah bił Féro bá nanihiyéłnii'; k'ad kǫ́ǫ́ k'eelyéí nihá hólǫ́, áko kéyahgi k'idadidoohłééł.

²⁴Áko da'agizhjį' anáhálzhishgo ashdla'go daníjaa'ígíí éí t'ááłá'ígo shijaa' Féro baa nídahohjih doo, áko dį́į́' shijaa' bíighahgo éí t'áá danihí doo: dá'ák'ehgóó k'ééda'dohdléehgo nihí áádóó bił danihighanígíí índa nihada'áłchíní bił danihich'iyą' dooleeł.

²⁵Áko ádadííniid, Yisdánihíínínil; haa'íshą' nihinanit'a'í, ajooba' bee nihich'oha'néego nihąąh tsídíníkééz, áko Féro bá naal'a'í dadiidleeł.

²⁶Áko Jóseph éí Ííjip kéyahgi nínádant'į́įhii ashdla'go daníjaa'ígíí éí t'ááłáhígo shijaa' Féro bí doogo bee haz'áanii áyiilaa, áko éí díí jį́į́góó nidi bee hoogááł; t'áá hazhó'ó nááda'iiłniihii bikédaayahígíí t'áadoo Féro bíí' silį́į' da.

²⁷Áko Ízrel éí Ííjipdi Góshen kéyahgi kééhat'į́į́ nít'éé'; ákwii naadeełí hwee dahazlį́į́', áádóó lą'í dzizlį́į́'; t'áá íiyisí k'ee'ąą jidínéest'ą́.

²⁸Jéíkab éí Ííjip kéyahgi kééhat'į́įgo tsosts'idts'áadah nááhai; Jéíkab habíyííłką́ą́dóó neeznádiindóó ba'aan dízdiindóó ba'aan tsosts'id binááhai.

²⁹Áko Ízrel dadootsaałjį' k'adę́ę baa hoolzhíishgo haye' Jóseph hágo bizhdííniidgo ábijiní, K'ad ajooba' bee shich'oha'néego shaa nitsíníkees ládą́ą́', t'áá shǫǫdí, shitsoosk'id biyaa adílníihgo shaa jiidííbaał áádóó t'áá aaníí yá'át'éhígi áshidíílííł. T'áá shǫǫdí, t'ááká Ííjip kéyahgi yóó'áshóólééh lágo.

³⁰Nidi dasétsą́ągo Ííjip kéyahdóó ch'íshidííłtéełgo dashizhé'é yóó'ádaalyaa yę́ędi yóó'áshidíílííł. Áko áhozhdííniid, T'áá ádínínígi ádeeshnííł.

³¹Áko ázhdííniid, Diyin God binááł t'áá aaníí shich'į' háínídzíí', áko hó Diyin God binááł t'áá aaníí bich'į' hadzoodzíí'. Áko Ízrel hatsásk'eh bitsii'jigo bikáa'jį' yaa ádziidzaago nahodzisá.