Read Navajo GENESIS 49 Bible Online

GENESIS 49 - Navajo bible

GENESIS 49

¹Áko Jéíkab haye'ké hágo bizhdííniidgo ábijiní, Ahąh óhnééh, áko náás yidiiską́ą́góó nihich'į' ádahodooníłígíí bee nihił hodeeshnih.

²Jéíkab biye'ké danohłíinii, ahąh óhnéehgo da'íísółts'ą́ą́'; nihizhé'é Ízrel deísółts'ą́ą́'.

³Rúben, ni alą́ąjį' shá yizhchíinii nílį́; shidziil áádóó shitsxe' bee deezt'i'ii nílį́; Diné aláahgo baa ha'niihii índa alą́ąjį' hoo'áałii nílį́.

⁴Tó naanáálk'ołígíí nahonílinígíí biniinaa doo alą́ąjį' hoo'áałii nílį́į da doo, Háálá nizhé'é bitsásk'ehgi baa díí'nílá, áko yíníłchxǫ'; shibikáá' dah antéhí bikáa'jį' ííníyá.

⁵Símiyan índa Líívai ałk'is nidlį́; bidiltłish yee be'ádíláhígíí doo yits'íidii ádaat'é.

⁶Shii' sizíinii nílíinii, t'áá nahont'inee naha'áhígíí t'áadoo bich'į' nanináhí; Bee ayóó ánísht'éii bee t'áadoo bił łá'í nílíní, háálá báháchįįhgo diné yiyiiłhééh, Áádóó t'áá bí íinízinii bik'ehgo kin biná'ástł'in yiyaa e'enił.

⁷Báháchįįhígíí hóyée'go bá ha'iidziih, háálá t'áá íiyisí hashké Áádóó t'áá íiyisí doo jooba'góó báháchįįh; Jéíkab dine'é bitahgi ałts'ą́ąjį' ho'deesh'nih áádóó Ízrel dine'é bitahgi taizhdookah.

⁸Júdah, ni nik'isóó naa dahaniih doo; Ni'ana'í dabik'os yínítą' doo; Nizhé'é biye'ké nich'į' yaa áńdaat'įįh doo.

⁹Júdah éí náshdóítsoh bitsiijį' ditł'ooígíí biyázhí jílį́; Naniłtseedígíí bits'ą́ą́' dah diniyá, shiye'. Jishjį́įdgo náshdóítsoh bitsiijį' ditł'ooígíí nahojílingo dzizdá, Áádóó náshdóítsoh bitsiijį' ditł'ooí sánígi át'éego dzizdá; háishą' tsíbididoołyis?

¹⁰Naat'á gish Júdah doo bighadootį́įł da; Éí Sháíloh níyáajį' naat'áanii bigish bikee' bita'dę́ę́' doo hadootį́įł da, Áádóó éí bá diné áłashdooleeł.

¹¹Bilé'é yázhí éí ch'il na'atł'o'ii sikaadgo yąąh dah náyiitł'óóh; Bitélii yázhí éí ch'il na'atł'o'ii agháago yá'át'éehii sikaadgo yąąh dah náyiitł'óóh; Wáin bii' bi'éé' tánéízgiz áádóó yee hadít'éhígíí ch'il na'atł'o'ii bidił biyi' tánéízgiz;

¹²Bináá' éí wáin biláahgo dinilzhin doo, Índa biwoo' éí abe' biláahgo łigai doo.

¹³Zébyulan éí tónteel bibąąhdi táłts'á'ii'eełgi kééhat'į́į doo; Ákwe'é tsinaa'eeł dah nídahatł'óoh doo, Áádóó bikéyah Sáídan kin haal'áii bíighahdi hoodzo dooleeł.

¹⁴Ísakar éí télii bidziilii hééł naakiígíí bita'gi dziztíinii jílį́,

¹⁵Áko háá'iiyį́į́h yá'áhoot'ééh léi'gi hodziiłtsą́, Índa kéyah hózhóní yee', Áko dah azhdidooyééł biniyé hawos yaa ájiilaa, Áádóó á naal'a'í dzizlį́į'go naanish dabidziilii t'éiyá baa nijighá.

¹⁶Dan éí Ízrel dine'é bitahdóó ła' dine'é jílį́įgo hodine'é baa níjít'į́į doo.

