Read Navajo GENESIS 48 Bible Online

GENESIS 48 - Navajo bible

GENESIS 48

¹Ákódzaadóó bik'ijį' diné ła' Jóseph yił hoolne'go ání, Shoo, nizhé'é daatsaah, áko Jóseph biye'ké naakidilt'éhígíí Manáseh índa Íífreiyim wolyéii dashdii'eezh.

²Áko diné ła' Jéíkab yił hoolne'go ádííniid, Shoo, niye' Jóseph aadę́ę́' nich'į' yigááł. Áko Ízrel t'áá hazááká dzíłdzil ízh'diilyaago dzideesdzilgo tsásk'eh bikáá' dzineezdá.

³Áko Jéíkab éí Jóseph ábizhdííniid, Diyin God Aláahgo Ayóó'ábóodziilii éí Luz hoolyéedi Kéínan kéyahgi shaa honíle'go shik'ijisdli'go

⁴áshíłní, Ííłchíiłgo k'ee'ąą nídí'nóot'į́įłgo na'áłchíní náás da'ahílchíihii t'óó ahayóigo ádeeshłííł; nits'ą́ą́dóó diné t'óó ahayóí k'ee'ąą danéet' įįhgo ádeeshłííł, índa díí kéyah éí na'áłchíní náás da'ahílchíhígíí hool'áágóó daabí dooleeł biniyé baa dideesh'ááł.

⁵Ákohgo t'ah doo Ííjip kéyahgi naa nishááh yę́ędą́ą́' niye' naaki Ííjip kéyahgi ná yizhchínígíí éí shí; Rúben índa Símiyan shíhígi át'éego Íífreiyim índa Manáseh shí dooleeł.

⁶Áádóó na'áłchíní ná náádoochíłígíí éí t'áá ni doo, áádóó bik'isóó dabízhi' bik'ehgo kéédahat'ínígi bee dabi'dójíi doo.

⁷Áko shí éí Péídan hoolyéédę́ę́' yishááł yę́ędą́ą́' Kéínan kéyahdi yii'néełgo Éfrath hoolyéhíjį' t'áá áyídí hadziihgo Réíchel shąąh daaztsą́, áko Éfrath t'ah bich'į' yii'néełgo yóó'áhooshłaa; ákwe'é Béthlehem hoolyé.

⁸Áko Ízrel éí Jóseph biye'ké dziiłtsą́ągo ázhdííniid, Díishą' háí át'į́?

⁹Nít'éé' Jóseph hazhé'é ábizhdííniid, Shiye'ké kwe'é shá ho'dizhchį́įgo Diyin God shaa honínilígíí ájít'į́, áko ázhdííniid, T'áá shǫǫdí, shaa ní'éeshgo bik'izhdeeshdliił.

¹⁰Áko Ízrel t'áá íiyisí hadzistihgo biniinaa t'áá yéego haná'oh hooba', áko bíighahgi nizhní'eezhgo yizts'ǫs áádóó ádíyiiltsood.

¹¹Áko Ízrel éí Jóseph áyidííniid, Doo hanii náániideestséeł da nisin nít'éé', nidi Diyin God na'áłchíní ałdó' yideestséełgo yee shá hooł'a'.

¹²Áko Jóseph éí Jéíkab bigodta'gi ashiiké sizínígíí nahjį' kójiilaago hazhé'é bich'į' ni'jį' yaa ádziidzaa.

¹³Áko Jóseph t'áá áłah dashdii'eezhgo Íífreiyim honish'náájígoígíí Jéíkab binishtł'ají bidziisį', áádóó Manáseh honishtł'ajíígíí Jéíkab binish'náájí bidziisį', áko bidááhdę́ę́' nizhní'eezh.

¹⁴Áko Ízrel nish'náájí bee k'ízdeesnii'go Íífreiyim bitsii't'áagi dasdees'nii'; éí akéédę́ę́' yizhchíinii jílį́. Áádóó nishtł'ají bee Manáseh bitsii't'áagi dasdees'nii', áko éí ahidiníłnáago bik'i dasdees'nii', azhą́ Manáseh éí alą́ąjį' yizhchį́įgo hoł bééhózin nidi ájít'į́.

¹⁵Áko Jóseph bik'ijiidzisdli'go ázhdííniid, Shizhé'é yę́ę Éíbraham índa Áízak biDiyin God yinááł tádíí'áazhii, T'áá éí Diyin God shíiníłką́ą́dę́ę́' díí jį́į́góó nidi sha'ałtso'.

¹⁶Ach'į' nahwii'náanii t'áá ałtso bits'ą́ąjį' diyingo naal'a'í nááshiisnii'ígíí éí ashiiké yik'ijidlíi le'; Shí áádóó shizhé'é Éíbraham índa Áízak danihízhi'go bee dahodó'jíi doo, Áádóó nahasdzáán bikáa'gi t'óó ahayóí doo.

¹⁷Áko Jóseph hazhé'é éí Íífreiyim bitsii't'áagi dah deesnii'go dziiłtsą́ągo doo hoł aaníígóó Íífreiyim bitsii't'áádóó Manáseh bitsii't'áajį' hazhé'é dah bizhdidoołnih biniyé dah bizdees'nii'.

¹⁸Jóseph hazhé'é ábizhdííniid, Doo ákót'ée da, shizhé'é, dííyee' alą́ąjį' yizhchį́; éidígo nish'náájí bee bitsii't'áagi dah dílnííh.

¹⁹Nít'éé' hazhé'é doo íinízingóó ádííniid, Shí shił bééhózin, shiye', shił bééhózin; éí ałdó' ła' dine'é dooleeł; éí ałdó' ayóó át'é dooleeł; azhą́ ákót'ée nidi bitsilí biláahdi ayóó át'ée doo, áádóó ba'áłchíní náás da'ahílchíihii t'óó ahayóí ał'ąą dine'é dadooleeł.

²⁰Áko éí bijį́ kóníigo yik'ijisdli', Ninahjį' Ízrel dine'é ałk'idajidlíigo ádaaníi doo, Diyin God éí Íífreiyimgi áádóó Manásehgi ánít'éego ándoolííł; kót'éego Íífreiyim éí Manáseh yitsijį' sizį́įgo áyiilaa.

²¹Áko Ízrel éí Jóseph áyidííniid, Jó'akon, dadeestsaał, nidi Diyin God nił hólǫ́ǫgo danizhé'é yę́ę bikéyahgóó nánihidoo'ish.

²²Índída kéyah ła' nik'isóó biláahdi t'ááłá'í bee aláahgo naa diní'ą́; éidí shidiltłish bee índa she'ałtį́į́' bee Ámor dine'é bighadinisht'ą́.