¹⁷Dan éí honít'i'gi tł'iish sitínígíí jílį́į doo; Łį́į́' be'atiinígíí bikáá' tł'iish na'ałtseedii jílį́į doo; Éí łį́į́' bikétalígíí ahijiiłháashgo biniinaa bik'i dah nidadzizdáhígíí t'ą́ąjigo adahizhnidéeh dooleeł.

¹⁸Bóhólníihii nílíinii, nibee yisdá'iildéehii biba' ánísht'éego hoolzhiizh.

¹⁹Géed éí nidaabaahígíí bik'íidookah, nidi yik'eh nídidoodleeł.

²⁰Ásher bits'ą́ą́dóó ch'iyáán yá'ádaat'éehii hólǫ́ǫ doo, Índa aláahgo naat'áanii bich'iyą' daalkanii náhoodleeł doo.

²¹Náftalai éí bįįhtsa'ii bidoochidígíí nilį́; Éí ílíinii yee yáłti'.

²²Jóseph éí tsin bits'áoz'a' bąąh bineest'ą' t'óó ahayóí náhoodleełii jílį́; Éí tó háálínígíí bíighahgi tsin bits'áoz'a' bąąh t'óó ahayóí náhoodleeł; bits'áoz'a' tsé yítł'inígíí bilááh dahaazyį́.

²³Da'diłt'ohii háni' dayiił'a'go hak'ee dadiniihgo dahółt'óóh,

²⁴Ákondi be'ałtį́į́' t'ah bidziil, Índa Jéíkab biDiyin God Ayóó'át'éii bidziilii bíla' yee bidziilgo ályaa, Kodóó na'niłkaadii, Ízrel bá tséhígíí át'é.

²⁵Nizhé'é biDiyin God éí lá níká análwo' doo ni, Índa Aláahgo Ayóó'ábóodziilii éí nik'ijidlíi doo; Aghánáhóó'áádę́ę́' bee ak'ihojidlíii, Tónteel biyi'dę́ę́' bee ak'ihojidlíii, Alt'o'dóó bee ak'ihojidlíii, Iishch'id bii'dóó bee ak'ihojidlíii yee nik'ijidlíi doo.

²⁶Nizhé'é bee bik'ihojisdli'ii éí dashizhé'é yę́ę bee bik'idahojisdli'ii biláahdi hool'áágóó daadziłígíí nidanees'ą́ąjį' bee bik'ihojisdli'; Éí t'áá át'é Jóseph bitsii'káa'jį' dooleeł, Áádóó bik'isóó yits'ąą t'áá sahdii naagháhígíí bitsii't'áajį' dooleeł.

²⁷Bénjamin éí mą'iitsoh alghałii nahalin doo; Abínígo yił hidideełígíí yildeeł doo, Áádóó niyiisnánígíí e'e'áahgo ałtai'niih doo.

²⁸Díí t'áá ádzíłtso Ízrel dine'é naakits'áadahgo dajílį́; díí lą́ą hazhé'é hach'į' yee hahaasdzíi'go hak'idadzisdli' ni'; t'ááłá'í jinítínígo bee ak'idahwiizhdoodliiłii yee hak'ijisdli'.

²⁹Áko t'áadoo naaki nilíní hach'į' yee haadzíi'go áhodííniid, Shidine'é yę́ę ahikááhgóó deeshłeeł; Het dine'é Íífran bikéyahdi; tséníhoodzání góne' dashizhé'é yę́ę yóó'ádaalyaa yę́ęgi yóó'ádashidoohłííł.

³⁰Kéínan kéyahgi, Mámre hoolyéii bich'į'gi, éí Makpííla kéyah bii'di tséníhoodzání góne', éí Éíbraham ákwii yóó'áda'alne' doo biniyé Het dine'é Íífran éí kéyah tséníhoodzání t'áá bił yaa nayiisnii'.

³¹Ákwe'é Éíbraham áádóó be'asdzą́ą́ Sarah ałdó' yóó' ábi'diilyaa; Áízak áádóó be'asdzą́ą́ Rebékah ałdó' ákwe'é yóó'ábi'diilyaa, índa shí ałdó' ákwe'é Líyah yóó'íishłaa.

³²Éí dá'ák'ehdóó tséníhoodzánígíí Het dine'é baa nahaaznii'.

³³Nít'éé' Jéíkab haye'ké t'áadoo naaki nilíní bił dahojoolne'go, hatsásk'eh bikáa'jį' anízdool'eezgo, haníłch'i hayi'dę́ę́' haalwod, áko hodine'é ahikááhgóó dzizlį́į́'.